Россия чемпионата көрөөччүлээх ыытыллыан сөп

Кулун тутар 12-14 күннэригэр Улан-Удэҕэ буолуохтаах Россия көҥүл тустууга чемпионата көрөөччүлэрдээх ыытыллыан сөп диэн Бурятия сонуну киэҥник сырдатар средстволара суруйаллар. Билигин бу боппуруоһунан тустаах министиэристибэ үлэлэһэр.

Бу күннэргэ Бурятия Республикатын спорка уонна ыччат политикатыгар миниистирэ Вячеслав Дамдинцурунов, Москваҕа чемпионат тэрийэр комиссиятын мунньаҕар сылдьан, чемпионат тула боппуруостары быһаарсар. Олохтоохтор чемпионаты түөрт күн ыытарга уонна көрөөччүлэри киллэрэргэ диэн этиилээхтэр. Ол гынан, билиҥҥи корона дьаҥын кэмигэр Роспотребнадзор ирдэбилин быһыытынан төһө көрөөччүнү саалаҕа киллэрии боппуруоһа быһаарылла сылдьар эбит. Өскөтүн чемпионат көрөөччүлээх ыытыллар буоллаҕына, киирии билиэти удамыр сыанаҕа оҥорорго былаанныыллар.

Бэҕэһээ, Улан-Удэҕэ тустууга сыһыаннаах биир билэр киһибин кытта телефонунан кэпсэтиибэр, кини чемпионат көрөөччүлээх буоларын туһугар туруорсабыт диэбитэ: “Роспотребнадзор ирдэбилин тутуһан, төһө көрөөччүнү киллэрэргэ быһаарса сылдьабыт. Барытын чугастааҕы балаһыанньа быһаарыаҕа. Ол быһаарылыннаҕына, чемпионакка кэлиэн баҕалаах регионнар спортивнай тустууга федерацияларыгар көрөөччүлэргэ төһө киһини аҕалыахтаахтарыгар квота ыытыахпыт. Хас биирди киһи барыта испииһэк быһыытынан киллэриллиэ. Итиэннэ саамай кылаабынайа, кинилэр бары ковидтан сибиэһэй ыспыраапкалаах буолуохтаахтар”, — диэтэ.

Санатан эттэххэ, өссө сэбиэскэй саҕаттан Бурятия – көҥүл тустууга дойду чемпионатын иккитэ (1981, 1990 сылларга) тэрийэн ыыппыта.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *