Россия Кубогар алта боксёрбут кыттыаҕа

Билиҥҥи, коронавирус дьаҥа тэнийбитин кэнниттэн, сирэй көрсөн киирсэр спорт көрүҥнэриттэн биир бастакынан боксаҕа Россия кубогар улахан таһымнаах күрэхтэһии буолаары турар. Күрэхтэһии атырдьах ыйын 30 – балаҕан ыйын 4 күннэригэр Удмуртия Республикатын киин куоратыгар Ижевскэйгэ ыытыллыаҕа.

Биллэн турар, күрэхтэһии Роспотребнадзор тэрилтэ туруорар туох баар ирдэбиллэрин барытын тутуһан туран ыытыллыа диэн сэрэйэбит. Хас биирдии спортсмен доруобайын туһунан туоһулуур медицинскэй ыспыраапканы тэҥэ, анал көрүүнү баран, күрэхтэһиигэ киллэриллиэҕэ диэн, балаһыанньаҕа суруллубут.

Кубок, бэйэтин балаһыанньатын быһыытынан хамаандалар рингэҕэ уон ыйааһыҥҥа сирэй көрсүһүүлэрин быһыытынан, нууччалыы эттэххэ “стенка на стенку” ыытыллар, онон ордук интэриэһинэй. Манна, Федеральнай уокуруктар хамаандалара кыттыахтара. Билиҥҥи туругунан тэрийээччилэр 25 хамаанданы кэтэһэллэр.

Бу күрэхтэһиигэ саха боксаҕа оскуолатын иитиллээччилэриттэн 6 киһи кыттарга бэлэмнэнэр. Ол курдук, Дальнай Восток Федеральнай уокуругун хамаандатыттан Николай Григорьев (52 кг), Михаил Варламов (57 кг), Москваттан – Борис Сидоров (49 кг), Назар Андреев (75 кг), Киин Федеральнай уокуругуттан Василий Егоров (52 кг) уонна Южнай Федеральнай уокуруктан Михаил Прокопьев (49 кг).

Боксёрдарбыт тренердэринэн – Россия уонна Саха Республикатын үтүөлээх тренерэ Артур Пахомов уонна аҕыйах хонуктааҕыта, СР Ил Дарханын Ыйааҕынан республика үтүөлээх тренеринэн буолбут Владимир Павлов үлэлиэхтэрэ.

Манна даҕатан эттэххэ, соторутааҕыта Москва куорат чемпионатыгар Борис Сидоров бастакы, Назар Андреев иккис миэстэлэри ылбыттара.

Кырдьык, улахан эппиэтинэстээх күрэхтэһии буолаары турар. Бирииһин фондата – 15 мөлүйүөн. Кыайыылаах хамаанда – 7, иккис, үһүс миэстэлээхтэр 5, 3 мөл. cолк. наҕараадаланыахтара.

Күрэхтэһии  бырагыраамата:

Атырдьах ыйын 30 күнэ, баскыһыанньа

12:00-16:00 – Кыттааччылары суруйуу, медицинскэй бэрэбиэркэлээһин.

17:00-18:00 – Сэрэбиэй.

18:00-20:00 – Ыйааһыннаныы.

Атырдьах ыйын 31 – балаҕан ыйын 1-3 күннэрэ

18:30 – Барыллааһын киирсиилэр.

Балаҕан ыйын 4 күнэ, бээтинсэ

15:00 – Бастакы уонна үһүс миэстэ иһин киирсиилэр. Кыайыылаахтары наҕараадалааһын.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *