Россия бэтэрээн-бөҕөстөрө 24 мэтээли ыллылар

Македония Скопье куоратыгар көҥүл тустууга бэтэрээннэр аан дойду үрдүнэн бастыыр иһин чемпионаттара түмүктэннэ. Россия бөҕөстөрө барыта 24 мэтээли ылары ситистилэр. Ити атын дойду хамаандаларынааҕар үчүгэй көрдөрүү. Ол курдук, россияннар 5 кыһыл көмүс, 9 үрүҥ көмүс, 10 боруонса мэтээлинэн наҕараадаланнылар. Манна, саха тустууга кыһатын иитиллээччилэрэ, көбүөр маастардара: Сергей Слепцов, Вадим Данилов, Петр Осипов бэйэлэрин кылааттарын киллэрбиттэриттэн, биһиги, биир дойдулаахтара бары астынабыт. Бэтэрээн-бөҕөстөрбүтүн өссө төгүл эҕэрдэлиибит!

Үс күн устата бэтэрээннэр сааһынан араарыллыбыт биэс бөлөххө (дивизиоҥҥа) барыта 30 кэмпилиэк мэтээл иһин күөн көрүстүлэр. Этэргэ дылы, эдэр эрчимнээх саастарын эргитэн көбүөргэ тахсан, урут туохха үөрэммиттэрин көрдөрдүлэр. Кинилэр ортолоругар Олимпиада призердара, аан дойду, Европа, Азия, ССРС чемпионаттарын кыайыылаахтара уонна призердара элбэх киһи кытынна.

Россия хамаандатыттан пьедестал үрдүкү үктэлигэр таҕыстылар: Рустам Ташуев (78 кг, А дивизион), Гаджимурат Таймазов (100 кг, Д дивизион), Даржак Самдал Оол (62 кг, В дивизион), Виталий Перфильев (100 кг, С дивизион), Зураб Касрадзе (130 кг, Е дивизион).

Үрүҥ көмүс мэтээлинэн наҕараадаланнылар: Иргит Айдын (62 кг, А дивизион), Мухамед Шебзухов (88 кг, В дивизион), Сергей Погорелов (88 кг, С дивизион), Андрей Дробязко (100 кг, С дивизион), Сергей Слепцов (62 кг, Д дивизион), Вадим Данилов (70 кг, Д дивизион), Закия Бикбулатов (70 кг, Е дивизион), Матвей Ильюхин (88 кг, Е дивизион), Идрис Ясулов (100 кг, Е дивизион).

Боруонса мэтээл хаһаайыннарынан буоллулар: Рустам Лепшоков (62 кг, А дивизион), Константин Обухов (78 кг, А дивизион), Асланбек Эзерханов (78 кг, А дивизион), Дмитрий Дармодехин (88 кг, А дивизион), Араик Геворкян (100 кг, А дивизион), Аслан Каитов (70 кг, В дивизион), Аиас Хертек (62 кг, С дивизион), Евгений Сидоров (78 кг, С дивизион), Петр Осипов (78 кг, Д дивизион), Эрелар Фейзуллаев (88 кг, Д дивизион), Кайсын Темукуев (70 кг, Е дивизион).
Хос быһаарыы: көҥүл тустууга аан дойду бэтэрээннэргэ чемпионатын саастарынан бөлөхтөрө: А (35-40 саастаахтар), В (41-45), С (46-50), D (51-55), E (56-60).

Манна даҕатан эттэххэ, өссө Е.А. Борисов СР тустууга федерациятын президенэ эрдэҕинэ, бэтэрээн бөҕөстөр аан дойду чемпионатыгар ситиһиилээхтик кыттыыларыгар бириэмийэ олохтоммута. Холобур, бастаабыкка — 100, иккистээбиккэ — 70, үһүстээбиккэ — 45 тыһ. солк. Маннык бэлиэтээһин, чиэстээһин быйыл миэстэлэспит бөҕөстөрбүтүгэр эмиэ бэриллэригэр баҕарыаҕыҥ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *