Россия боксаҕа чемпионата: 52 киилэҕэ финалга кимнээх көрсүөхтэрэй?

Бу ыйааһыҥҥа барыта 27 кыттааччы күрэхтэһиини саҕалаабыта. Сэрэбиэй кэнниттэн үрдүк рейтиннээх дьон быһыытынан бастаан Артур Нагапетян (Москва), Василий Егоров (Саха сирэ-Москва уобалаһа), Максим Стахеев (Челябинскай), Ахтем Закиров (Крым), Расул Салиев (Дагестан) – сынньаммыттара. Көрдөххө, былырыыҥҥы чемпионат финалистарын Салиевы уонна Егоровы атын-атын бөлөхтөргө араарбыттар.

Бастакы эргииргэ Сергей Чураев (Москва уобалаһа) – Павел Гунченконы (Кемерово, Гунченко биллибэт биричиинэнэн киирсэ тахсыбата), Шандур Иваненко (Ростов) – Расул Джааевы (ХМАО-Югра), Евгений Мартынов (Санкт-Петербург) – Авдей Царенконы (Оренбург), Баир Батлаев (Бурятия) – Никита Устиновы (ХМАО-Югра), Виктор Никифоров (Удмуртия) – Виктор Кулдошины (Москва), Ренат Хайруллин (Татарстан) – Николай Григорьевы (Саха сирэ), Егор Матвеев (Иваново) – Никита Якушевы (ХМАО-Югра), Дмитрий Двали (Москва уобалаһа) – Алексей Дервеневы (Мурманскай), Вадим Кудряков (Крым) – Грайр Оганесяны (Москва уобалаһа), Курбан Байрамбеков (Дагестан) – Ашот Геворкяны (Краснодар), Иван Абрамов (Башкортостан) – Дмитрий Наимовы (Нижнэй Новгород) 5:0 ахсаанынан кыайталаатылар.

Сарсыныгар, финал 8/1-гэр Нагапетян – Чураевы, Мартынов – Иваненконы, Егоров – Батлаевы, Стахеев – Никифоровы, Закиров – Хайруллины, Двали – Матвеевы, Кудряков – Байрамбековы, Салиев – Абрамовы кыайталаатылар.

Онон финал чиэппэригэр көрсүөхтэрэ: Нагапетян – Мартынов, Егоров – Стахеев, Закиров – Двали, Кудряков – Салиев. Манна кыайбыттар мэтээлгэ тиксиэхтэрэ.

Барыта даҕаны кытаанах, тэҥ сыһа киирсиилэр. Киһи эрдэттэн бу киһи кыайар диэн быһа эппэт. Ордук, Кудряков – Салиев саайсыылара интэриэһинэй буолуоҕа. Биллэн турар, биһиги бэйэбит уолаттарбыт Евгений Мартынов, Василий Егоров кыайалларыгар баҕарабыт. Ол быыһыгар Мартынов били илиитин эчэйиитэ хайдах эбитэ буолла, диэн ытырыктата саныыбын. Оо, кыайыыны ситиһэн финал аҥарыгар тахсаллара буоллар…

Кистэл буолбатах,  билиҥҥи кэмҥэ биһиги тумус туттар боксербут Василий Егоров билигин үчүгэй спортивнай таһымыгар сылдьар. Кини бу күрэхтэһиигэ туруорбут сыалын-соругун ситиһэригэр баҕарыаҕыҥ. Тренерэ Артур Иннокентьевич сырдык кэриэһигэр…

Оттон Расул Салиев бэрт ыараханнык киирсэ сылдьар. Абрамовтыын охсуһуута тэҥ этэ. Өссө мин көрүүбэр кыайыыны анараа да киһиэхэ биэриэххэ сөбө. Ол эрээри, ватсаап бөлөҕөр биир спорду таптааччы: “маннык түгэҥҥэ судьуйалар ааттаах-суоллаах киһиэхэ ыалдьаллар” дииллэригэр сөпсөһүөххэ эрэ сөп. Онон дагестанец финалга тахсыа диир билигин ыарахан, тахсар да түгэнигэр илистэн тахсар буолуохтаах. Кудряков да, Закиров даҕаны туран биэрбэт боксердар буоллахтара.

Санатан эттэххэ, былырыын Самараҕа ыытыллыбыт Россия чемпионатыгар бу ыйааһыҥҥа түмүк маннык буолбута:

52 кг: 1 – Расул Салиев (Дагестан), 2 – Василий Егоров (Саха сирэ), 3 – Максим Стахеев (Челябинскай), 3 – Вадим Кудряков (Крым).

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *