Россия боксаҕа чемпионата саҕаланна!

«Триумф» Спорка бэлэмнэнии киинигэр Россия боксаҕа чемпионата саҕаланна. Чемпионаты үөрүүлээхтик аһыыга Саха Республикатын Аҕа баһылыга Айсен Сергеевич Николаев, Россия боксаҕа федерациятын дьаһалтатын салайааччы, бокса Европейскай конфедерациятын (EUBC) вице-президенэ Татьяна Кириенко уонна Бүтүн Россиятааҕы судьуйалар коллегияларын бэрэссэдээтэлэ, Россия чемпионатын техническэй делегата Валерий Рачков эҕэрдэлээтилэр.

Саха сирин баһылыга Айсен Николаев үөрүүлээх быһыыга-майгыга Россия үтүөлээх тренердэрэ Николай Хромовка, Сергей Анохиҥҥа уонна сахалартан боксаҕа ССРС спордун бастакы маастара Артем Никифоровка “Саха сирэ Россияҕа холбоспута 385 сыла” үбүлүөйдээх бэлиэни туттарда.

Россия боксаҕа федерациятын дьаһалтатын салайааччы Татьяна Кириенко бэйэтин эҕэрдэтигэр, Саха сирэ улахан таһымнаах күрэхтэһиини өрүү үрдүк таһымнаахтык тэрийэн ыытарын бэлиэтээтэ, быйылгы чемпионат 2019 сылга Сочига ыытыллыахтаах боксаҕа аан дойду чемпионатыгар Россия хамаандатын састаабын сүүмэрдиир сыаллааҕын эттэ. Итиэннэ, бокса сайдыытыгар үтүөлэрин иһин Россия үтүөлээх тренерэ Артур Пахомовка, Саха сирин боксаҕа федерациятын президенэ Петр Алексеевка – Махтал суруктары туттарда.

Оттон чемпионат техническэй делегата Валерий Рачков, Саха сиригэр кэлэ сатаабыта ырааппытын, ол эрээри, түгэн дьэ быйыл тосхойбутуттан үөрбүтүн санатта уонна бэйэтин эҕэрдэтин “Любите бокс! Держите удар!” диэн этиинэн түмүктээтэ.

Санатан эттэххэ, Дьокуускайга тэриллибит Россия боксаҕа XVII чемпионатыгар дойду 56 регионун 284 бастыҥ боксера кыттар.

Чемпионат бастакы күнүн сарсыардааҥҥы түһүмэҕэр 91 киилэлээхтэргэ республика икки төгүллээх чемпиона Алексей Шахов – Шамиль Мансуровка (Чечня), Россия икки төгүллээх боруонса призера Вадим Лихман – Магомед Арсланбековка (Дагестан) хотторон кэбистилэр.

Оттон чемпионат бастакы күнүн киэһээҥҥи түһүмэҕэр хамаандабыт тумус туттар боксера, спорт үтүөлээх маастара Василий Егоров (49 кг) москвич Виктор Кулдошины үс раунд тухары баһыйа тутан, эрэллээх кыайыыны ситистэ. Василий чахчы үчүгэй боксаны көрдөрөн, биир дойдулаахтарын, сааланы толору мустубут элбэх ахсааннаах ыалдьааччыларын үөртэ.

Бу киэһэ Саха сирин хамаандатын иккис кыттааччыта, Тааттаттан төрүттээх спорт маастара, 26 саастаах Роман Обутов (75 кг) тэҥ киирсиигэ Россия Ис Дьыалаҕа министиэристибэтин чемпионатын кыайыылааҕа Вениамин Пряхины (Москва уобалаһа) кыайа тутта. Көрөөччүлэр, 75 киилэҕэ үчүгэй боксердаммыппыт диэн астына санаатылар.

Ити курдук, чемпионат бастакы күнүгэр икки уолбут кыайда, иккис уолбут хоттордо.

Бырагыраама быһыытынан, алтынньы 14, 15, 16, 17 күннэригэр күнүс 12:00-15:00, киэһэ 17:00-20:00 чаастан барыллааһын киирсиилэр буолуохтара.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *