Россия боксаҕа Кубога: Василий Егоров кыайыыны ситистэ

Ижевскэй куоракка Россия хамаанданан Кубогын иккис күнүгэр бастакынан Киин уонна Соҕурууҥҥу федеральнай уокуруктар хамаандалара рингэҕэ таҕыстылар. Билиҥҥи кэмҥэ биһиги тумус туттар боксербут, спорт үтүөлээх маастара Василий Егоров (52 кг) Киин федеральнай уокурук хамаандатыттан кытынна. Кини утарсааччытынан Ахмед Закиров буолла.

Бу киирсиини «Матч Страна» канаалга быһа көрдөрдүлэр. Закиров – Крым татаара, Россия эдэрдэргэ былырыыҥҥы күрэхтэһиитин кыайыылааҕа. Киирсии хара бастакытыттан бэрт сытыытык барда. Закиров биһиги уолбутуттан уҥуоҕунан намыһах, киппэ көрүҥнээх. Кини бу киирсиигэ, боксаҕа этиллэринии, бастакы нүөмэринэн үлэлээтэ. Икки илиитинэн сирэйин сабынан, үчүгэйдик көмүскэнэр. Күүстээх охсуулаах эбит. Оттон Василий төлө куота сылдьан утары охсуулары оҥортоото. Ити курдук, бэрт сытыытык, икки өттүттэн элбэх охсуулаах киирсиигэ судьуйалар кыайыыны Василий Егоровка биэрдилэр. Туораттан көрдөххө, биһиги боксербут быдан үөрүйэхтээх уонна баай албастаах буолан баһыйда.

Онон, бэҕэһээҥҥиттэн саҕаламмыт күрэхтэһиигэ рингэҕэ үс уолбут (Борис Сидоров, Михаил Варламов, Василий Егоров) тахсан – үһүөн кыайыыны ситистилэр.

Бу күрэхтэһиигэ Василий Егоров сүрүн утарсааччыта, Россия саҥа чемпиона, дагестанец Расул Салиев эмиэ кыттар. Кинилэр киирсиилэрин көрүөхпүтүн сөп. Санатан эттэххэ, хамаандалар хас ыйааһын ахсын иккилии кыттааччылаахтар. Кинилэри солбуйа сылдьан кытыннарыахтарын сөп.

Петр ПАВЛОВ.     

 

 

Добавить комментарий

Ваш адрес email не будет опубликован. Обязательные поля помечены *