Россия боксаҕа Кубога: Василий Егоров бастыҥын биллэрдэ

Дьэ, хас да күнү быһа ыытыллыбыт күрэхтэһиибит – Россия боксаҕа хамаанданан Кубога түмүктүүр түһүмэххэ таҕыста. Бүтэһик быһаарыылаах көрсүһүүгэ сиидэлэнэн-сиидэлэнэн Киин уонна Приволжскай федеральнай уокуруктар хамаандалара, бастакы миэстэни хайалара ыларын быһаарса таҕыстылар.

Биллэн турар, биһиги болҕомтобут барыта бэйэбит боксербут – спорт үтүөлээх маастара Василий Егоровка уурулунна.

52 кг финал: Василий Егоров (Киин ФУо) – Иван Абрамов (Приволжскай ФУо).

Абрамов – Башкортостан боксаҕа оскуолатын иитиллээччитэ, Россия чемпионатын икки төгүллээх боруонса призера, уолаттарга Россия уонна Европа күрэхтэһиитин кыайыылааҕа, норуоттар икки ардыларынааҕы кылаастаах спорт маастара.

Киирсиини “МатчБоец” канаалга быһа көрдөрдүлэр. Көрсүһүү хара ааныттан биһиги боксербут олус көхтөөхтүк, хабырдык кииристэ. Этэргэ дылы, киһитигэр өйдөнөр бокуой биэрбэккэ, наар кимэн таҕыста. Саалаҕа баар дьон биир кэм: “Вася! Вася! Вася!” диэн, уолбутун кыайыыга түстээтилэр. Ол аайы оператор, сотору-сотору муннукка олорор секундант тренердэри көрдөрөр. Артур Пахомов уолугар ыалдьан, олох бэйэтэ боксалаһа, сүбэлии, этэргэ дылы, бүргэс үрдүгэр олордо.

Бу киирсиигэ Василий 5:0 ахсаанынан эрэллээх кыайыыны ситистэ. Бастыҥ боксербутун уонна кини тренерин, Саха сирин боксатын салалтатын эҕэрдэлээн кэбиһиэҕиҥ! Төһө да хамаанданан күрэхтэһии буоллун, Василий Егоров үчүгэй таһымҥа сылдьарын көрдөрдө. Аны, Россия чемпионатын кэтэһэбит.

Санатан эттэххэ, бэҕэһээ Ураллааҕы федеральнай уокурук хамаандата үһүс бириистээх миэстэни ылан, 300 тыһ солк харчынан наҕараадаламмыта.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *