Россия боксаҕа Кубога: Борис Сидоров иккис кыайыыта

Ижевскэй куорат. Россия боксаҕа хамаанданан Кубога. Иккис эргииргэ Москва куорат хамаандата Приволжскай федеральнай уокурук хамаандатын кытта көрүстэ. Киирсиилэри “Матч Боец” канаал “күөх экранынан” быһа көрдөрдө. Бастакы ыйааһыҥҥа биһиги боксербут, соторутааҕыта Москва чемпиона буолбут Горнай ыччата Борис Сидоров кииристэ.

Утарсааччыта – спорт маастара Андрей Потемкин (Приволжскай федеральнай уокурук). Комментатор эппитинэн “бэтэрээн” эбит, сааһа 31-рэ. Биһиги уолбутуттан уҥуоҕунан биир харыс үрдүк. Бу киирсиигэ Сидоров хара ааныттан кимээһиннээхтик кииристэ. Үс раунд тухары кимэн таҕыста. Элбэх охсуулары оҥордо, көрдөххө түргэн-тарҕан туттуулаах, атаҕынан үчүгэйдик үлэлиир, хамсанар. Быһата, киирсии тухары баһыйа тутта.

Биллэрээччи судьуйа тоҕо эрэ: “В этом бою с раздельным решением судей победу одержал Борис Сидоров!”, — диэтэ даҕаны, көрдөххө биһиги уолбут итэҕэтиилээхтик, туох да мөккүөрэ суох кыайда. Онон Горнай ыччата иккис кыайыытын сурунна. Бэҕэһээҥҥитээҕэр үчүгэйдик, эрэллээхтик кииристэ.

Манна даҕатан эттэххэ, хамаандалар ыйааһын аайы иккилиии кыттааччыны солбуйа сылдьан кытынналлар эрээри, Сидоров иккитэ субуруччу кииристэ. Уонна үөрүүлээҕэ диэн, иккиэнэригэр кыайыыны ситистэ. Күрэхтэһии салҕанан барар…

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *