Роман Дмитриев турнира: Финалга үс уолбут киирдэ!

Күн иккис аҥаарыгар күрэхтэһии – турниры үөрүүлээхтик аһыыттан саҕаланна. Бэлиэ түгэҥҥэ Саха Республикатын Аҕа баһылыга, республика спортивнай тустууга федерациятын президенэ Айсен Николаев кыттыыны ылла.

Кини, физическэй культура уонна спорт эйгэтигэр үтүөлэрин уонна республика социальнай-экономическай сайдыытыгар кылааттарын, элбэх сыллаах ситиһиилээх үлэлэрин иһин – Уус Алдан тустууга кыһатын тренерэ Николай Романович Крыловка – Саха Республикатын үтүөлээх тренерэ, Р.М. Дмитриев аатынан Олимпийскай эрэл училищетын преподавателэ Людмила Николаевна Гаврильеваҕа – Саха Республикатын үтүөлээх учуутала үрдүк ааттары үөрүүлээх быһыыга-майгыга туттарда.

Итини тэҥэ үөрүүлээх аһыллыыга Роман Михайлович төрөппүт уола Роман Романович уонна турнир техническэй делегата Тахир Гуламов (Узбекистан) бэйэлэрин эҕэрдэлэрин тиэртилэр.

Дьэ, ол кэнниттэн финалга тахсар иһин хапсыһыылар саҕаланнылар.

57 киилэҕэ Сунтаар тустууга оскуолатын иитиллээччитэ Харысхал Григорьев – соторутааҕыта Иркутскайга Россия күрэхтэһиитигэр үһүс бириистээх миэстэҕэ тахсыбыт осетин Артем Гобаевы сүрдээх тыҥааһыннаах хапсыьыыга 3:1 ахсаанынан баһыйа тутта. Ити курдук, 61 киилэҕэ Уус Алдан ыччата Александр Иванов бурят Дамдин Цыренжаповы кытта тустуута, этэргэ дылы, көрөөччүлэри бүргэс үрдүгэр олорто. Олус тыҥааһыннаахтык барбыт киирсиигэ Александр кыайыыга дьулуурун көрдөрөн, туох да мөккүөрэ суох 6:3 ахсаанынан кыайан, сахалартан иккис киһинэн финалга таҕыста. Ол оннугар бу ыйааһыҥҥа Николай Спиридоновпыт молдован Вадим Берегойга 1:5 ахсаанынан хотторон кэбистэ. Манна даҕатан эттэххэ, молдован утуу-субуу биһиги уолаттарбыт: В.Шадрины, О.Фомины, Н.Спиридоновы кыайталаата.

65 киилэҕэ Вальтер Владимиров сүрдээх сытыытык барбыт, аһаҕас бырахсыылаах киирсиигэ 11:20 ахсаанынан Россия призера Данил Харчилаваҕа баһыйтаран кэбистэ.

Үөһэ ыйааһыннарга киирсиилэр эргиир систиэмэтинэн ыытылыннылар. Онуоха биир талааннаах ыччаппыт, Хаҥалас улууһуттан төрүттээх Даниил Иванов (92 кг) билиҥҥитэ икки кыайыылаах, аны сарсын финал кэриэтэ киирсиигэ бэйэтин киһитэ Артур Дьяконовы кытта тустар. Ыарахан ыйааһыҥҥа Эдуард Максимов балаһыанньата куһаҕана суох, баҕар хардары-таары кыайсыыга инники тахсан хаалыан эмиэ сөп курдук көрдүм.

Ханныгын да иһин, күрэхтэһии көрөөччүтэ суоҕа соччото суох. Хайдах эрэ уу-чуумпутук ыытылынна. Бөҕөстөрү сытыы киирсиигэ күөттүүр, трибунаҕа толору симиллибит тустуу бэриниилээх ыалдьааччыларын ыһыылара-хаһыылара мэлигир. Онон хайдах эрэ киһи кутун-сүрүн, сүргэтин көтөҕөр көстүү, бырааһынньыктыы быһыы-майгы суох. Арай, сотору-сотору, судьуйа свистога чуһуурар. Хата, күрэхтэһии олох да уу-чуумпутук барыаҕын тренердэр Василий Уваров, Иван Сивцев уонна Джабраил Гасанов бэйэлэрин уолаттарыгар сүбэлээн хаһыытыыллара, хапсыһыылары сытыырхатан биэрдэ.

Чуолаан, ыарахан ыйааһыҥҥа Эдуард Максимов, наар кыайыынан айаннаан иһэр Шота Кортиевы (Россия) кытта киирсиитигэр, тренер Василий Петрович Уваров уолун дэлби күөттээн, санаатын көтөҕөн, түмүккэ Максимов 5:4 ахсаанынан кыайан таҕыста. Итиннэ туох да саҥата-иҥэтэ суох олорбута буоллар, хапсыһыы түмүгэ өссө хайдах буолара биллибэт этэ…

Финалга көрсүөхтэрэ:

57 кг Эрдэм Борокшонов (Россия) – Харысхал Григорьев (Россия)

61 кг Александр Иванов (Россия) – Вадим Берегой (Молдова)

65 кг Данил Харчилава (Россия) – Сабир Джафаров (Азербайджан)

70 кг Арсен Балаян (Россия) – Джабраил Гаджиев (Азербайджан)

79 кг Али Шахриев (Россия) – Мухаммад Абдуллаев (Кыргызстан)

97 кг Давид Кабисов (Россия) – Магомедрасул Рахимов (Узбекистан).

Сарсын күрэхтэһии 12:00 чаастан буолар диэн биллэрдилэр.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *