Роман Дмитриев турнира: Сытыы хапсыһыылары көрүөхпүт

Бүгүн, муус устар 30 күнүгэр күнүс 11:00 чаастан «Триумф» Спорка бэлэмнэнии киинигэр олимпийскай чемпион Роман Дмитриев кэриэһигэр көҥүл тустууга эдэрдэргэ норуоттар икки ардыларынааҕы турнир бары ыйааһыннарга барыллааһын хапсыһыыларынан саҕаланаллар.

Эрдэ иһитиннэрбиппит курдук, турнирга Россия, Азербайджан, Кыргызстан, Молдова, Узбекистан дойдуларын эдэр бөҕөстөрө кытталлар.

Бэҕэһээ киэһэ кыттааччылар бары сэрэбиэйи аастылар. Ол курдук, 57 киилэҕэ барыта 18 бөҕөс баар. Кинилэр ортолоругар Кыргызстан, Молдова, Азербайджан бөҕөстөрө бааллар. Бу ыйааһыҥҥа квалификацияҕа, Егор Находкин – тувин Айслан Сарыглар, Юлиан Григорьев – азербайджанец Мурад Хагвердиев хапсыһыыларынан күрэхтэһии саҕаланар. Өссө манна биһигиттэн Харысхал Григорьев, Артем Слепцов, Валерий Андросов курдук, бэйэлэрин саастыылаахтарыгар балачча биллэр-көстөр тустууктар бааллар.

61 кг ыйааһыҥҥа 9 бөҕөс күөн көрсүө. Манна Александр Иванов, Кирилл Дорожкин, Олег Фомин ситиһиилээхтик кытталларыгар баҕарабыт.

Салгыы ыйааһыҥҥа (65 кг) 8 бөҕөс сэрэбиэйи ааспыт. Бастакы эргииргэ сэрэбиэй быһыытынан Владимир Бояновскай – Россия хамаандатыттан Данил Харчилаваны кытта тустар буолбут. Бу ыйааһыҥҥа Вальтер Владимиров, Уйгулан Протодьяконов бириистээх миэстэ иһин киирсиэхтэрин сөп.

70 кг – 9 кыттааччы. Бу ыйааһыҥҥа Азербайджантан, уолаттарга Европа уонна аан дойду түһүлгэлэригэр балачча ситиһиилээх Джабраил Гаджиевы чорботуохха сөп. Манна сыһыары тутан эттэххэ, Азербайджан хамаандатын Олимпиада боруонса призера, Европа үс төгүллээх чемпиона, аан дойду чемпионатын хас да төгүллээх призера, биллиилээх тустуук Джабраил Гасанов салайан илдьэ кэллэ. Кини быйылгыттан Азербайджан эдэрдэргэ хамаандатын сүрүн тренеринэн анаммыта.

Бу ыйааһыҥҥа биһиги да уолаттарбыт (Ньургун Андреев, Михаил Сергеев, Ньургустан Иванов) пьедесталга тахсарга дьулуһуохтара.

Онтон үөһэ ыйааһыннарга кыттааччылар аҕыйах буоланнар, хапсыһыылар эргиир систиэмэтинэн ыытыллыахтара.

Күрэхтэһии икки көбүөрүнэн ыытыллар. Бүгүҥҥү бырагырааманы билиһиннэрдэххэ, 11:00-13:00 – бары ыйааьыннарга барыллааһын хапсыһыылар,

13:00-14:30 – тохтобул,

14:30-18:00 – барыллааһын хапсыһыылар,

18:00-18:30 – турниры үөрүүлээхтик аһыы,

18:30-20:30 – финалга тахсар иһин хапсыһыылар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *