Роман Дмитриев турнира: Саха сирин хамаандата 8 мэтээллэннэ!

«Триумф» Спорка бэлэмнэнии киинигэр олимпийскай чемпион Роман Дмитриев кэриэһигэр эдэрдэргэ көҥүл тустууга норуоттар икки ардыларынааҕы 8-с турнир икки күн устата ыытыллан түмүктэннэ. Бу сырыыга биллэр биричиинэнэн 5 дойду (Россия, Азербайджан, Кыргызстан, Молдова, Узбекистан) уонна Россия 12 регионун эдэр бөҕөстөрө күөн көрүстүлэр. Көбүөргэ барыта 92 бөҕөс таҕыста.

Күрэхтэһии түмүгүнэн биһигиттэн үс бөҕөс бастыан сөп диэн тренердэр билгэлээһиннэрэ туолла. Ылан көрдөххө, саамай эрэнэр ыйааһыммытыгар – 57 кг финал аҥаарыгар биир эрэ уолбут тахсыбыта. Ол да буоллар, Сунтаар тустууга кыһатын иитиллээччитэ Харысхал Григорьев тустууну таптааччылар эрэллэрин түһэн биэрбэтэ.

Финалга тахсар иһин киирсиигэ соторутааҕыта Иркутскайга ыытыллыбыт Россия эдэрдэргэ күрэхтэһиитин призера осетин Артем Гобаевы 3:1 ахсаанынан хотон финалга тахсыбыта. Онно бурят Эрдэм Борогшоновка, хапсыһыы бүтэрэ уонча сөкүүндэ иннинэ 0:2 ахсаанынан хотторон испитэ. Көрөөччүлэргэ дьэ ыксал буолбута. Ама, хоттордубут дуо, диэн ыгылыйа турдахпытына, Харысхал киһитин умса баттыы сылдьан «лампочка» диэн албаска эргитэн ахсаанын тэҥнээбитэ, оттон тута сөрөөн «кириэскэ» эргитэн, көрүөх бэтэрээ өртүгэр ахсааны 4:2 бэйэтин туһатыгар оҥоро охсубута.

Онон 20 саастаах Харысхал Григорьев (тренерэ Николай Данилов) – турнир кыайыылааҕынан буолла.

Манна сыһыары тутан эттэххэ, дьиҥэ, быйылгы турнирга биһиэннэриттэн бастакы кыайыылааҕынан эдэр талааннаах тустуук Даниил Иванов (тренерэ Василий Уваров) буолбута. Кини ыйааһыныгар (92 кг) кыттааччы аҕыйах буолан, хапсыһыылар эргиир систиэмэтинэн ыытыллан, өссө финал иннинэ кыайыылаах ким буолара биллибитэ.

Турнир бастыҥ тустуугунан 61 киилэҕэ бастаабыт Уус Алдан ыччата, 20 саастаах Александр Иванов ааттанна. Тренердэр Иван Дмитриев, Станислав Захаров иитиллээччилэрэ бу түһүлгэҕэ сиппит-хоппут хапсыһыылары көрдөрдө. Финалга тахсар иһин киирсиигэ бурят Дамдин Цыренжаповы 6:3 уонна финалга молдован Вадим Берегойу 10:1 ахсааннарынан итэҕэтиилээхтик кыайталаата.

Атын да уолаттарбытыттан Владимир Бояновскай, Эдуард Максимов, Андриан Ленскэй куһаҕана суох тустууну көрдөрдүлэр. Оттон Валерий Андросов, Артем Слепцов, Олег Фомин бэйэлэрин кыахтарын ситэ туһамматылар дии саныыбын.

Ааспыт маннык турнирга биир эрэ чемпионнаах (Айсиэн Винокуров) буоллахпытына, быйыл үс уолбут бастаан, көрдөрүүбүт үчүгэй диэххэ сөп. Харысхал Григорьев, Александр Иванов, Даниил Иванов бастаабыт эбит буоллахтарына, Эдуард Максимов – иккис, Олег Фомин, Владимир Бояновскай, Андриан Ленскэй, Сергей Николаев – үһүс миэстэлэргэ тахсан, Саха сирин хамаандата барыта аҕыс мэтээллэннэ.

Манна даҕатан эттэххэ, соторутааҕыта Иркутскайга түмүктэммит Россия эдэрдэргэ күрэхтэһиитин кыайыылааҕа Станислав Свинобоев уонна призер Дархан Игнатьев дойду сүүмэрдэммит хамаандатын үөрэтэр-эрчийэр түмсүүтүгэр ыҥырыллан, сатаан кыттыбатылар.

Түмүккэ, турнир кыайыылаахтарыгар – 70, иккис миэстэлээхтэргэ – 50, үһүстэргэ – 40 уонна кыайыылааҕы бэлэмнээбит тренердэргэ – 40 тыһ. солк. харчынан бириэмийэлэр сертификаттара туттарылынна. Маны тэҥэ түһүлгэ бастыҥнарыгар спонсордар олохтообут анал бириистэрэ туттарылыннылар.

Турнир түмүк көрдөрүүтэ:

57 кг (18 кыттааччы): 1. Харысхал Григорьев (Россия, Саха сирэ), 2. Эрдэм Борогшонов (Россия, Бурятия), 3. Баир Баяндуев (Россия, Бурятия), 3. Артем Гобаев (Россия, Хотугу Осетия).

61 кг (9): 1. Александр Иванов (Россия, Саха сирэ), 2. Вадим Берегой (Молдова), 3. Дамдин Цыренжапов (Россия, Бурятия), 3. Олег Фомин (Россия, Саха сирэ), 5. Кирилл Дорожкин, Николай Спиридонов (иккиэн – Россия, Саха сирэ).

65 кг (8): 1. Данил Харчилава (Россия, Калининград), 2. Сабир Джафаров (Азербайджан), 3. Владимир Бояновскай (Россия, Саха сирэ), 3. Саян Жигжимаев (Россия, Бурятия), 5. Вальтер Васильев (Россия, Саха сирэ).

70 кг (9): 1. Джабраил Гаджиев (Азербайджан), 2. Арсен Балаян (Россия, Калининград), 3. Константин Топшиноев (Россия, Иркутскай), 3. Орозбек Токтомамбетов (Кыргызстан), 5. Ньургун Андреев (Россия, Саха сирэ).

74 кг (5): 1. Тумэн Бодиев (Россия, Бурятия), 2. Буянто Шадапов (Россия, Бурятия), 3. Андриан Ленскэй (Россия, Саха сирэ).

79 кг (6): 1. Али Шахриев (Россия, Ингушетия), 2. Мухаммад Абдуллаев (Кыргызстан), 3. Артур Елбаскин (Россия, Бурятия).

86 кг (4): 1. Юсуп-Хаджи Айдаев (Россия), 2. Аюр Нимаев (Россия, Бурятия), 3. Масуржан Улуу Муслимбек (Россия).

92 кг (4): 1. Даниил Иванов (Россия, Саха сирэ), 2. Руслан Кердикоев (Россия), 3. Сергей Николаев (Россия, Саха сирэ).

97 кг (2): 1. Магомед-Расул Рахимов (Узбекистан), 2. Дэвид Кабисов (Россия, Хотугу Осетия).

125 кг (5): 1. Гамзат Алижудинов (Россия), 2. Эдуард Максимов (Россия, Саха сирэ), 3. Шота Кортиев (Россия, Иркутскай).

Петр ПАВЛОВ.  

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *