Роман Дмитриев турнира: Көбүөргэ биэс дойду бөҕөстөрө күөн көрсүөхтэрэ

Бэчээт дьиэтин Медиа-Киинигэр ССРС спордун үтүөлээх маастара, ССРС үтүөлээх тренерэ, олимпийскай чемпион Роман Михайлович Дмитриев кэриэһигэр көҥүл тустууга эдэрдэргэ (2003-2006 сс. төрөөбүттэргэ) норуоттар икки ардыларынааҕы VIII турнирга аналлаах пресс-конференция тэрилиннэ.

Пресс-конференцияҕа Саха Республикатын физическэй култуураҕа уонна спорка миниистирин бастакы солбуйааччы Леонид Спиридонов, Р.М. Дмитриев аатынан Олимпийскай эрэл училищетын дириэктэрэ Семен Чердонов, Тустуу аан дойдутааҕы түмсүүтүн техническэй делегата Тахир Гуламов (Узбекистан), турнир кылаабынай судьуйата Александр Чуенко кыттыыны ыллылар.

Кинилэр иһитиннэрбиттэринэн, быйылгы турнирга 4 омук дойдутуттан уонна Россия 13 регионуттан (Тыва Республиката, Хабаровскай, Приморскай, Забайкальскай, кыраайдар, Кемеровскай, Московскай, Иркутскай уобаластар, Бурятия, Красноярскай, Санкт-Петербург, Калининград) бөҕөстөр кытталлар. Барыллааһын ааҕыынан 92 бөҕөс.

Турнирга 15 судьуйа үлэлиэ. Кылаабынай судьуйанан – олимпийскай категориялаах судьуйа Александр Николаевич Чуенко ананна. Оттон Тустуу аан дойдутааҕы түмсүүтүн (UWW) техническэй делегатынан Тохир Гуламов (Узбекистан) буолуоҕа.

Турнир бочуоттаах ыалдьыттарынан норуоттар икки ардыларынааҕы категориялаах судьуйалар Анатолий Алексеевич Ковалев, Солтан Сергеевич Засеев, Роман Михайлович оҕолоро: Роман Романович уонна Марина Романовна буолуохтара.

Республикаҕа эпедиомологическай балаһыанньа уустугунан сибээстээн, Саха Республикатын Ил Дархана Айсен Николаев ыйааҕынан, ковид дьаҥын бопсууга эбии хааччахтааһын быһыытынан, турнир көрөөччүтэ суох ыытыллар. Онон тустууну телевизорга “Саха” уонна “Мамонт” каналларга итиэннэ интернеккэ Ютуб каналларга көрүөххэ сөп буолуо.

Ити курдук иһитиннэриилэр кэннилэриттэн суруналыыстарга ыйытыы баар дуо диэбиттэригэр, бу строкалар ааптардара: «Ити омук 4 дойдута диэн ханнык дойдуларый?” диэн ыйыппыппар, Семен Чердонов: “Урут Р.М. Дмитриев турнирыгар 15-тии хамаанда кыттар этэ. Оттон быйыл, төһө эмэ эрдэттэн элбэх кэпсэтии барбытын үрдүнэн, пандемиянан сибээстээн хамаандалар аҕыйахтар. Ити түөрт ханнык дойдуларый диир буоллахха – Узбекистан, Кыргызстан, Азербайджан уонна Молдова. Онон биһиги быйылгы турнирбытыгар Россияны киллэрэн туран, барыта биэс дойду бөҕөстөрө кытталлар диэхпитин наада”, — диэн хоруйдаата.

Оттон “Спорт Якутии” сайт кылаабынай редактора Александр Посельскай: “Турнирга ханнык биллэр-көстөр бөҕөстөр кытталларый?” – диэн ыйытыытыгар Тахир Гуламов, Узбекистантан Рахимов диэн оҕолор Олимпийскай оонньууларын чемпиона буола сылдьыбыт Азия кыайыылааҕа кыттарын эттэ. Оттон Александр Чуенко, соторутааҕыта Иркутскайга ыытыллан түмүктэммит Россия эдэрдэргэ күрэхтэһиитигэр үһүс миэстэлэри ылбыт бөҕөстөр кытталларын эттэ.

Тустуу сарсын күнүс 11:00 чаастан бары ыйааһыннарга барыллааһын киирсиинэн саҕаланар.  

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *