Роман Дмитриев турнира: Боруонсаҕа кимнээхпит киирсиэҕэй?

Бу иннинээҕи суруйууга Роман Дмитриев турнирын финалистарын билиһиннэрбиппит. Аны билигин кылгастык, биһиги уолаттарбытыттан өссө кимнээх мэтээл иһин киирсиэхтэрин сөбүн сырдата түһүөххэ.

57 киилэҕэ Харысхал Григорьев финалга тахсыбыта. Киниэхэ финал чиэппэригэр хотторбут бу ыйааһыҥҥа өссө биир күүстээх тустуукпут Артем Слепцов «уоскутар» бөлөххө киирэн, молдован Демьян Люцкановы кытта киирсиэҕэ. Онно хайалара кыайбыта – турнир боруонса мэтээлин иһин Артем Гобаевы кытта тустуоҕа. Онон Артем Слепцов бириискэ тиксэр кыахтаах диэххэ сөп.

61 киилэҕэ Александр Иванов финалга тахсыбытын быһыытынан, киниэхэ хотторбут Кирилл Дорожкин үһүс бириистээх миэстэ иһин бурят Дамдин Цыренжаповтыын киирсиэҕэ. Оттон иккис финалист – молдован Вадим Берегойга сабырыйтарбыт Виталий Шадрин, Олег Фомин уонна Николай Спиридонов бэйэлэрин икки ардыларыгар ким пьедестал үһүс үктэлигэр тахсарын быһаарсыахтара. Онон бу ыйааһыҥҥа биир боруонса номнуо баар диэн бүк эрэниэххэ сөп.

65 киилэҕэ Данил Харчилаваҕа хотторбут Владимир Бояновскай уонна Вальтер Владимиров боруонса иһин тустуохтара. Онон бу ыйааһыҥҥа эмиэ биир мэтээл баар диэххэ сөп.

70 киилэҕэ уолаттарга аан дойду уонна Европа күрэхтэһиилэрин кыайыылааҕа Джабраил Гаджиевка (Азербайджан) хотторбут Ньургун Андреев «уоскутар» бөлөххө Руслан Абиевтыын (Россия) киирсиэҕэ. Онно ким кыайбыта үһүс миэстэ иһин кыргыз Орозбек Токтомамбетовтыын тустуоҕа.

Үөһэ ыйааһыннарга киирсиилэр эргиир систиэмэтинэн ыытыллыбыттарынан, барыта хаачыстыба өртүнэн көрүллэн, ырытыллан, ким хаһыс миэстэни ыларын быһаарсыахтара.

Онон, финалистарбытын тэҥэ хас да уолбут боруонса мэтээл иһин киирсэр кыахтаахтар диибит. Кинилэргэ ситиһиини баҕарыахха!

Петр ПАВЛОВ.       

Добавить комментарий

Ваш адрес email не будет опубликован. Обязательные поля помечены *