Роман Дмитриев сүдү аатыгар сүгүрүйүү

Комсомольскай болуоссакка, олимпийскай чемпион Роман Дмитриев пааматынньыгар, бүгүҥүттэн саҕаланар көҥүл тустууга эдэрдэргэ норуоттар икки ардыларынааҕы турнир иннинэ үгэс быһыытынан Роман Михайловичка сүгүрүйүү, кэриэстэбил сиэрэ-туома ыытылынна.

Сааскы чаҕылхай күн болуоссакка сахаттан бастакы олимпийскай чемпион, ССРС спордун үтүөлээх маастара уонна үтүөлээх тренерэ Роман Михайлович Дмитриев сырдык аатын кэриэстээн дьон тоҕуоруһа муһунна. Итинэн кинилэр улуу спортсмены кэриэстииллэрин, кини талааныгар сүгүрүйэллэрин уонна саха тустуутун инникитин туһугар биир санаалаахтарын көрдөрдүлэр.

Бу тэрээһиҥҥэ Саха Республикатын физическэй култуураҕа уонна спорка миниистирин бастакы солбуйааччы Леонид Спиридонов, турнир техническэй делегата Тахир Гуламов (Узбекистан), олимпийскай призер, спорт үтүөлээх маастара Александр Иванов, Роман Михайлови төрөппүт кыыһа Марина Крылова кыттыыны ылан, кылгас ахтыы оҥордулар. Турнир үрдүк таһымнаахтык, тэрээһиннээхтик ыытылларыгар баҕардылар.

Ити курдук, кылгас ахтыы миитин кэнниттэн Р.М. Дмитриев пааматынньыгар сибэкки дьөрбөтүн ууруу буолла. Тэрээһин, хаартыскаҕа түһүүнэн түмүктэннэ.

Маны тэҥэ бу күн турнир чэрчитинэн кинигэ сүрэхтэниитэ, судьуйалар сүбэ мунньахтара уонна турнир кыттыылаахтарын бары ыйааһыннарга сэрэбиэйдэрэ ыытылынна.

Санатан эттэххэ, муус устар 29 – ыам ыйын 1 күннэригэр биһиги Дьокуускайбытыгар, чуолаан “Триумф” Спорка бэлэмнэнии киинигэр – Роман Михайлов Дмитриев сырдык аатынан эдэр бөҕөстөргө үгэскэ кубулуйбут норуоттар икки ардыларынааҕы таһымнаах күрэхтэһии ыытыллар. Быйылгы, Тустуу аан дойдутааҕы түмсүүтүн (UWW) сыллааҕы календарын быһыытынан ыытыллар турнирга, төһө да аан дойду үрдүнэн ковид дьаҥа бүрүүкээн турдар, 4 тас дойдуттан, Россияттан 13 регион эдэр бөҕөстөрө мустан, икки күн устата көбүөргэ күөн көрсүөхтэрэ.

Биллэр биричиинэнэн, турнир көрөөччүтэ суох ыытыллар. Ол оннугар хапсыһыылар олохтоох телевидение “Мамонт” каналыгар уонна Ютуб-каналларга быһа көрдөрүллүөхтэрэ.

Петр ПАВЛОВ.

Ааптар хаартыскаҕа түһэриилэрэ.     

  

Добавить комментарий

Ваш адрес email не будет опубликован. Обязательные поля помечены *