Роман Дмитриев аатыгар сүгүрүйэн…

Роман Дмитриев кэриэһигэр көҥүл тустууга норуоттар икки ардыларынааҕы турнир короновирус ыарыы тарҕаныытын бопсон, төһө да атын кэмҥэ көһөрүллүбүтүн үрдүнэн, албан аатырбыт киһибитигэр аналлаах тэрээһиннэр, кини сүгүрүйээччилэрин түмэ тарта. Ол курдук, П.А. Ойуунускай аатынын академическай театрга Эдьигээн оройуонун күүһүнэн “Сулус буолан умайдын” диэн спектакль үрдүк таһымнаахтык туруорулунна.

Роман Михайлович сырдык аатын кэриэстээн, киниэхэ ытыктабыл бэлиэтин оҥорон, саалаҕа баппат үлүгэрдээх элбэх киһи тоҕуоруспута эмиэ да астыныы, эмиэ даҕаны долгуйуу санаатын үөскэттилэр. Саха сирэ, биһиги киин куораппыт олохтоохторо уонна ыалдьыттара спектаклы астына көрдүлэр итиэннэ үрдүк сыанабылы биэрдилэр.

Манна сыһыары тутан эттэххэ, “Сулус буолан умайдын” спектаклы киһи ханна баҕарар кыбыстыбакка көрдөрөр үлэтэ эбит. Онон бу туруорууну салгыы сайыннаран, республика ханнык баҕарар муннугар көрдөрөн, биһиги бары ытыктыыр, киэн туттар киһибит аатын үйэтитиигэ сүҥкэн кылаат буолуо этэ дии санаатым.

Итинник даҕаны буолуохтаах. Роман Дмитриев – сахаҕа сүдү киһи. Киниэхэ итинник болҕомто ууруллуохтаах, кини аата өссө даҕаны салгыы ааттана, үйэтитиллэ туруохтаах. Кэрэхсэбиллээҕэ диэн, спектаклга биһиги кэлэр көлүөнэбит көхтөөхтүк кытынна уонна саалаҕа даҕаны элбэх оҕо баара – санааны көтөҕөр. Ол аата, Роман Дмитриев аата, олорон кэлбит олоҕо уостан уоска бэриллэн, биһиги сүрэхпитигэр өрүү тыыннаах буолуоҕа диэн эрэниэххэ сөп.

Оттон бүгүн, кулун тутар 7 күнүгэр – Роман Михайлович Дмитриев төрөөбүт күнүгэр, киин куорат Комсомольскай болуоссатыгар, кини аатынан пааматынньык иннигэр үгэс быһыытынан, кэриэстэбил түгэнэ буолан ааста. Бэлиэ түгэҥҥэ Ил Түмэн Государственнай мунньаҕын бэрэссэдээтэлэ Петр Гоголев, СР Бырабыыталыстыбатын бэрэссэдээтэлин солбуйааччы Ольга Балабкина, СР Физическэй култуураҕа уонна спорка миниистирэ Иннокентий Григорьев, олимпийскай призер, спорт үтүөлээх маастара Александр Иванов, Роман Михайлович кэргэнэ Антонина Дмитриева, Ил Түмэн депутаттара, республика спорка салайааччылара, Роман Михайлович биир дойдулаахтара – эдьигээннэр, спорт общественноһа, улуу тустуук аатыгар сүгүрүйээччилэр уонна куорат олохтоохторо кыттыыны ыллылар.

Кинилэр, олимпийскай чемпион Роман Михайлович Дмитриев пааматынньыгар сибэкки дьөрбөтүн ууран, кинини ытыктыылларын, хаһан даҕаны умнубаттарын, үрдүктүк туталларын көрдөрдүлэр.

Петр ПАВЛОВ.

Ааптар хаартыскаҕа түһэриилэрэ.  

Добавить комментарий

Ваш адрес email не будет опубликован. Обязательные поля помечены *