Родион Степанов – Дальнай Восток чемпиона!

Гректии-римнии тустууга эрчиллэр уолаттарбыт биһигини салгыы үөрдэллэр. Ол курдук, Владивостокка ыытыллан түмүктэммит Дальнай Восток федеральнай уокурук 18-гар диэри саастаахтарга күрэхтэһиитигэр Саха сириттэн биэс уол кытынна.

Түмүккэ Родион Степанов 55 киилэҕэ тэҥнээҕин булбата, күрэхтэһии кыайыылааҕынан буолла. Кини утарылаһааччыларын эрэллээхтик кыайталаата. Ол курдук, Приморье, Забайкалье уолаттарын ыраастык уурталаата, финалга Ордоян диэн Хабаровскай бөҕөһүн 8:0 ахсаанынан хотон бастаата.

Родион бэйэтэ Алдан оройуонун Хатыыстыырыттан төрүттээх. Сааһа 16-та. Олимпийскай эрэл училищетыгар кэлиэн иннинэ Чурапчыга, чопчулаан эттэххэ, Төлөйгө, тренер Александр Николаевич Кузьмиҥҥа эрчиллибитэ. Бу иннинээҕи көрдөрүүтүн туһунан эттэххэ, Саҥа дьыл иннинэ, Сургукка ыытыллыбыт Россиятааҕы күрэхтэһиигэ үһүс миэстэни ылбыта.

Күрэхтэһиибитигэр төнүннэххэ, атын уолаттартан Артур Пинигин 51 киилэҕэ иккис, Андрей Слепцов 110 киилэҕэ үһүс бириистээх миэстэлэри ыллылар. Итинэн уолаттарбыт бэйэлэрин саастыылаахтарыгар Россия күрэхтэһиитигэр кыттар быраабы ыллылар.

Бу тустуук уолаттар – тренердэр К.И. Павлов, М.М. Матвеев, Р.И. Аджи салалталарынан, Р.М. Дмитриев аатынан Олимпийскай эрэл училищетыгар дьарыктаналлар.

“Дьулурҕан”.   

Добавить комментарий

Ваш адрес email не будет опубликован. Обязательные поля помечены *