Рим-2020: Ньургун Скрябин финалга таҕыста!

Дьэ, Европа көҥүл тустууга чемпионата биһиги туспукутугар үчүгэйдик саҕаланна. Бэҕэһээ, соҕотох кыттыбыт тустуукпут – Ньургун Скрябин (65 кг) тахсыылаах тустуутунан биир дойдулаахтарын сүрдээҕин үөртэ да, сэргэхситтэ даҕаны.

Бастаан кини 23-гэр диэри саастаахтарга аан дойду түһүлгэтин призера молдованин Сакулцаны иккис түһүмэххэ миэлиҥсэлээн түһэрэн баран, салгыы ыраастык кыайда.

Онтон аан дойду былырыыҥҥы чемпионатын боруонса призера, этэргэ дылы, Токиотааҕы Олимпиадаҕа кыттар билиэтин номнуо сиэбигэр укта сылдьар Исмаил Мусукаевы (Венгрия), эмиэ хапсыһыы иккис түһүмэҕэр охторон түһэрэн баран, устунан “кириэс” диэн албаска киллэрэн, хаста да эргитэн, очукуонан ыраастык хотто (12:1). Оттон финалга тахсар иһин киирсиигэ Яшар Догу мемориалын быйылгы кыайыылааҕа, эдэр талааннаах тустуук Рахимзадены (Азербайджан) 5:1 ахсаанынан баһыйа тутан, финалга таҕыста. Онно, соторутааҕыта Красноярскайга Иван Ярыгин аатынан норуоттар икки ардыларынааҕы Гран-при турнирга кыайыылааҕынан тахсыбыт дагестанец Курбан Шираевы кытта тустуоҕа. Хайалара кыайбыта – 2020, олимпийскай сыл Европа чемпионунан буолуоҕа. Уолбутугар кыайыыны баҕарабыт!

Кылаабынайа, уоскуйан хаалбакка, ылбыт тэтимин ыһыктыбакка эр санаалаахтык, тустууну наар бэйэтэ күөттээн ыыттаҕына – кыайыаҕа. Ньургун ууну-уоту ааспыт, улахан үөрүйэхтээх тустуук. Онон биһиги киниэхэ эрэнэбит!

Аны бүгүн, олунньу 15 күнүгэр икки уолбут: Владимир Егоров уонна Николай Охлопков (иккиэн 61 кг) чемпионаты саҕалыыллар. Эрдэ, сайтпытыгр (http://dzulurgan.ru) суруйбуппут курдук, сэрэбиэй быһыытынан Егоров – Европа чемпиона Арсен Арутюняны (Армения), оттон Охлопков – аан дойду чемпиона Бека Ломтадзены (Грузия) кытта киирсиэхтэрэ. Кинилэр да дьоннор, икки илиилээхтэр, икки атахтаахтар. Онон уолаттарбыт киирсиэхтээхтэрэ диэн эрэллээхпит. Этэргэ дылы, бу күҥҥэ, бу чааска ким үчүгэй бэлэмнээх – ол кыайыаҕа. Уопсайынан даҕаны улахан түһүлгэ кэмигэ сахалыы сиэринэн салгыны хайыппакка сэмээр уолаттарбытыгар ыалдьабыт.

Бүгүн чемпионат биһиги бириэмэбитинэн, киэһээ 19 чаас 30 мүн. саҕаланар. Оттон финаллар түүн үөһүгэр буолаллара былааннанар.

Бүгүҥҥү финаллар:

57 кг: Азамат Тускаев (Россия) — Сулейман Атли (Турция)

65 кг: Курбан Шираев (Россия) — Ньургун Скрябин (Беларусь)

70 кг: Агагусейн Мустафаев (Азербайджан) — Магомедмурад Гаджиев (Польша)

79 кг: Магомед Рамазанов (Россия) — Магомедхабиб Кадимагомедов (Беларусь)

97 кг: Абдулрашид Садулаев (Россия) — Альберт Саритов (Румыния).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *