Рим-2020: Ньургун Скрябин – Европа үрүҥ көмүс призера

Бу иннинэ Европа чемпионатыгар Ньургун иккитэ кыттан турар. 2016 сыллаахха Ригаҕа Россия сүүмэрдэммит хамаандатын аатыттан кыттан, табыллыбатаҕа, 61 кг тохсус буолбута. Иллэрээ сыл Каспийскайга, Беларусь аатыттан эмиэ ити ыйааһыҥҥа кыттан, боруонса мэтээл иһин тустууга кыл мүччү сабырыйтаран, бэһис миэстэлэммитэ. Оттон Европа чемпионатыгар үһүс кыттыытыгар үрүҥ көмүс мэтээли ылары ситистэ.  

Санатан эттэххэ, Ньургун бу чемпионакка маҥнай 23-гэр диэри саастаахтарга аан дойду күрэхтэһиитин призера молдован М.Сакулцаны ыраастык, аан дойду чемпионатын призера И.Мусукаевы (Венгрия) 12:1 ахсаанынан уонна финалга тахсар иһин киирсиигэ быйылгы Я.Догу турнирын кыайыылааҕа А.Рахимзадены (Азербайджан) 5:1 ахсаанынан кыайталаан, ыалдьааччылар сүргэлэрин көтөхпүтэ.

Оттон финалга эдэр талааннаах бөҕөс – ааспыт ыйга Красноярскайга, Иван Ярыгин аатынан норуоттар икки ардыларынааҕы турнир кыайыылааҕынан буолбут дагестанец Курбан Шираевка (Россия) сабырыйтаран, иккис миэстэҕэ таҕыста. Итиэннэ үрүҥ көмүс мэтээлинэн наҕараадаланна. Түгэнинэн туһанан, биһиэхэ, тустууну таптааччыларга бэйэтин сытыы киирсиитинэн сэргэх түгэннэри бэлэхтээбит Ньургун Скрябины уонна тус тренерэ Гаврил Игнатьевы бу көрдөрүүлэринэн эҕэрдэлээн кэбиһиэҕиҥ!

Биһиги уолбут кыттыбыт ыйааһыныгар финаллар кэнниттэн түмүк маннык буолла:1. Курбан Шираев (Россия), 2. Ньургун Скрябин (Беларусь), 3. Али Рахимзаде (Азербайджан), Ерик Арушанян (Украина), 5. Исмаил Мусукаев (Венгрия), Марван Йезза (Франция).

Манна сыһыары тутан эттэххэ, бүгүн Николай Охлопковпыт (61) салгыы тустар. Кини бэҕэһээ аан дойду чемпиона Бека Ломтадзеҕа (Грузия) хотторон баран, киһитэ финалга тахсыбытынан, “уоскутар” бөлөххө киирэн, молдован Л.Колеснигы кытта тустуоҕа. Бу хапсыһыыга хайалара кыайбыта азербайджанец И.Вализадены кытта чемпионат боруонса мэтээлин иһин киирсиэҕэ.

Онон Охлопковка эрэлбитин сүтэрбэппит. Мэтээл иһин киирсэр кыахтаах. Чемпионат салҕанар.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *