Рекордсмен бэтэрээн-мадьынылар

 

Атырдьах ыйын 21-22 күннэригэр Москва куоракка, Лефортоваҕа, ЦСКА спортивнай базатыгар пауэрлифтиҥҥэ WPF федерацията Аан дойду Кубогын күрэхтэһиитин тэрийэн ыытта.

Ыараханы көтөҕүүгэ Саха сириттэн бэтэрээн мадьынылар Антон Адамов, Александр Скрыбыкин ситиһиилээхтик кыттан, өрөгөй үөрүүтүн сахаларын дьонугар бэлэхтээтилэр.

Ол курдук, Александр Скрыбыкин бастакы холонуутугар 65-70 саастаахтарга тута 210 киилэни кыайа тутан, Россия спордун норуоттар икки ардыларынааҕы кылаастаах маастарын нуорматын толордо.

Иккис холонуутугар кини 220 киилэни өрө тардан, Аан дойду рекордун 20 (!) киилэнэн аһара түһэн, тупсаран чемпион үрдүк аатын эрэллээхтик ылла.

Оттон 60-65 саастаахтарга Антон Адамов ыараханы тардыы икки көрүҥэр Россия спордун маастарын нуорматын бигэргэтэн туран бастаата. Бэтэрээн – 220, 221 киилэлэри кыайа-хото тутта уонна бэйэтин саастыылаахтарын рекордун тупсарда.

Аан дойду Кубогын түһүлгэтин саха бэтэрээннэрэ дьоһун кыттыыларынан киэргэттилэр, элбэх ахсааннаах кыттааччылар билиниилэрин, убаастабылларын уонна эҕэрдэлэрин туттулар.

Бу элбэх эрчиллии, үлэ түмүгэ буоларын бары өйдүүбүт. Кинилэри бэтэрээннэр диэн туораппакка, бэйэтин билиитин-көрүүтүн үллэстэн эрчийбит тренер Журин Виктор Германовичка мадьыны-бэтэрээннэр махталлара улахан.

“Дьулурҕан”.

Добавить комментарий

Ваш адрес email не будет опубликован. Обязательные поля помечены *