Рей Хигучины көрүөхпүт, сыаналыахпыт

Балаҕан ыйын 6-8 күннэригэр Дьокуускайга – ССРС, РСФСР, Саха АССР үтүөлээх тренерэ Дмитрий Петрович Коркин кэриэһигэр көҥүл тустууга норуоттар икки ардыларынааҕы XI турнир ыытыллаары турар. Быйылгы түһүлгэ улуу тренер төрөөбүтэ 90 сылыгар ананар. Турнир бириискэ фондата хаһааҥҥытааҕар даҕаны улахан – 180 тыһ. долларга тэҥнэһэр. Ол курдук, кыайыылаах – 7, иккис миэстэлээх 5, үһүстээх – 3 тыһ. долларынан наҕараадаланыа.

Дьэ, маннык улахан бириистээх түһүлгэҕэ бүгүҥҥү туругунан 26 дойду бөҕөстөрө кытталларын биллэрдилэр. Кинилэр ортолоругар Франк Чамизо (Италия), Рей Хигучи (Япония), Селим Яшар (Турция), Ихтиор Новрузов (Узбекистан), Комейл Гасеми (Иран), Ибрагим Саидов (Белоруссия), Габор Хатош (Венгрия) курдук олимпийскай призердар бааллар.

Япония тустууга федерациятын эппиэттээх үлэһитэ Икуо Хигучи иһитиннэрбитинэн, Коркин турнирыгар – Рикута Араи (57 кг), Рей Хигучи (65 кг), Кен Хосака (74 кг), Ноая Акагума (97 кг) кыттыахтара. Икуо этэринэн, Араи – эдэр, кэскиллээх тустуук, кыраныысса таһыгар бастакы холонуута, Хосака уонна Акагума бэс ыйыгар Токиоҕа ыытыллыбыт Император кубогар бэйэлэрин ыйааһыннарыгар бастаабыттар, оттон Хигучи иккис миэстэни ылбыт.

Хамаанданы Лондоннааҕы-2012 Олимпиада боруонса призера Шиничи Юмото тренер быһыытынан салайан илдьэ кэлэр эбит. Манна сыһыары тутан эттэххэ, кини 2014 сыллаахха Коркин турнирыгар 57 киилэҕэ Виктор Рассадин кэнниттэн иккис миэстэлэммитэ.

Тустууну сэҥээрээччилэр болҕомтолорун 22 саастаах Рей Хигучига хатыахтара дии саныыбын. Кини, 2016 сыллаахха Олимпиада иннинэ аҕай киэҥ эйгэҕэ биллибитэ – Астанаҕа ыытыллыбыт Азия континенын Олимпийскай оонньууларга сүүмэрдиир түһүлгэтигэр итиэннэ Македонияҕа (“Македонскай бисер”), Польшаҕа (В.Циолковскай мемориалыгар) тэҥнээҕин булбакка, 57 киилэҕэ Япония олимпийскай хамаандатын састаабыгар ылыллыбыта.

Билэргит курдук, Рио көбүөрүгэр Хигучи – Янг Куонг Илы (КНДР) 12:2, А.Лачиновы (Белоруссия) 10:0, Й.Боннены (Куба) 8:4, Х.Рахимины (Иран) 10:5 ахсааннарынан итэҕэтиилээхтик кыайталаан баран, финалга В.Хинчегашвилига (Грузия) 3:4 ахсаанынан сабырыйтаран, үрүҥ көмүс мэтээл хаһаайынынан буолбута.

Бу иннинэ улахан таһымҥа туста илик бөҕөс диэтэххэ, аан дойду чемпионнарын (Янг Куонг Ил, Рахими) уонна призерун (Бонне) илиилээх-атахтаах оҥортообокко, көрөөччүлэр улахан биһирэбиллэрин ылбыта. Өссө Хинчегашвилилыын тэбис-тэҥҥэ тустубута, опыта эрэ суоҕунан сабырыйтарбыта.

Эһиилигэр, ол аата, 2017 сыллаахха Красноярскайдааҕы И.Ярыгин аатынан турнирга 61 кг ыйааһыҥҥа боруонса мэтээлгэ тиксибитэ. Итиннэ бастакы эргииргэ Г.Рашидовка кыранан баһыйтаран баран, уоскутар бөлөххө киирэн кылгас кэм иһигэр утуу-субуу американец К.Бреверы, биһиги Нь.Скрябиммытын, Б.Гойгереевы уонна Б.Батоевы очукуонан ыраастык кыайталаабыта. Сүрүннээн, утарсааччыларын булгу сөрөөн түһэрэн баран, атахтарын кыаһалыы тутан, тустуу эйгэтигэр “кириэс” диэн ааттанар албаһынан эргитэлээбитин илэ харахпынан көрбүтүм.

Ити сыл сааһыгар Индия киин куоратыгар – Делигэ Азия чемпионатыгар Кытай, Индия бөҕөстөрүн кыайталаан баран, финалга тахсар иһин киирсиигэ соһуччу Хотугу Корея  уолугар – Ким Хан Соҥҥа ыраастык хотторон кэбиһэн, боруонса мэтээлинэн дуоһуйбута.

Кыһын Япония чемпионатыгар иккис буолбута.

Оттон быйыл биһиги билэрбитинэн, ити үөһэ ахтыллыбытын курдук, бэс ыйыгар Император кубогар 65 киилэҕэ Токуто Отогуро кэнниттэн иккис буолбута.

Онон ырытан көрдөххө, Рей Хигучи – Япония сүүмэрдэммит хамаандатын састаабыгар иккис сылын киирбэккэ – Азия, аан дойду чемпионаттарын көтүтэргэ күһэллибитэ. Ханныгын да иһин, кини урукку чөлүгэр киирбэккэ, эбиитин биирдии сылынан ыйааһынын үрдэтэн, бэйэтин тустуутун булбакка сылдьар диэн сылыктыахха сөп. Били, Риотааҕы Олимпиадаҕа кэлэн биллиилээхтэри түҥнэритэ көтүтэлээбит Хигучи буолбатах. Ол да буоллар, кини 2020 сылга бэйэтин дойдутугар ыытыллар Олимпийскай оонньууларга кыттарга сыалланан-соруктанан бэлэмнэнэ сылдьара сэрэйиллэр. Ылан көрдөххө, билигин Рей Хигучи – Япония  хамаандатыгар Токуро Отогуро уонна Дайчи Такатани кэннилэриттэн 65 киилэҕэ үһүс киһинэн сылдьар.

Коркин турнирыгар туһулаан, Рей от ыйыгар Дагестаҥҥа икки нэдиэлэ эрчилиннэ. Ол түмүгэ хайдах буоларын биһиги, Коркин турнирыгар илэ харахпытынан көрүөхпүт.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *