Рейтиннээх турнирдар түмүктэннилэр

Бэҕэһээ, албан аатырбыт Александр Медведь 81 сааһын туолбут төрөөбүт күнүгэр Минскэйгэ кини бирииһигэр көҥүл тустууга норуоттар икки ардыларынааҕы Гран-при турнир ыытыллан түмүктэннэ. Россия бөҕөстөрүттэн бу турнирга Муслим Садулаев (57 кг), Зелимхан Абакаров (61 кг) уонна Давид Баев (70 кг) бастаатылар.

Оттон саха тустууга оскуолатыттан, бу иннинэ иһитиннэрбиппит курдук, Владислав Андреев иккис, Владимир Егоров уонна Ньургун Скрябин үһүс миэстэлэри ылбыттара.

Минскэйдээҕи, А.Медведь аатынан турнирынан – Тустуу аан дойдутааҕы түмсүүтүн (UWW) быйылгыттан саҥа тэрийбит рейтиннээх Гран-при турнирдара түмүктэннилэр. Аны сотору кэминэн “Иван Ярыгин”, “Вахтанг Балавадзе”, “Яшар Догу”, “Александр Медведь” турнирдарын түмүгүнэн UWW оҥорбут саҥа рейтинин кэтэһэбит. Эрдэ эппиттэрин курдук, ити рейтинг быһыытынан алтынньыга Будапештка буолар аан дойду чемпионатыгар бастыҥ көрдөрүүлээхтэри сэрэбиэйдээһин сеткатыгар үөһээ уонна аллараа бөлөхтөргө араартаан туруоруохтаахтар.

Тус санаабар, бу саҥа күрэхтэһии систиэмэтигэр хамаандалар улахан болҕомто уурбатылар. Билиҥҥи кэмҥэ, бүгүҥҥү күҥҥэ аан дойду күүстээх бөҕөстөрө бу турнирдарга көхтөөх соҕустук кыттыбатылар.

Медведь турнира бүттэ, аны бу нэдиэлэ бүтүүтэ Кемерово куоракка “Шахтерская слава” үгэскэ кубулуйбут норуоттар икки ардыларынааҕы турниры кэтэһэбит. Онно саха бөҕөстөрө эмиэ кыттыахтаахтар.

Александр Медведь турнирын үһүс күнүн түмүгэ:

61 кг: 1. Зелимхан Абакаров (Россия), 2. Джозеф Колон (АХШ), 3. Реджеп Топал (Турция) уонна Николас Мегалудис (АХШ).

70 кг: 1. Давид Баев (Россия), 2. Агагусейн Мустафаев (Азербайджан), 3. Андрей Квятковскай (Украина) уонна Муртазали Муслимов (Азербайджан).

79 кг: 1. Алекс Диринджер (АХШ), 2. Довлетмурат Оразылыджов (Туркменистан), 3. Рустам Дадаев (Украина) уонна Гаджи Набиев (Россия).

92 кг: 1. Шариф Шарифов (Азербайджан), 2. Алихан Жабраилов (Россия), 3. Омаргаджи Магомедов (Беларусь) уонна Магомед Курбанов (Россия).

125 кг: 1. Джамалудин Магомедов (Азербайджан), 2. Живей Денг (Кытай), 3. Ибрагим Саидов (Беларусь) уонна Саид Гамидов (Россия).

Добавить комментарий

Ваш адрес email не будет опубликован.