Прокопий Иванов: “Оҕо тустуута өйөбүлү эрэйэр”


Олунньу 16-17 күннэригэр Благовещенскай куоракка 2002-2004 сс. төрөөбүт уолаттар көҥүл тустууга Дальнай Восток федеральнай уокуругар биирдиилээн бастыыр иһин күрэхтэһиилэрэ ыытыллан түмүктэннэ. Бу күрэхтэһиигэ Саха сирин хамаандата 5 кыһыл көмүс, 7 үрүҥ көмүс, 8 боруонса мэтээли ылан, эриэ-дэхси көрдөрүүлэннэ. Онон уопсайа 25 бөҕөспүт Россия финалыгар кыттар быраабы ылла.

Күрэхтэһии түмүгүн туһунан Саха Республикатын көҥүл тустууга уолаттарга сүүмэрдэммит хамаандатын кылаабынай тренерэ Прокопий Семенович Иванов dzulurgan.ru сайтка маннык билиһиннэрэр.

-Быйыл Дальнай Восток федеральнай уокуругар Бурятия Республиката киллэриллэн, буолан ааспыт күрэхтэһиигэ улахан илин былдьаһыы буолла. Биирдиилээн уолаттары эттэххэ, Стас Свинобоев (бастакы тренерэ Николай Прокопьевич Сивцев) утарсааччыларын барыларын, ол иһигэр финалга 10:0 ахсаанынан кыайталаата. Айсен Алексеев (бастакы тренерэ Николай Николаевич Филиппов) эмиэ үчүгэй тустууну көрдөрдө, утуу-субуу биэс буряты хотто. Эльшад Агаев (бастакы тренерэ Виктор Афанасьевич Соловьев) эчэйии кэнниттэн чөлүгэр киирэн, сэргэхтик туһунна, биэстэ кыайда.

48 киилэҕэ Эдьигээнтэн кэлэн эрчиллэ сылдьар Витя Яковлев (бастакы тренерэ Николай Николаевич Филиппов) эмиэ үчүгэйдик киирсэн, тыҥааһыннаах хапсыһыыга кыайталаата. Кини бу бастакы ситиһиитэ. Ыарахан ыйааһыҥҥа киһини сүрдээҕин үөрдэр көрдөрүүнү Даниил Иванов (бастакы тренерэ Анатолий Анатольевич Петров) ситистэ, кини утарсааччыларын эрэллээхтик кыайда. Бу иннинэ Казахстаҥҥа буолбут күрэхтэһиигэ Даниил эмиэ ситиһиилээхтик кыттыбыта.

Үбүлээһин туһунан эттэххэ, бу күрэхтэһиигэ бэлэмнэнэн, СР үтүөлээх тренерэ И.С. Кочкин бирииһигэр бастаабыт оҕолор бары сүрүн састаапка киирбиттэрэ. Кинилэртэн 14 уолу уонна биир тренери, икки судьуйаны Оҕо спордун республикатааҕы управлениета (дириэктэр В.И. Егоров) толору үбүлээтэ. Кэлии-барыы аллараанан, массыынанан биирдии суукка айанныы сырыттыбыт.

Буряттары кытта тыҥааһыннаах киирсии буолла. Күрэхтэһии састаап өттүнэнулаатта, күүһүрдэ. Уолаттар тустар настройдара уларыйда, бу иннинэ Дальнай Востокка хаардыы хаамар эбит буоллахпытына, билиги дьиҥнээхтик тустан, хара көлөһүҥҥүн тоҕон баран кыайаҕын, буряттар урут-уруккуттан мөлтөх буолбатахтар. Онон билигин урукку биһиги, сэбиэскэй саҕанааҕы кэммит курдук – күүстээх уокурук буолбут.

Аны муус устар 25-27 күннэригэр Иркутскайга Россия күрэхтэһиитин финала ыытыллар. Бу куоракка икки сыллааҕыта маннык күрэхтэһиигэ биһиги хамаандабыт биир чемпионнаах, биэс призердаах кэлбиппит. Быйыл да ситиһиилээхтик кыттарга суоттанабыт. Онуоха сөптөөх бэлэмнэнии наада. Бастыҥ оҕолорбутун Дагестан – Хасовюрт уонна Махачкала куораттарыгар илдьэн икки нэдиэлэлээх сборга кыттар баҕалаахпыт. Ол барыта болҕомтоттон, үптэн-харчыттан тутулуктаах. Билиэппитин бэйэбит харчыбытынан номнуо ылбыппыт. Онон бу күннэргэ үбүлээһиҥҥэ көмө көрдүүбүт.

Биирдиилээн оскуолалары ахтыахха наада. Ол курдук, бу буолан ааспыт Дальнай Восток күрэхтэһиитигэр ДЮСШ-3 көрдөрүүтэ үчүгэй. Бу оскуола иитиллээччилэрэ Витя Яковлев, Айсен Алексеев, Эльшад Агаев билигин Олимпийскай эрэл училищетыгар үөрэнэ сылдьаллар. Онон уопсай түмүккэ ОЭУ-тан түөрт, ДЮСШ-3 биир чемпион баар.

Көстөрүн курдук, сүрүн састаап – Олимпийскай эрэл училищетыгар үөрэнэр уолаттар. Биир улахан кыһалҕабыт диэн, училищеҕа бэриллэр оҕо аһылыга ирдэбилгэ эппиэттээбэт. Аһылыкпыт боппуруоһа ыарахан. Рацион эҥин кэҥиирэ буоллар, киһи куттаммакка эрэ оҕоҕо ноҕурууска биэриэ этэ. Онон ыксаан, балаһыанньаттан тахсан субуота, баскыһыанньа күннэргэ оҕолору ыалларыгар, эбэтэр тренердэр бэйэбит дьиэбитигэр таһаарабыт. Тото-хана дьиэ аһынан аһаатаары. Онон манна туһааннаах тэрилтэлэр, Спорт министиэристибэтин өттүттэн үлэ күүскэ барара буоллар, спортсмен оҕолор аһылыктарын боппуруоһугар.

Үбүлээһин боппуруоһа хаһан баҕарар ыарахан. Онно син биир тохтуубун. Холобур, ааспыт сайын биир да уопсай тэрээһин, сбор, лааҕыр үлэтэ ыытыллыбата. Чэ, ону ол диэбэккэ, тренердэр үлэлээтибит. Бэйэбит эдэр тустууктары ОЭУ, ДЮСШ-3 саалаларыгар мунньан, таһыттан сылдьан эрчиллиини тэрийбиппит. Түмүктээн эттэххэ, туох баар барыыга-кэлиигэ республика тренердэрэ – харчы, спонсор булуутугар, араас тэрээһиннэргэ кыһамньылаахтык үлэлии сатыыллар. Онон тренердэри үлэлээбэттэр диир сыыһа. Туох баалларынан, кыахтарынан хамсаныы бөҕөтүн оҥороллор. Онон оҕо тренердэрин эҕэрдэлиибин! Үп-харчы суох диэн ыһыктан кэбиспэккэ, санааҕытын түһэрбэккэ, үлэлээбиккит курдук үлэлии сылдьаргытыгар баҕарабын!

Сбордар тустарынан санаттахха, оҕо тустуутугар сүрүн үлэни Р.М. Дмитриев аатынан Олимпийскай эрэл училищета (дириэктэр А.А. Филиппов, кини солбуйааччыта А.С. Контоев) бэйэтинэн өйөөн, көмөлөһөн үлэни ыытар. Чурапчыга эмиэ эрчиллэр тэрээһиннэри ыытааччыбыт. Онуоха дириэктэр Н.Н. Гуляевка, Е.Д. Аржаковка улахан махтал. Ити курдук, үп-харчы кырыымчык кэмигэр кинилэр биһиэхэ күүс-көмө, өйөбүл буолалларын, көрдөһүүнү быһа гыммакка үлэлэһэллэрин иһин ис сүрэхтэн махтал!

Күрэхтэһии түмүк көрдөрүүтэ:

42 кг.
1. Сультимов Бато (Заб.кыраай)
2. Заболоцкай Николай (Саха сирэ)
3. Жапов Зорикто (Бурятия), 3. Черный Евгений (Хабаровскай).

45 кг.
1. Баяндуев Баир (Бурятия)
2. Максимов Дьулустаан (Саха сирэ)
3. Собакин Сергей, 3. Бурнашев Валентин (иккиэн – Саха сирэ).

48 кг.
1. Яковлев Виктор (Саха сирэ)
2. Кубанычбек Уулу Евгений (Саха сирэ)
3. Давыдов Иван, 3. Анисимов Юрий (иккиэн – Саха сирэ).

51 кг.
1. Алексеев Айсен (Саха сирэ)
2. Баяндуев Жаргал (Бурятия)
3. Нимаев Гуржап (Бурятия), 3. Ямадаев Амгалан (Заб.кыраай).

55 кг.
1. Цыренжапов Дамдин (Бурятия)
2. Алексеев Егор (Саха сирэ)
3. Дмитриев Афанасий, 3. Спиридонов Николай (иккиэн – Саха сирэ).

60 кг.
1. Агаев Эльшад (Саха сирэ)
2. Бояновскай Владимир (Саха сирэ)
3. Ринчинов Владимир, 3. Норбоев Беликто (иккиэн – Бурятия).

65 кг.
1. Свинобоев Станислав (Саха сирэ)
2. Упхоев Игорь (Бурятия)
3. Гармаев Сандан, 3. Дугаржапов Цырен (иккиэн – Бурятия).

71 кг.
1. Жигжитов Аюр (Бурятия)
2. Рахлецов Юрий (Заб. кыраай)
3. Акрамов Рустам (Амур уоб.), 3. Уйгуров Айтал (Саха сирэ).

80 кг.
1. Торбин Максим (Амур уоб.)
2. Чердонов Ренат (Саха сирэ)
3. Елбаскин Артур (Бурятия), 3. Дьяконов Артур (Саха сирэ).

92 кг.
1. Рекунов Егор (Бурятия)
2. Егоров Дмитрий (Бурятия)
3. Сафонов Елисей (Амур уоб.), 3. Щербинин Илья (Хабаровскай).

110 кг.
1. Иванов Даниил (Саха сирэ)
2. Рамазанов Мубарек (Саха сирэ)
3. Найданов Жаргал (Заб. кыраай), 3. Иванов Павел (Бурятия).

 Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *