Пресс-конференция Эдуард Григорьевка ананна

Аҕыйах хонуктааҕыта Европа көҥүл тустууга чемпионатыгар үһүс бириистээх миэстэҕэ тахсыбыт биир дойдулаахпыт Эдуард Григорьев дойдутугар кэлээтин кытта тута пресс-конференция тэрилиннэ.

Санатан эттэххэ, Польшаҕа, Европа көҥүл тустууга чемпионатаыгар биэс бөҕөспүт кыттыбыта. Кинилэртэн, Польша чиэһин көмүскүүр Бүлүү ыччата, Чурапчы тустууга кыһатыгар чочуллубут Эдуард Григорьев 61 киилэҕэ Европа боруонса мэтээлин ылан, тустууну таптааччылары сэргэхситтэ.

Бу чемпионакка Эдуард Григорьев утуу-субуу румын Гуйдяны 12:2, француз Элояны 7:0, изральтянин Попову 11:0 ахсааннарынан кыайталаан баран, финалга тахсар иһин киирсиигэ россиянин Абасгаджи Магомедовка 2:4 ахсаанынан хотторон кэбиспитэ. Оттон үһүс бириистээх миэстэ иһин болгарин Георгий Вангеловтыын сүрдээх тыҥааһыннаахтык барбыт хапсыһыыга 4:2 ахсаанынан эрэллээхтик кыайбыта уонна чемпионат боруонса мэтээлинэн наҕараадаламмыта.

Пресс-конференцияҕа СР физическэй култуураҕа уонна спорка миниистирин бастакы солбуйааччы Леонид Спиридонов, Чурапчытааҕы Спорка бэлэмнэнии киинин салайааччыта Александр Андреев, Бүлүү улууһун баһылыга Сергей Винокуров – Европа чемпионатын боруонса призера Эдуард Григорьевка, кини бастакы тренерэ Роман Окоемовка харчынан бириэмийэҕэ сертификаттары, эҕэрдэ суруктары туттардылар.

Оттон олимпийскай чемпион Павел Пинигин Эдуард тустуутун туһунан дириҥ ис хоһоонноох ырытыы оҥордо:

Хапсыһыыларгын барытын сыныйан, үөрэтэн көрдүм. Барыта биэстэ тустан 36 баалы сүүйдүн, 8 баалы сүүйтэрдин. Бу үчүгэй көрдөрүү. Инникитин баал олох биэриэ суохтааххын. Улахан маастар оннук буолуохтаах. Боруонса иһин киирсиигэ грамотнайдык туһуннуҥ. Эдэргин, онон кэлэр Олимпиадаҕа сыаллаан-соруктаан дьарыктаныахтааххын. Билигин, Европа чемпионатын призера буолан баран, бэйэҕэр ирдэбилин өссө күүһүрүөхтээх. Мин эйиэхэ эрэнэбин, кытаат!, — диэн санаатын үллэһиннэ уонна наада буоллаҕына, көбүөргэ үлэтигэр көмөлөһөргө бэлэмин биллэрдэ.

Пресс-конференцияҕа Эдуард биир дойдулаахтара бүлүүлэр баһылыктарын кытта бииргэ анаан кэлбиттэрэ кэрэхсэбиллээх. Ол курдук, маннык бэлиэ түгэҥҥэ Бүлүү спорка тэрилтэтин салайааччыта Гаврил Евсеев, улуус депутата Алексей Степанов, Саха АССР, РСФСР үтүөлээх враһа Никита Матвеев, СР норуотун хаһаайыстыбатын үтүөлээх үлэһитэ Макар Маисов уо.д.а. кэпсэтиигэ кыттан, бэйэлэрин уолларын эҕэрдэлээтилэр, ситиһиилэри баҕардылар. Итиэннэ, үрдүкү салалталар Эдуард Григорьевка, дьиэ-уот боппуруоһугар күүс-көмө буолалларыгар санааларын быктардылар.

Түмүктээн эттэххэ, бу ситиһии улахан үлэттэн таҕыста. Эдуард үс ыйы быһа Польшаҕа дьарыктанан, онно өссө эбии Европа чемпионатын иннинэ тус тренерэ Данил Неустроев бэйэтин иитиллээччилэрин Быйаман Яковлевы, Константин Власовы кытта тиийэннэр, кини бэлэмнэнэригэр күүс-көмө буолбуттара. Онон кинилэр бу мэтээлгэ эмиэ сыһыаннаахтар дии саныыбын. Кырдьык, пресс-коференцияҕа этиллибитинэн, Эдуард Григорьев тустуук быһыытынан буһан-хатан тахсыытыгар төрөөбүт Бүлүүтэ, үөрэммит Чурапчыта, Чурапчытааҕы физическэй култуура уонна спорт института уонна кинини өрүү өйүүр спонсордар күүс-көмө буолаллар. Эдуард кинилэргэ ис сүрэҕиттэн махталын биллэрдэ.

Соторутааҕыта аҕай, Станислав Свинобоев Россия эдэрдэргэ күрэхтэһиитин кыайыылааҕа буолан кэлбитигэр эмиэ пресс-конференция тэриллибитэ. Маннык, саха тустуутугар үтүө түгэннэр, кыайыылар-хотуулар үтүө үгэскэ кубулуйан салгыы кэлэн иһэллэригэр баҕарыаҕыҥ.

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *