Петр Федоров: «Италия хамаандатыгар уонна “Милаҥҥа” ыалдьыбытым ыраатта»

«Дьулурҕан» хаһыат сайтыгар ыытыллыбыт Евро-2020 куонкурсун кыайыылааҕа Петр Федоровка уталыппакка бүгүн, Бүтүн Россиятааҕы ГТО физкультурнай-спортивнай комплексын Саха сиринээҕи киинин салайааччыта, Н.Н. Тарскай аатынан «Туймаада» стадион дириэктэрэ Александр Брызгалов эҕэрдэлээн туран, бириис быһыытынан – сыл устата кэлэн эрчиллэригэр босхо анал абонемент туттарда.

Оттон мин, олохсуйбут үгэскэ олоҕуран, кыайыылаахтан кылгас интервью ыллым.

Петр, куонкурус кыайыылааҕа буолбуккунан эҕэрдэлиибин! Куонкурус ыытылларын туһунан хантан билбиккиний?

-Махтал! Куонкурус биллэриллибитин мин ватсаапка көҥүл тустуу группатыттан билбитим. Итиэннэ ыйытыыларга хоруйдаан, бэйэм сылыктааһыннарбын суруйан ыыппытым.

Баһаалыста бэйэҥ тускунан кылгастык билиһиннэриэҥ дуо?

-Мин Чурапчыга төрөөбүтүм, Чурапчыга оскуоланы бүтэрбитим. Үлэбин-хамнаспын Чурапчыга саҕалаабытым. Дьоннорум диэтэххэ, аҕам спортивнай оскуолаҕа үлэлээбитэ, спорт уонна физкультура үтүөлээх үлэһитэ. Федоров Николай Петрович диэн. Оттон ийэм үтүөлээх учуутал. Бэйэм билигин куоракка олоробун, «Сахаэнерго» тэрилтэҕэ юриһынан үлэлиибин.

Тоҕо хара бастакыттан, өссө чемпионат саҕалана илигиттэн, Италия хамаандата бастыа диэбиккиний?

-Мин Италияны талбытым диэн, урут-уруккуттан быһа, өссө 1993 сылтан ыла, «Милаҥҥа» Барези, Альбертини, Донадони, Тассотти оонньуулларын саҕаттан сөбүлээн көрөбүн. 1994 сыллаахха аан дойду чемпионатыгар Роберто Баджо пенальтины сыыһа тэппитигэр, ол да инниттэн киниэхэ уонна Италия хамаандатыгар ыалдьабын.

Италияҕа күүлэйдии бара сылдьыбытым, балтыбын кытта. Онно «Миланскай дербини» көрүөхпүн баҕарбытым. Ол эрээри, билиэт эрдэ бүтэн хаалбыт этэ. Ол иһин стадион таһыгар фан-зонаҕа сылдьан, бэйэм дьоммун, «миланнары» кытта бииргэ ыалдьан, спорт-барга көрбүппүт. «Милан» билигин үчүгэй, иккис миэстэни ылла.

Куонкурус тэриллиитин туһунан бэйэҥ санаан?

-Маннык куонкурус тэриллэрэ үчүгэй бөҕө буоллаҕа дии. Билигин арааһынай букмекерскай хонтуоралар баар буолан, прогноз оҥорооччу сүрдээх элбэх. Актуальнай. Ханнык баҕарар киһи бэйэтэ тус санаалаах. Ордук фанаттар, футболу көтүппэккэ көрөр дьоннор. Уонна уопсайынан биһиги, сахалар спорка сыстаҕас дьон буоллахпыт. Мин бэйэм Чурапчыбын, ол иһин туох баар спорт көрүҥүн барытын кэтээн-манаан көрөбүн.

-Бэйэҥ спордунан дьарыктаммытыҥ дуо?

-Мин улахан спортсмен буолбатахпын. Оҕо сылдьан, оскуоланы бүтэрэр сылбар национальнай көрүҥнэргэ спартакиадаҕа мас тардыһыытыгар бэйэм ыйааһыммар чемпионнаабытым. Ол кэнниттэн улуус иһигэр кыратык хары баттаспытым уонна мас тардыспытым.

Футболу биир ыйы быһа көтүппэккэ көрдүм. Ыарахан ый ааста диэххэ сөп, үчүгэйдик, тото-хана утуйбакка хайаабакка. Киһи олоҕор интэриэстээх буолуохтаах. Туох да интэриэһэ суох, олоҕу таах мээнэ олорор буоллахха, үүнээйи курдук буолаҕын. Мин, үлэм таһынан интэриэһим диэн – футбол уонна булт.

Дьэ, футболбутугар төннүөххэ, финалга. Оонньуу саҕаламмыта иккис мүнүүтэтигэр итальянецтар гол киллэттэрбиттэригэр эн көрө олорон тугу санаабыккыный?

-Итиннэ буоллаҕына, бастаан, оонньуу саҕаланыытыгар киллэттэрбиттэригэр төттөрүтүн наҕыл, холку этим. Тоҕо диэтэргин, оонньуу бүтэһигэр киллэттэрэр ыарахан. Тэҥнииргэр, эбэтэр ситэргэр бириэмэ суох буоллаҕа дии. Холобур, 0:0 оонньуу сылдьан, бүтэһик мүнүүтэлэргэ киллэрбиттэрэ эбитэ буоллар, бүтэрэллэр эбит, англиялар. Иккис таймҥа Италия наар атаакалаан тахсыбыта дии. Син биир ахсааны тэҥниэхтээхтэр, туох баалларынан-суохтарынан түһүөхтээхтэр дии санаабытым. Белотти («Торино») пенальтины сыыспытыгар дьэ ыксаабытым. Бүттүбүт быһыылаах диэбитим. Ону баара, анараа дьон сыыһа тэбиэлээн кэбистилэр. Уонна вратарьбыт Доннарумма үчүгэйдик турда, икки тэбиини тутта.

Петр, куонкуруска кыттыбыт атын дьоҥҥо тугу этиэҥ этэй?

-Маннык куонкурустарга туора турбакка, кыттан иһиэххэ наада. Уонна итинник прогноз оҥорор буоллахха, итиэннэ наар кыттар буоллахха, син биир хаһан эмэ кыайыахха сөп.

Махтал! Өссө да «Дьулурҕан» ыытар куонкурустарыгар кыттар буол.

-Эһиэхэ уонна куонкурус спонсора Александр Брызгаловка улахан махтал!

Петр ПАВЛОВ.             

Добавить комментарий

Ваш адрес email не будет опубликован. Обязательные поля помечены *