Петр Ушницкай: «Дуобатчыттарбыт аан дойду чемпионатыгар»

 

Эстония – Таллинн куоратыгар 100 харахтаах дуобакка дьахталларга уонна эр дьоҥҥо аан дойду чемпионата ыытылла турар. Эрдэ иһитиннэрбиппит курдук, бу чемпионакка Россия хамаандатын аатыттан биһиги бастыҥ дуобатчыттарбыт Матрена Ноговицына уонна Николай Гермогенов кытталлар.

Чемпионат хаамыытын туһунан биһиги сайтпытыгар бу сырыыга республикатааҕы категориялаах судьуйа, үрдүк категориялаах педагог-тренер, гроссмейстер Петр Ушницкайтан билиһиннэрэригэр көрдөстүбүт:

Быйылгы, сүүс харахтаах дуобакка аан дойду чемпионата сүрдээх тыҥааһыннаахтык ыытылла турар – диир Петр Петрович. – Бу чемпионакка эр дьоҥҥо 40 киһи түөрт бөлөҕүнэн оонньооннор, саамай үчүгэй көрдөрүүлээхтэрэ финалга тахсан кытта сылдьаллар, 12 буоланнар.

Дьэ бу манна биһиги дуобатчыппыт Николай Гермогенов, билиҥҥи кэмҥэ аан дойду саамай биллэр-көстөр элбэх ситиһиилээх гроссмейстердарын кытта киирсэ сылдьар. Күрэхтэһии наһаа тыҥааһыннаахтык буола турар диэххэ наада. Финал бүтүүтэ балаһыанньа дьэ хайдах буолар? Мин саныахпар, хас да дуобатчыт тэбис-тэҥ очколаах тахсаллара буолуо. Уонна дьэ эбии кылгатыллыбыт бириэмэҕэ оонньоон, кыайыылааҕы быһаарсаллара буолуо дии саныыбын.

Дьахталларга биһиги Матрена Ноговицынабыт хара маҥнайгыттан олус тахсыылаахтык оонньуу сылдьар. Билиҥҥи туругунан соҕотоҕун лидердээн иһэр. Бүгүн Матрена – аан дойду икки төгүллээх чемпиона Наталья Садовскаяны (Польша) кытта оонньуохтаах. Бу оонньуу улахан оруоллаах. Манна биһиги гроссмейстербыт тэҥнэстэҕинэ даҕаны, бастыырыгар кыахтар бааллар курдук көрөбүн.

Аны дьахталларга өссө да 6 туур оонньонор, оттон эр дьон билигин өссө 7 тууру оонньууллара хаалла.

Петр ПАВЛОВ.

 

Добавить комментарий

Ваш адрес email не будет опубликован. Обязательные поля помечены *