Петр Копылов финалга таҕыста

Раменскайга ыытылла турар Россия эдэрдэргэ көҥүл тустууга биирдиилээн бастыыр иһин күһүҥҥү күрэхтэһиитигэр уолаттарбыт куһаҕана суохтук кытта сылдьаллар. Ол курдук, Петр Копылов бастакы, Алексей Данилов үһүс миэстэ иһин тустуохтара. Оттон Михаил Васильев, Уйгулан Иванов уонна Эдуард Максимов “уоскутар” бөлөххө киирэн, боруонса мэтээл иһин тустар кыахтаахтар.

57 кг ыйааһыҥҥа Петр Копылов утарсааччыларын кыайталаан финалга таҕыста. Ол курдук, кыайыылааҕы быһаарар бүтэһик хапсыһыыга кини Рахим Гурдалиевы (Адыгея) кытта киирсиэҕэ.

57 киилэҕэ “уоскутар” бөлөххө Михаил Васильев тувин Сайын-Белек Монгуштуун тустар. Онно кыайдаҕына бэйэтин киһитэ Уйгулан Ивановка тахсар. Ити хапсыһыы кыайыылааҕа дагестанец Даитбек Амирхановы кытта күрэхтэһии боруонса мэтээлин ким ыларын быһаарсыа.

65 киилэҕэ Алексей Данилов финалга тахсар иһин киирсиигэ хотторон, үһүс миэстэ иһин А.Кузнецов (Татарстан), М.Абдуллаев (Дагестан), А.Макоев (Москва) хапсыһыыларын кыайыылааҕын кытта көрсүөҕэ.

Ити курдук, саамай ыарахан ыйааһыҥҥа ў125 кг) кыттааччыбыт, Горнайтан төрүттээх Олимпийскай эрэл училищетын иитиллээччитэ Эдуард Максимов “уоскутар” бөлөххө осетин Азамат Хосоновы утары тахсыаҕа. Онно кыайдаҕына, чечен Магомед-Эми Мирискаевтыын, үһүс бириистээх миэстэни былдьаһыаҕа.

Күрэхтэһии бырагыраамата:

Сэтинньи 7 күнэ, сэрэдэ

11.00 – 57, 65, 74, 86, 97, 125 кг ыйааһыннарга барыллааһын уонна финалга тахсар иһин киирсиилэр.

Сэтинньи 8 күнэ, чэппиэр

11.00 – 61, 70, 79, 92 кг ыйааһыннарга барыллааһын уонна финалга тахсар иһин хапсыһыылар.

17.30 – 57, 65, 74, 86, 97, 125 кг ыйааһыннарга финаллар.

Сэтинньи 9 күнэ, бээтинсэ

12.00 – 61, 70, 79, 92 кг ыйааһыннарга финаллар.

PS: бырагыраамаҕа Москва бириэмэтэ ыйылла сылдьар!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *