Петр Копылов – турнир кыайыылааҕа

Бурятия киин куоратыгар Улан-Удэҕэ 21-гэр диэри саастаах бөҕөстөргө норуоттар икки ардыларынааҕы турнир ыытыллан түмүктэннэ. Бу түһүлгэ урут Бурятия аатырбыт бөҕөһө Борис Будаев аатын сүгэрэ. Оттон быйыл тоҕо эрэ кини аатынан ыытыллыбата, көннөрү – норуоттар икки ардыларынааҕы турнир быһыытынан ыытылынна.

Бу түһүлгэҕэ саха тустууга кыһатын иитиллээччилэрэ эриэ-дэхси көрдөрүүнү ситистилэр. Ол курдук, уолаттарга Россия, Европа, аан дойду күрэхтэһиитин кыайыылааҕа Петр Копылов (тренерэ Яков Филиппов) 57 киилэҕэ 56 кыттааччыттан тэҥнээҕин булбата. Кини бүтэһик быһаарыылаах киирсиигэ олохтоохтор эрэллэрэ Балдан Дондоковы илиилээх-атахтаах оҥорбото, хапсыһыы болдьоҕун иннинэ очукуонан ыраас кыайыыны ситистэ (10:0). Итинэн турнир кыайыылааҕынан буолла.

Бу ыйааһыҥҥа үһүс бириистээх миэстэ иһин киирсиигэ Россия уолаттарга күрэхтэһиитин призера буола сылдьыбыт Быйаман Яковлев (тренерэ А.Г. Макаров) бэйэтин киһитэ Дьулус Федотовы баһыйда.

Оттон иккис ыйааһыҥҥа (61 кг) Христофор Потапов иккис, Владислав Кривошапкин (иккиэннэрин тренерэ – Д.Р. Неустроев) үһүс миэстэлэри ыллылар.

Ыйааһыннарын бэрээдэгинэн турнир кыайыылаахтарынан буоллулар: 57 кг – Петр Копылов (Саха сирэ), 61 кг – Жаргал Доржиев, 65 кг – Бэликто Хайдапов (иккиэн — Бурятия), 70 кг – Кирилл Корнеев, 74 кг – Эртине Мортуй-Оол (иккиэн – Кемерово), 79 кг – Цэрэндаш Баасандорж (Монголия), 86 кг – Цырен Сультимов (Забайкальскай кыраай), 92 кг – Юрий Иванов (Иркутскай), 97 кг – Томорбат Монгоншагай, 125 кг – Монхтор Лхагвагэрэл (иккиэн – Монголия).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *