Петр Копылов – Сахаачча түһүлгэтин бастыҥ бөҕөһө

Бүгүн, олунньу 16 күнүгэр ССРС, РСФСР, Саха АССР үтүөлээх тренерэ Д.П. Коркин аатынан Тустуу саалатыгар номох буолбут бөҕөс Николай Захаров – Сахаачча кэриэһигэр Саха сирин 1999-2000 сс. төрөөбүт уолаттарга биирдиилээн бастыыр иһин күрэхтэһии ыытыллан түмүктэннэ. Көбүөргэ 9 хамаандаттан барыта 82 бөҕөс тахсан күөн көрүстэ. Ол курдук, Р.М. Дмитриев аатынан Олимпийскай эрэл училищетыттан, В.П. Керемясов аатынан куорат 3 №-дээх спортивнай оскуолатыттан, М.К. Аммосов аатынан Хотугулуу Илиҥҥи федеральнай университеттан, Тыа хаһаайыстыбатын государственнай академиятыттан, Бүлүүттэн, Уус Алдантан, Сунтаартан, Чурапчытааҕы физическэй култуура уонна спорт институтуттан бөҕөстөр кытыннылар.

Бу күрэхтэһии – Саха Республикатын Спорка уонна физическэй култуураҕа министиэристибэтин, СР спортивнай тустууга федерациятын уонна Р.М. Дмитриев аатынан Олимпийскай эрэл училищетын көҕүлээһиннэринэн уонна тэрийииилэринэн төрдүс сылын ыытыллар. Итиэннэ бу дьыл кулун тутар 8-10 күннэригэр “Триумфка” буолар олимпийскай чемпион Роман Дмитриев аатынан үгэскэ кубулуйбут норуоттар икки ардыларынааҕы VII турнирга республика хамаандатын сүүмэрдиир сыаллаах-соруктаах.

Түһүлгэни үөрүүлээхтик аһыыга Р.М. Дмитриев аатынан Олимпийскай эрэллэри бэлэмниир училище дириэктэрэ, Ил Түмэн депутата Алексей Филиппов, Монреаллааҕы-76 Олимпиада үрүҥ көмүс призера, спорт үтүөлээх маастара Александр Иванов, Сахаачча төрөөбүт дойдутуттан Амма улууһун спорка кэмитиэтин бэрэссэдээтэлэ Эдуард Ефимов, Сахаачча бииргэ төрөөбүт балта Анна Новгородова – күрэхтэһии кыттыылаахтарын эҕэрдэлээтилэр, ким үчүгэй бэлэмнээх – ол кыайарыгар баҕардылар. Ону тэҥэ Эдуард Ефимов – Олимпийскай эрэл училищетыгар ситиһиилээхтик үлэлии сылдьар ССРС спордун норуоттар икки ардыларынааҕы кылаастаах маастара Артур Константинович Константиновка, Амма улууһун Бочуоттаах гражданина ааты туоһулуур анал бэлиэни уонна дастабырыанньаны туттарда.

Оттон Анна Семеновна Новгородова Амма орто оскуолатын “Саһарҕа” телестудията (салайааччы З.В. Пахомова) бэлэмнээн таһаарбыт Сахаачча туһунан документальнай киинэ диискэтин А.А. Филипповка, А.Н. Ивановка, Сахаачча баар-суох доҕоро Вячеслав Карповка, суруналыыс Платон Эверстовка уонна бу суруйуу ааптарыгар бэлэх быһыытынан туттартаан үөртэ.

Тустууга киирдэххэ, олимпиец Александр Иванов эппитин курдук, кыттааччы аҕыйах. Ордук, орто уонна ыарахан ыйааһыннарга кыттааччы кэмчи буолан, тустуу эргиир систиэмэтинэн ыытылынна. Онон, кыттааччы итэҕэс буолан – сэттэ мэтээл ситэри оонньоммото. Бу түгэн, спорт салайааччыларын уонна тренердэри инникитин толкуйдатыан наада.

Николай Иванов, Алексей Ефимов уонна Никита Хабаров син эмиэ былырыыҥҥы курдук, Сахаачча күрэхтэһиитин кыайыылаахтарын аатын өссө төгүл бастакы миэстэни ылан хааччыннылар. Биир бэйэм 16 саастаах Олег Фомин тустуутун сөбүлүү көрдүм. Кини бэйэтиттэн икки-үс сыл аҕа саастаах уолаттары кытта тэҥҥэ киирсэн, өссө бэйэлэрин саастыылаахтарыгар Россияҕа тиийэ балайда үрдүк көрдөрүүлээх Михаил Васильевы, Уйгулан Иванову кыайталаан, көрөөччүлэр биһирэбиллэрин ылла диэтэхпинэ сыыстарбатым буолуо.

Оттон тренер Яков Филиппов салалтатынан оҕо эрдэхтэриттэн бииргэ дьарыктанар Алексей Копылов уонна Айсиэн Винокуров финалга тахсан киирсиилэригэр, хапсыһыы бүтүүтэ ахсааны (1:1) кыл-мүччү тэҥнээн, быраабыла быһыытынан кыайыыны Винокуров ситиспитэ, тустууну сэҥээрээччилэргэ соһуччу соҕус буолла.

Күрэхтэһии түмүгүнэн көрдөххө – Константин Кузьмин, Петр Копылов, Айсиэн Винокуров, Константин Капрынов, Николай Иванов, Алексей Ефимов үчүгэй тустар таһымнарыгар сылдьар курдуктар уонна ыытыллаары турар Р.М. Дмитриев аатынан улахан түһүлгэҕэ биһиги эрэллэрбит буолаллар. Манна сыһыары тутан эттэххэ, Н.С. Захаров – Сахаачча кэриэһигэр республика уолаттарга күрэхтэһиитин бастыҥ бөҕөһүнэн – уолаттарга Россия, Европа, аан дойду түһүлгэлэрин кыайыылааҕынан буола сылдьыбыт Петр Копылов ааттанна. Ити курдук, бүгүҥҥү түһүлгэ кыайыылаахтара Константин Капрынов уонна Николай Иванов эмиэ анал бириистэринэн наҕараадаланнылар.

Күрэхтэһии түмүктэннэ. Аны чугастааҕы кэмҥэ Станислав Афанасьевич Захаров тренердээх Саха сирин эдэрдэргэ сүүмэрдэммит хамаандатын иннигэр дьаныардаах үөрэтэр-эрчийэр түмсүүлэр уонна олимпийскай чемпион Роман Дмитриев аатынан норуоттар икки ардыларынааҕы турнирга ситиһиилээхтик кыттар сыал-сорук турар. Эдэр бөҕөстөрбүтүгэр ситиһиилэри баҕарыаҕыҥ!

Күрэхтэһии түмүк көрдөрүүтэ:

54 кг (9 кыттааччы): 1. Константин Кузьмин (ОЭУ), 2. Дьулус Седалищев (Чурапчы-Бүлүү), 3. Степан Каратаев (Бүлүү), Андрей Сивцев (Чурапчы).

57 кг (18): 1. Петр Копылов (ОЭУ), 2. Олег Фомин, 3. Зафар Одинаев (иккиэн – Чурапчы), Уйгулан Иванов (ОЭУ).

61 кг (16): 1. Айсен Винокуров, 2. Алексей Копылов, 3. Василий Яковлев, Гаврил Макаров (бары – ОЭУ).

65 кг (13): 1. Константин Капрынов (Чурапчы), 2. Кайратбек Адылбек Уулу (ХИФУ), 3. Михаил Сергеев (ОЭУ), Алексей Данилов (Сунтаар).

70 кг (8): 1. Николай Иванов (ХИФУ), 2. Егор Захаров, 3. Юрий Протодьяконов (иккиэн – ОЭУ), Егор Герасимов (ДьТХГА).

74 кг (4): 1. Албан Аввакумов (ОЭУ), 2. Никита Софронов (ХИФУ), 3. Василий Кириллин (Чурапчы).

79 кг (2): 1. Василий Спиридонов (ОЭУ), 2. Айаал Павлов (Сунтаар).

86 кг (4): 1. Алексей Ефимов, 2. Алексей Мигалкин (иккиэн – ХИФУ), 3. Петр Захаров (Чурапчы).

92 кг (3): 1. Иван Алексеев (Чурапчы-Бүлүү), 2. Дьулус Борисов (ОЭУ).

97 кг (1): 1. Андрей Аронов (ОЭУ).

125 кг (4): 1. Никита Хабаров, 2. Эдуард Максимов (иккиэн – ОЭУ), 3. Иван Охлопков (Уус Алдан).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *