Оҕунан ытыыга онлайн-күрэхтэһииттэн алта мэтээл!

Россия оҕунан ытыыга федерациятын көҕүлээһининэн карантин кэмигэр оҕунан ытыыны салгыы сайыннарар, киэҥник тарҕатар туһуттан, спортсменнар таһымнарын намтаппат инниттэн итиэннэ дистанционнай күрэхтэһиини үөрэтэр көрөр сыалтан «Россия күнэ-2020» онлайнкүрэхтэһии тэрилиннэ.

Интернеккэ www.ianseo.net сайтка таһаарыллыбыт күрэхтэһии боротокуолуттан көрдөххө, манна барыта 94 спортсмен кыттыыны ылла. Ол курдук, Москва, Москва уобалаһа, Санкт-Петербург, Псковскай уобалас, ЯНАО, Калининградскай уобалас, Дагестан, Бурятия, Волгоградскай уобалас, Ставропольскай кыраай, Пермскэй кыраай, Калужскай уобалас, Краснодарскай кыраай, Ярославскай уобалас, Забайкальскай кыраай, Саха сирин, Севастополь уонна Казахстан охчуттара илин-кэлин түһүстүлэр.

Күрэхтэһии, коронавирус дьаҥын кэмигэр дьиэҕэ олоруу режимин кэспэккэ эрэ, туох баар ирдэбиллэри барытын тутуһан туран ыытылынна. Классическай уонна блочнай охторунан ытыыга түөрт бөлөххө кыайыылаахтар быһаарылыннылар. Кинилэр уонна иккис-үһүс миэстэлээхтэр туһааннаах мэтээллэринэн, дипломнарынан наҕараадаланнылар.

Саха сирин охчуттара эриэ-дэхси көрдөрүүнү ситистилэр диэххэ сөп. Ол курдук, эр дьоҥҥо классическай оҕунан ытыыга – Р.М. Дмитриев аатынан Олимпийскай эрэл училищетыгар үөрэнэр 23 саастаах спорт маастара Михаил Симушин (тренерэ — А.М. Филатов) кыайыылааҕынан таҕыста. Ити курдук, ытыы бу көрүҥэр дьахталларга спорт маастара Розалина Тимофеева (тренерэ — А.Н. Тимофеев) эмиэ бастакы миэстэни ситистэ. Норуоттар икки ардыларынааҕы кылаастаах спорт маастара Кристина Устинова иккис көрдөрүүлэннэ. Маастарга кандидат Айыына Романова үһүс буолла. Онон дьахталларга классическай оҕунан ытыыга үс бастакы миэстэни Саха сирин охчуттара ыллылар. Дьахталларга блочнай оҕунан ытыыга спорт үтүөлээх маастара Степанида Артахинова үһүс бириистээх миэстэҕэ тигистэ. Оттон 17 саастаах маастарга кандидат Аина Павлова 18 миэтэрэттэн классическай оҕунан ытыыга үһүс буолла.

//Оҕунан ытыыга Саха сирин инники эрэлэ Михаил Симушин.

Онлайн-күрэхтэһии түмүк көрдөрүүтэ:

Эр дьоҥҥо классическай оҕунан ытыыга: 1. Михаил Симушин (Саха сирэ), 2. Иван Кузнецов (Москва), 3. Санжи Халудоров (Бурятия).

Дьахталларга классическай оҕунан ытыыга: 1. Розалина Тимофеева, 2. Кристина Устинова, Айыына Романова (үһүөн – Саха сирэ).

Блочнай оҕунан ытыыга эр дьоҥҥо: 1. Александр Дамбаев (Забайкальскай), 2. Александр Полосухин (Санкт-Петербург), 3. Вячеслав Калугин (Москва уобалаһа).

Блочнай оҕунан ытыыга дьахталларга: 1. Александра Савенкова (Псковскай уобалас), 2. Наталья Авдеева (Калининград уобалаһа), 3. Степанида Артахинова (Саха сирэ).

18 м классическай оҕунан ытыыга, дьахталлар: 1. Алтана Жаргалова, 2. Татьяна Путункеева (иккиэн – Бурятия), 3. Аина Павлова (Саха сирэ).

18 м классическай оҕунан ытыыга, эр дьон: 1. Александр Медведев (Казахстан), 2. Мария Гук (Москва уобалаһа), 3. Алексей Башкирев (Ярославскай уобалас).

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *