Олимпка Бэстээхтэн силис тардан

Бу кинигэ Эдьигээн Бэстээҕэр төрөөбүт Роман Михайлович Дмитриев ХХ Олимпийскай оонньууларга чемпионнаабыта 45 сылыгар уонна Бэстээх бөһүөлэгэ 70 сыллаах үбүлүөйүгэр ананар. Кинигэ Роман Дмитриев биир дойдулаахтара уонна ыччаттар кининэн киэн тутта, кини дойдутугар-дьонугар тапталын, кытаанах санаатын, олоххо дьулуурун холобур оҥостуохтара диэн эрэнэн хомулунна.

Кинигэ — “Память” республикатааҕы кинигэ редакциятын редактора Д.П. Андреева көрүүтүнэн-истиитинэн бэчээттэнэн таҕыста. Дария Петровна элбэх кинигэни редакциялаан таһаарбыт үөрүйэхтээх. “Олимпка Бэстээхтэн силис тардан” кинигэ даҕаны тупсаҕайдык, сиэдэрэйдик оҥоһуллан тахсыбыт диэн биир бэйэм сыаналыыбын.

— Кинигэ ис хоһоонун бииргэ үөрэммит дьүөгэм Анастасия Гаврильевна Далакырова эрдэттэн мунньан, хомуйан оҥорбута, — диир Д.П. Андреева. — Итиэннэ миигин редактордаан таһаарарбар көрдөспүтэ. Ону түөрт ый курдук кэмҥэ үлэлэһэн, бу, Күн сирин көрдөрдүм. Тус санаабар, кинигэ ис хоһооно, тыла-өһө тыа дьонугар өйдөнүмтүө, ылынымтыа. Манна биһиги бастакы олимпийскай чемпиоммут аймахтарын, доҕотторун, биир санаалаахтарын ахтыылара киирдилэр. Кини төрдүн-ууһун туһунан сиһилии сурулунна. Онон бэстээхтэр биллиилээх биир дойдулаахтарын туһунан бу кинигэттэн элбэҕи билиэхтэрэ дии саныыбын. Кинигэни Бэстээх нэһилиэгин дьаһалтата (баһылык Л.М. Соломонов) үбүлээн таһаарда.

Тус бэйэм Роман Михайловиһы кытта алтыһар этим. Покровскайдыыр суолга баар даачабытыгар ыаллыы этибит. Көрсөн кэпсэтэрбит.

Санатан эттэххэ, А.Г. Далакырова түөрт уонча сыл Бэстээх начаалынай оскуолатыгар учууталлаабыта, Бэстээххэ музейы тэрийбит педагогическай үлэ бэтэрээнэ, элбэх оҕо ийэтэ, сиэн эбээтэ. Оттон Д.П. Андреева 25 сыл устата Социальнай хааччыйыы, салгыы Социальнай көмүскэл министиэристибэлэригэр үлэлээбитэ. Социальнай хааччыйыы бэтэрээнэ. Кинилэр туруоруммут сыалларын-соруктарын ситиспиттэринэн эҕэрдэлиэҕиҥ!

Атырдьах ыйын 24-25 күннэригэр Эдьигээн национальнай эбэҥки оройуонун Бэстээх нэһилиэгэ тэриллибитэ 70 сылын үөрүүлээхтик бэлиэтээһин кэмигэр “Олимпка Бэстээхтэн силис тардан” (хомуйан оҥорооччу А.Г. Далакырова, редактор Д.П. Андреева) кинигэ сүрэхтэниитэ ыытылынна.

Бу, биһиги бастакы олимпийскай чемпиоммут аатын үйэтитиигэ анаммыт бэртээхэй кинигэ 150 ахсаанынан эрэ бэчээттэнэн таҕыста. Итиэннэ үбүлээн таһаарбытын быһыытынан, Бэстээх нэһилиэгин олохтоохторугар эрэ ананна. Оттон дьиҥэ, Роман Михайлович Дмитриев туһунан ааҕыах, билиэх-көрүөх дьон элбэх. Онон, бу кинигэни биир эмэ кыахтаах тэрилтэ – ахсаанын элбэтэн таһаарарга үлэлэһэригэр баҕарабын. Холобур, Эдьигээн оройуона, СР Спорка министиэристибэтэ, Саха сирин көҥүл тустууга федерацията… ылсыан сөп этэ.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *