Олимпийскай эрэл училищетыгар “Дмитриевскай ааҕыыларга” научнай-практическай конференция саҕаланна

Сахаттан бастакы олимпийскай чемпион Р.М. Дмитриев аатынан Олимпийскай эрэл училищетыгар “Дмитриевские чтения, “Наука побеждать” диэн Бүтүн Россиятааҕы научнай-практическай конференция саҕаланна. Бу, үһүс төгүлүн ыытыллар тэрээһин, Олимпийскай эрэл училищетын 30 сылыгар ананар уонна быйыл “УОР: истоки, становления, перспективы” диэн темаанан ыытыллар.

Бүгүн, кулун тутар 10 күнүгэр училище саалатыгар научнай-практическай конференцияны үөрүүлээхтик аһыы буолла. Бэлиэ түгэҥҥэ Саха Республикатын Физическэй култуураҕа уонна спорка миниистирин солбуйааччы Александр Бугаев, Олимпиада-76 призера, спорт үтүөлээх маастара Александр Иванов, Олимпийскай эрэл училищетын дириэктэрэ Алексей Филиппов – конференция аһыллыбытынан эҕэрдэлэрин тиэртилэр.

Бастатан туран, ыраах сиртэн кэлбит бочуоттаах ыалдьыттарга махталларын эттилэр. Быйылгы тэрээһин училище 30 сыллаах үбүлүөйүгэр ананарын санаттылар. Бу бэйэтэ уһун кэм буоларын, училищеттан элбэх спорт маастардара, норуоттар икки ардыларынааҕы кылаастаах маастардар, спорт үтүөлээх маастардара, Россия, Европа, аан дойду чемпионнара, Олимпиада призердара үүнэн-сириэдийэн тахсыбыттарын киэн тутта ааттаатылар. Итиэннэ бүгүҥҥү научнай-практическай конференцияҕа сүрүннээн педагогтар, чинчийээччилэр, тренердэр уонна биллэн турар, училище үөрэнээччилэрэ түмсэн, бу икки күҥҥэ таһаарыылаахтык үлэлииргэ ыҥырдылар.

Маннык, биһиги улуу спортсмеммыт Роман Михайлович Дмитриев аатын үйэтитиигэ тэрээһини тэрийбит дьоҥҥо махтанабын, — диир, олимпийскай призер, Р.М. Дмитриев чугас доҕоро Александр Николаевич Иванов. – Роман Михайлович олоҕун үчүгэйдик чинчийэн үөрэтиэххэ наада. Кини – эталон, кимиэхэ баҕарар үтүө холобур буолар сүдү киһи. Роман Дмитриев туһунан элбэҕи билэ-көрө сатыахха, матырыйааллар элбэхтэр. Эдэр ыччакка, спорка эрэ буолбакка, олоххо кыайыылары ситиһэллэригэр баҕарабын, — диэтэ.

Училище биир бастыҥ иитиллээччитэ Паралимпиада-2012 үрүҥ көмүс призера, аан дойду чемпиона, спорт үтүөлээх маастара Владимир Балынец, соторутааҕыта, 2019 сыл түмүгүнэн, Россия спортивнай суруналыыстарын федерациятын “Серебряная лань” бириэмийэтин лауреата буолбутун туоһулуур статуэтканы дохсун ытыс таһыныытын доҕуһуолугар, училище спорка албан аатын мусуойугар туттарда.

Дьэ, ол кэнниттэн бастаан бочуоттаах ыалдьыттарбыт: Красноярскайдааҕы, Бувайсар Сайтиев аатынан спортивнай оскуола методиһа, педагогическай наука кандидата, доцент Ольга Фатеева, Москваттан спортивнай психолог Денис Басов эбиэккэ диэри практическай семинар ыыттылар.

Ити курдук, практическай семинар күнү быһа ыытыллар. Онно биһиги спорка сыһыаннаах специалистарбыт, учуонайдарбыт, салайааччыларбыт бэйэлэрин дакылааттарынан кыттыахтара.

Биир бэлиэ түгэнинэн, бүгүн 16:00 чаастан училище Тустууга саалатыгар, аҕыйах хонуктааҕыта көҥүл тустууга уолаттарга Россия күрэхтэһиитин кыайыылааҕа буолан кэлбит училище иитиллээччитэ Андрей Мидловеһы чиэстээһин уонна бырааттыы, аан дойду чемпионнара Герман уонна Александр Контоевтар маастар-кылаастара тэриллиэҕэ.

Петр ПАВЛОВ.

Ааптар хаартыскаҕа түһэриитэ.          

Добавить комментарий

Ваш адрес email не будет опубликован. Обязательные поля помечены *