Олимпиецтарбытыгар – Республика бочуоттаах гражданина ааттары иҥэриэххэ!

1976 сыллаахха от ыйын 31 күнүгэр саха албан аатырбыт бөҕөстөрө Роман Дмитриев, Александр Иванов, Павел Пинигин Монреальга, XXI сайыҥҥы Олимпийскай оонньууларга улуу Сэбиэскэй Сойуус көҥүл тустууга сүүмэрдэммит хамаандатыттан кыттан, кыһыл көмүс уонна икки үрүҥ көмүс мэтээллэри түөстэригэр кэппиттэрэ. Бу – өрөгөй, чыпчаал ситиһии быйыл 45 сыла туолар.

Өрөгөй ситиһии – биһиги олимпиецтарбыт хас биирдиилэрин олохторун анаабыт тустууларыгар үйэлэргэ сүппэт муҥутуур ситиһиилэрэ. Бу, сындалҕаннаах, бэриниилээх үлэ түмүгэ, норуоттарын – аан дойду сайдыылаах норуоттарын кытта тэҥэ туруордулар, саха диэн омук баарын өссө төгүл дорҕоонноохтук ааттаттылар. Манан сибээстээн уолаттарбытыгар – «Саха Республикатын бочуоттаах гражданина» ааты үөрдэ-көтүтэ иҥэриэххэ. Уруй! Уруй! Уруй!

Ити мин баҕа санаам – тустууну таптааччылар, олимпиецтарбытыгар сүгүрүйээччилэр барыларын санаалара буолуо дии саныыбын.

Сэмэн ОКОЁМОВ, норуоттар икки ардыларынааҕы категориялаах судьуйа, улуу тренер Д.П. Коркин үөрэнээччитэ.

Добавить комментарий

Ваш адрес email не будет опубликован. Обязательные поля помечены *