Олимпиада көһөрүллүбүтүнэн, боксаҕа сүүмэрдээһин саҥаттан саҕаланар

Токиотааҕы Олимпийскай оонньууларга Россия боксаҕа хамаандатын сүүмэрдээһин саҥаттан саҕаланыа. Ити туһунан Россия боксаҕа федерациятын генеральнай секретара Умар Кремлев эппитин, тустаах федерация пресс-киинэ иһитиннэрэр.

Олимпиада быйыл сайын Токиоҕа ыытыллыахтааҕа, ону коронавируһунан сибээстээн эһиил сылга көһөрүллүбүтэ. Эмиэ бу ыарыы киэҥник тарҕаныытынан сибээстээн, ааспыт ыйга Лондоҥҥа саҕаламмыт Европатааҕы Олимпиадаҕа сүүмэрдиир турнир ыытыллан иһэн тохтотуллубута. Ол кэмҥэ диэри россияннартан ити күрэхтэһиигэ соҕотох Альберт Батыргазиев (57 кг) эрэ олимпийскай путевканы ылары ситиспитэ.

-Федерациялар, Олимпиадаҕа сүүмэрдээһини хаттаан ыытарга туруорсан сурук бэлэмнээн ыыппыттара, — диир Умар Кремлев. – Онон сиэттэрэн, дойду сүүмэрдэммит хамаандата Россия быйылгы чемпионатын түмүгүнэн быһаарыллыаҕа. Билигин коронавируһу кыайыахха наада, оттон сэтинньи бүтүүтэ, ахсынньы саҥата Россия чемпионатын тэрийэн ыытарга былаанныыбыт. Онон Олимпиадаҕа биһиги хамаандабыт састааба хаттаан талыллыаҕа. Ити Россия эрэ хамаандатыгар сыһыаннаах буолбатах, сыл иһигэр туох баҕарар буолуон сөп, бүтүн сыл диэн – уһун кэм.

Санатан эттэххэ, Олимпиадаҕа сүүмэрдээһиҥҥэ биһигиттэн Россия былырыыҥҥы чемпионатын үрүҥ көмүс призера, спорт үтүөлээх маастара Василий Егоров (52 кг) кыттыбыта. Билэргит курдук, бастакы лицензионнай турнирга дагестанец Расул Салиев кыттыбыта уонна иккис эргииргэ хотторон, күрэхтэһииттэн туораабыта. Онтон ыам ыйыгар аан дойдутааҕы турнир буолуохтааҕа. Онно сэмээр биһиги боксербут кыттыа дии санаабыппыт, барыта саҥаттан саҕаланар буолла…

Салгыы, үөскээбит быһыыга специалистар санааларын истиэххэ.

ССРС спордун маастара, Саха АССР үтүөлээх тренерэ Александр Тыасытов: “Мин санаабар, квалификационнай турнир бүтэ илигинэ олимпийскай путевканы ылбыт Батыргазиевы сүүмэрдээһиҥҥэ киллэрэр буоллахтарына, Лондон рингэтигэр хотторбут Салиевы хаттаан сүүмэрдээһиҥҥэ кытыннарымыахтарын наада. Олимпиадаҕа сүүмэрдиир Европатааҕы квалификационнай турнир хаттаан ыытыллыытыгар Салиев буолбакка, Россия саҥа чемпиона кыттыахтаах. Тоҕо диэтэргит, Лондоннааҕы турнир ханнык стадияҕа тохтотуллубутуттан салгыы салҕаныа диэбиттэрэ. Оччотугар Россия 52 киилэҕэ киһитэ суох буолар. Барытын Аан дойдутааҕы Олимпийскай кэмитиэт быһаарыаҕа. Оттон биһиги эрэнэ кэтэһэбит эрэ”.

Бүтүн Россиятааҕы категориялаах судьуйа Гаврил Стручков: “Олимпиада болдьоҕо уларыйбытынан, итинник быһаарыы оруннаах. Лицензиялары былдьаһар күрэхтэһиилэр эһиил саас ыытыллаллара буолуо. Биир сыл иһигэр сорох спортсмен спортивнай формата мөлтүөн сөп, ким эрэ төттөрүтүн өссө эбии сайдыа, эчэйии да баар буолуон син. Онон сыл бүтүүтэ Россия чемпионата көрдөрүөҕэ, ким хайдах бэлэмнээҕин. Икки-үс ыйааһыҥҥа лидер уларыйыан син дии саныыбын”.

Олимпийскай эрэл училищетын боксаҕа сүрүн тренерэ, спорт маастара Владимир Павлов: “Сөптөөх быһаарыы. Тоҕо диэтэргит, Олимпиадаҕа диэри сыалай сыл баар. Маннык балаһыанньаҕа биһиэхэ кыахтар үөскүүллэр. Барыта хамаанда хайдах үлэлиириттэн, боксер дьарыкка сыһыаныттан тутулуктаах буолуоҕа. Сүүмэрдээһин барыта хаттаан, саҥаттан ыытыллар. Василий Егоров билигин тус тренерэ Артур Иннокентьевич Пахомов былаанынан дьиэтээҕи усулуобуйаҕа дьарыктанар”.

ССРС спордун маастара Константин Бурцев: “Олимпиадаҕа сүүмэрдээһин хаттаан ыытыллара саамай сөптөөх быһаарыныы буолуо этэ. Олимпиада атырдьах ыйыгар көспүтэ. Онон сылтан ордук бириэмэ баар, ол устата ханнык баҕарар спортсмена туругар араас уларыйыылар буолуохтарын сөп. Саастаах спортсменнарга биллэн турар ыарахан, өссө биир сыл физическай форманы үрдүк чыпчаалга тута сылдьарга. Барыларыгар шанстара тэҥ. Ким ол кэмҥэ үчүгэй бэлэмнээх тиийбит – Олимп чыпчаалын дабайар кыаҕы ылыа дии саныыбын”.

Онон, Олимпиада биир сыл көһөрүллэн биэрбитинэн, квалификационнай турнирга кыттар Россия хамаандатын састааба саҥаттан талыллар буолла. Этэргэ дылы, барыта ыраас лиистэн саҕаланар. Биһиги бэйэбит боксербут Василий Егоровка эрэлбит улахан.

Петр ПАВЛОВ.

 

 

Добавить комментарий

Ваш адрес email не будет опубликован. Обязательные поля помечены *