Н.Н. Тарскай чөмпүйэнээтигэр тустуу

Бүгүҥҥүттэн “Триумф” Спорка бэлэмнэнии киинигэр Саха сиригэр физическэй култуура уонна успуорт сайдыытыгар улахан кылаатын киллэрсибит төлөннөөх салайааччы Николай Николаевич Тарскай төрөөбүтэ 95 сылыгар аналлаах өрөспүүбүлүкэ көҥүл тустууга биирдиилээн уонна хамаанданан бастыыр иһин чөмпүйэнээтэ саҕаланна. Күрэхтэһии, ааспыт нэдиэлэҕэ түмүктэммит аан дойду Кубогар курдук, сүрүн саалаҕа тэлгэммит икки көбүөрүнэн ыытыллар.

Чөмпүйэнээккэ 18 хамаандаттан барыта 205 бөҕөс күөн көрсөр. Ол курдук, Амма, Үөһээ Бүлүү, Дьааҥы, Бүлүү, Горнай, Мэҥэ Хаҥалас, Мирнэй, Нам, Ньурба, Өймөкөөн, Орто Халыма, Сунтаар, Таатта, Томпо, Уус Алдан, Хаҥалас, Чурапчы уонна Дьокуускай хамаандалара кытталлар. Саамай элбэх кыттааччыны Чурапчы улууһа туруорда – 31! Оттон Дьокуускай – 24, Мэҥэ Хаҥалас уонна Нам 18-тыы, Сунтаар уонна Уус Алдан 17-лии бөҕөстөөхтөр. Сэрэйдэххэ, сүрүннээн бу хамаандалар толору састааптаахтарын быһыытынан, бириистээх миэстэ иһин киирсэллэрэ буолуо.

Бастакы күн биэс ыйааһыҥҥа тустуу ыытылынна. Онуоха эбиэккэ диэри сытыы хапсыһыылар түмүктэринэн финал аҥарыгар таҕыстылар:

57 кг: Валерий Андросов (Уус Алдан) – Дьулус Федотов (Чурапчы), Федор Постников (Чурапчы) – Петр Копылов (Мэҥэ Хаҥалас).

65 кг: Степан Соркомов (Дьокуускай) – Петр Павлов (Уус Алдан),  Айхан Антонов (Нам) – Эдуард Григорьев (Чурапчы).

74 кг: Прокопий Петров (Дьокуускай) – Константин Власов (Мэҥэ Хаҥалас), Иван Барашков (Нам) – Иван Ефремов (Горнай).

86 кг: Игорь Софронеев (Нам) – Алексей Некрасов (Дьокуускай), Петр Захаров (Чурапчы) – Леонид Данилов (Нам).

97 кг: Виктор Борисов (Мэҥэ Хаҥалас) – Арсентий Николаев (Уус Алдан), Ньургун Сергин (Сунтаар) – Кузьма Сивцев (Нам).

Бырагыраама быһыытынан бүгүн киэһэ 17:00 чаастан чөмпүйэнээти үөрүүлээхтик аһыы буолар. Ол кэнниттэн тута финалга тахсар иһин хапсыһыылар ыытыллыахтара.

Петр ПАВЛОВ.   

Добавить комментарий

Ваш адрес email не будет опубликован. Обязательные поля помечены *