Ньургун Скрябин Европа тустууга чемпионатыттан 19-с мэтээли аҕалла!

Саха тустууга кыһатын иитиллээччилэрэ Европа көҥүл тустууга чемпионатыттан бүгүҥҥү күҥҥэ диэри 19 мэтээллээхтэр. Ол иһигэр биэс кыһыл көмүс, биэс үрүҥ көмүс уонна тоҕус боруонса мэтээллэр. Саамай элбэх мэтээллээх тустуугунан Беларусь хамаандатын аатыттан кыттар Владислав Андреев буолар. Кини биир үрүҥ көмүс, үс боруонса мэтээли ылары ситиспитэ. Оттон Василий Гоголев уонна Александр Контоев үстүү мэтээллээхтэр.

Дьэ, Римҥэ Европа чемпионатыгар Ньургуммут үчүгэй ис хоһоонноох хапсыһыылары көрдөрөн, тустууну таптааччылары сэргэхситтэ. Саха тустуута билигин даҕаны улахан таһымҥа ситиһиилэнэр кыахтааҕын көрдөрдө.

Европа чемпионатыгар үһүс кыттыытыгар дьиҥнээх характерын, тустууга үөрүйэҕин көрдөрөн, олус күүстээх бөлөхтөн тахсан, үрүҥ көмүс мэтээли ылары ситиһэн, спорду таптааччылар биһирэрбиллэрин ылла.

Түгэнинэн туһанан – Ньургуну бэйэтин, тус тренерэ Гаврил Сергеевич Игнатьевы уонна киниэхэ эрэммит элбэх ахсааннаах тустууну таптааччылары эҕэрдэлиэҕиҥ! Бу тустуутунан Ньургун, олимпийскай путевка иһин тустар кыахтааҕын итэҕэттэ. Барыта табыллан иһэригэр уонна саха дьоно, спорду сэҥээрээччилэр биир түмсүүлээх буоларбытыгар баҕарыаҕыҥ.

“Дьулурҕан” ыспыраапката: Ньургун Скрябин быйыл ыам ыйыгар отут сааһын туолар. Тренерэ – Гаврил Игнатьев. Манна даҕатан эттэххэ, Гаврил Сергеевич биир иитиллээччитэ Ньургун Александров быйыл кыһын Ираҥҥа, Тахти кубогар норуоттар икки ардыларынааҕы турнирга кыайыылааҕынан тахсыбыта. Аны бүгүн, Нерюнгрига, Дальнай Восток федеральнай уокуругун чемпионатыгар кыайыылааҕынан тахсан, Россия чемпионатыгар кыттар быраабы ылла.

Ньургун Скрябин – норуоттар икки ардыларынааҕы кылаастаах спорт маастара. Кини тустууга ситиһиитин кылгастык билиһиннэрдэххэ, эдэрдэргэ уонна устудьуоннарга Россия күрэхтэһиитин призердарынан буола сылдьыбыта. Устудьуоннарга Россия чемпиона, аан дойду чемпионатын боруонса призера. Саха сирин үс төгүллээх чемпиона. Красноярскайга И.Ярыгин, Ираҥҥа Г.Тахти ааттарынан норуоттар икки ардыларынааҕы турнирдар кыайыылаахтара. Россия чемпионатын боруонса призера. Беларусь Республикатын чемпиона.

Саха тустууктарын Европа чемпионатыгар ситиһиилэрэ:

1969 – София: Роман Дмитриев (48 кг) – чемпион.

1975 – Людвигсхауфен: Павел Пинигин (74 кг) – чемпион.

1977 – Бурса: Александр Иванов (52 кг) – иккис миэстэ.

1981 – Лодзь: Роман Дмитриев (48 кг) – үһүс миэстэ.

1982 – Варна: Василий Гоголев (48 кг) – иккис миэстэ.

1985 – Лейпциг: Василий Гоголев (48 кг) – чемпион.

1988 – Манчестер: Василий Гоголев (48 кг) – чемпион.

1998 – Братислава: Герман Контоев (54 кг) – иккис миэстэ.

2002 – Баку: Александр Контоев (55 кг) – үһүс миэстэ.

2005 – Варна: Александр Контоев (55 кг) – үһүс миэстэ.

2009 – Вильнюс: Владислав Андреев (55 кг) – үһүс миэстэ.

2010 – Баку: Виктор Лебедев (55 кг) – үһүс миэстэ.

2011 – Дортмунд: Владислав Андреев (55 кг) – үһүс миэстэ.

2013 – Тбилиси: Владислав Андреев (55 кг) – иккис миэстэ.

Александр Контоев (66 кг) – үһүс миэстэ.

2015 – Баку: Виктор Лебедев (57 кг) – чемпион.

2018 – Каспийскай: Владислав Андреев (57 кг) – үһүс миэстэ.

2019 – Бухарест: Владимир Егоров (57 кг) – үһүс миэстэ.

2020 – Рим: Ньургун Скрябин (65 кг) – иккис миэстэ.

Петр ПАВЛОВ.

Ааптар телевизортан хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *