Ньургун Александров финалга таҕыста

Казахстан Тараз куоратыгар үгэс быһыытынан сыл аайы ыытыллар Динмухамед Кунаев кэриэһигэр көҥүл тустууга норуоттар икки ардыларынааҕы турнир бастакы күнэ түмүктэннэ. Эрдэ иһитиннэрбиппит курдук, бүгүн – 57, 61, 74, 79 уонна 97 кг ыйааһыннаахтар туһуннулар.

Сарсыарда ыыппыт сеткалара сыыһа буолан таҕыста. Сорох пааралар уларыйбыттар. Ол да үрдүнэн, 57 киилэҕэ Быйаман Яковлев киргиз Арстанбегы хотон баран, узбек Джураевка хоттордо. Арыйан Тютрин монгол Батсайханы кыайда, салгыы Жаргал Дамдиновка (Бурятия) 3:5 ахсаанынан сабырыйтаран кэбистэ. Оттон Федор Постников Бурятия уопуттаах бөҕөһө, Россия призера буола сылдьыбыт Базар Жалсаповы 3:1 хотон баран, киргиз Парпиевка хотторон кэбистэ.
Салгыы күрэхтэһиигэ Жаргал Дамдинов утарсааччыларын кыайталаан, финалга таҕыста. Онон Арыйан Тютрин “уоскутар” бөлөххө тустар буолла. Бастаан казах Абдуалиевтыын тустуоҕа. Онно кыайдаҕына эмиэ казах Примбаевы кытта турнир боруонса мэтээлин ким ыларын быһаарсыаҕа.

57 кг финалга икки бурят тустуоҕа, Белоруссияттан Дичик Ринчинов уонна Россияттан Жаргал Дамдинов.

61 кг ыйааһыҥҥа, бастакы эргииргэ Айтал Захаров казах Торебегы, Эдуард Григорьев казах Сагингалины, Семен Владимиров киргиз Атировы, Ньургун Александров казах Исмаиловы кыайдылар. Оттон финал 8/1-гэр Петр Павлов казах Оспановы, Григорьев – Захаровы, Владимиров казах Абикеновы, Александров казаҕы хоттулар.

Салгыы финал чиэппэригэр Петр Павлов бэйэтин киһитэ Эдуард Григорьевы 8:5, оттон Ньургун Александров – Семен Владимировы 5:4 ахсаанынан кыайдылар. Онон финалга ким тахсарын Павловтаан Александров быһаарыстылар, маныаха кыайыыны 3:1 ахсаанынан Ньургун Александров ситистэ. Кини бүтэһик быһаарыылаах хапсыһыыга хас да сыллааҕыта бастакы ыйааһыҥҥа Азия чемпиона буола сылдьыбыт казах Расул Калиевтыын киирсиэҕэ.

Оттон Петр Павлов боруонса мэтээл иһин киирсиигэ – Исмаилов, казах, Владимиров кыайыылаахтарын кытта тустуоҕа.

74 киилэҕэ Герман Устинов икки утарсааччытын кыайан баран, финалга тахсар иһин тустууга дагестанец Мурад Курамагомедовка 3:4 ахсаанынан хотторон кэбистэ. Онон боруонса мэтээл иһин тустуоҕа.

Бу ыйааһыҥҥа финалга көрсүөхтэрэ: Мурад Курамагомедов (Россия) – Арсалан Будожапов (Россия). Ити курдук, 79 киилэҕэ Тажидин Акаев (Россия) – Галымжан Усербаев (Казахстан), 97 киилэҕэ Мамед Ибрагимов (Казахстан) – Александр Гуштын (Белоруссия) кыайыылаах атын ким ыларын быһаарсыахтара.

Турниры Ютубка манна көрүөххэ сөп: https://youtu.be/Za-NUyozpOE https://youtu.be/uWFwh6fq62o

Турнир бырагыраамата (Дьокуускай бириэмэтэ)

Сэтинньи 24 күнэ, субуота

13:30-17:00 57, 61, 74, 79, 97 кг ыйааһыннарга “уоскутар” бөлөх тустуулара.

13:30-17:00 65, 70, 86, 92, 125 кг ыйааһыннарга барыллааһын хапсыһыылар.

21:00-22:00 65, 70, 86, 92, 125 кг ыйааһыннарга финалга тахсар иһин киирсиилэр.

22:00-23:00 57, 61, 74, 79, 97 кг ыйааһыннарга финаллар.

Сэтинньи 25 күнэ, баскыһыанньа

13:30-16:00 65, 70, 86, 92, 125 кг ыйааһыннарга “уоскутар” бөлөх тустуулара.

18:00-21:00 Финаллар, кыайыылаахтары наҕараадалааһын.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *