Номинациялар лауреаттарынан кимнээх буоллулар?

Бүгүн, «күөх экраҥҥа» ыытыллыбыт, 2020 сыл спорка бастыҥ спортсменнарын быһаарыы кэмигэр, ааһан эрэр сылга физическэй култуураҕа уонна спорка номинацияларынан лауреаттар ааттарын эмиэ билиһиннэрдилэр.

Билсиҥ, сыл түмүгүнэн физическэй култуура уонна спорт эйгэтигэр номинацияларга лауреаттара:

Россия физическэй култуураҕа уонна спорка туйгуна, Саха АССР физическэй култуураҕа үтүөлээх үлэһитэ Маргарита Куличкина – «Спорка сулууспалааһын иһин» номинация лауреатынан ааттанна.

Саха Республикатын ыччат политикатыгар туйгуна, М.К. Аммосов аатынан Хотугулуу Илиҥҥи федеральнай университет Бүтүн Россиятааҕы ГТО-ҕа киинин салайааччыта Александр Черкашин – ГТО нуорматын туттарыыга бастыҥ тэрийээччи аатын ылла.

Саха Республикатын физическэй култуураҕа уонна спорка үтүөлээх үлэһитэ, спорт бэтэрээнэ Дмитрий Горохов – «спорду бастыҥ общественнай тэрийээччи» номинация лауреата. 

Саха Республикатын дуобакка федерацията (президент – Владимир Птицын) – бастыҥ үлэлээх спорт федерациятынан буолла.

Ньурба улууһа (баһылык Алексей Иннокентьев, физическэй култуура уонна спорт управлениетын начаалынньыга Роберт Алексеев) – спорду тэрийиигэ бастыҥ үлэлээх улууһунан ааттанна.

Саха Республикатын үөрэхтээһиҥҥэ туйгуна, бастакы категориялаах судьуйа, мас-рестлиҥҥэ Саха сирин спорка маастара Кэрэчээнэ Николаева – 2020 сыл бастыҥ судьуйата буолла.

Республикатааҕы «Сахамедиа» иһитиннэрэр-айар тэрилтэ корреспондена Дьулустаан Сергеев – спорду сырдатыыга сыл бастыҥ суруналыыһа.

Саха Республикатын спортивнай тустууга федерациятын вице-президенэ, «Сибнорд» тэрилтэ дириэктэрэ Дмитрий Ушницкай – «Спорт мецената» номинация лауреатынан буолла.

Мас-рестлиҥҥэ Россия спордун маастара, Саха сирин уонна Россия чемпиона Екатерина Белолюбская – спорт төрүт көрүҥнэригэр «Сахаада-спорт» ассоциация бастыҥ спортсменынан талылынна.

Саха Республикатын хотугу многоборьеҕа сүүмэрдэммит хамаандатын старшай тренерэ, СР үөрэхтээһиҥҥэ туйгуна, спорт маастара Альберт Иванов – 2020 сыл бастыҥ тренерэ.

Манчаары аатынан спорт национальнай көрүҥнэригэр республикатааҕы киин старшай тренерэ, РСФСР үөрэхтээһиҥҥэ туйгуна, Саха Республикатын үтүөлээх учуутала Надежда Белолюбская – спорду бастыҥ тэрийээччи.

Лауреаттары барыларын ис сүрэхтэн истиҥник эҕэрдэлиибит! Үүнэр Саҥа дьылга саҥа ситиһиилэри, үрдүк кирбиилэри баҕарабыт.

«Дьулурҕан».     

Добавить комментарий

Ваш адрес email не будет опубликован. Обязательные поля помечены *