Николай Охлопков үһүс буолла!

Румынияҕа ыытыллыбыт, 23-гэр диэри саастаах бөҕөстөргө аан дойду күрэхтэһиитигэр биир дойдулаахпыт, Сунтаар ыччата Николай Охлопков 61 киилэҕэ үһүс бириистээх миэстэни ылла.

Билэргит курдук, кини быйылгыттан Румыния гражданствотын ылан, бу бастакы улахан сүрэхтэниитин ааста. Санатан эттэххэ, Бухарест көбүөрүгэр кини словак И.Молнары, украинец П.Билейчугу кыайталаан баран, финалга тахсар иһин киирсиигэ Россия эр дьоҥҥо чемпиона М.Идрисовка хотторон кэбиспитэ. Оттон боруонса мэтээли ылар иһин хапсыһыыга кыргыз У.Жолдошбековы 10:4 ахсаанынан улаханнык илистибэккэ кыайда. Бу хапсыһыыга уолбут үчүгэй албастары көрдөрдө. Ол курдук, туран эрэн атахха тэбэн түһэрэн, хапсаҕай быраҕыыны оҥорбутун судьуйалар 4 баалынан сыаналаатылар. Оттон иккис түһүмэххэ эмиэ туран эрэн утарыта анньыһыыга эмискэ атаҕынан олуйан тиэрэ көтөн, 2 баалы сурунна…

Күрэхтэһии Румыния киин куоратыгар ыытылла турарынан, биһиги уолбутугар ыалдьан трибуна биир кэм “Коля! Коля!! Коля!!!” диэн үөгүлүүрүгэр доҕуһуоллатан, бөҕөспүт аһыллан туһунна. Кинини көбүөргэ Румыния хамаандатын сүрүн тренерэ Анатолий Гуйдя уонна тус тренерэ – СР хамаандатые кылаабынай тренерэ Владимир Кириллин арыаллаан таһаардылар уонна хапсыһыы кэмигэр сүбэлээн аххан биэрдилэр.

Утарсааччыта туох-ханнык бөҕөһүй диэтэххитинэ, Улукбек Жолдошбеков тустубута син ыраатта. Бу иннинэ 57 киилэҕэ кыттар этэ. Дьокуускайга хаста да кэлэн туста сылдьыбыта. Быйыл Азия чемпионатыгар эр дьоҥҥо боруонса мэтээли ылбыта. Күрэхтэһиилэргэ көтүпэккэ кыттар. Соторутааҕыта Венгрияҕа ыытыллыбыт аан дойду чемпионатыгар эмиэ тустубута.

Онон, үс күнү-түүнү быһа кэтээбит икки кыттааччылаах күрэхтэһиибитигэр наһаа “ытыспытын соттубатыбыт”. Румыния чиэһин көмүскүүр 22 саастаах Николай Охлопковпыт боруонса мэтээлинэн наҕараадаланна. Онон Саха сирин тустууну таптааччыларын барыларын dzulurgan.ru сайт аатыттан эҕэрдэлиибит! Ити курдук, ситиһиилэр сиэттиһэн истиннэр.

Бу ыйааһыҥҥа иккис боруонса мэтээли китаец Лю ылла. Кини уопуттаах иранец Садекины 3:3 ахсааҥҥа баһыйыыта соһуччу буолла. Онон бу түһүлгэҕэ китаецтар бэйэлэрин баалларын биллэрдилэр. Иккис мэтээллэрин ыллылар. Оттон чемпионунан сэрэйиллибитин курдук, биһиги Колябытын хоппут Россия чемпиона дагестанец Магомедрасул Идрисов буолла. Кини финалга американеһы киһилээбэтэ, 11:1 ахсаанынан кыайда.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *