Николай Охлопков сэрэбиэйэ

Румынияҕа, 23-тэригэр диэри саастаахтарга көҥүл тустууга аан дойду чемпионата ыытылла турар. Бүгүн, 61 киилэҕэ кыттааччылар сэрэбиэйдэрэ оҥоһулунна. Ол курдук, бу ыйааһыҥҥа 21 бөҕөс баар. “Дьулурҕан” (dzulurgan.ru) сайтка эрдэ иһитиннэрбиппит курдук, бу ыйааһыҥҥа саха тустууга кыһатын иитиллээччилэриттэн Сунтаар ыччата Николай Охлопков кыттар. Кини быйылгыттан Румыния дойдутун көмүскүүр. Уолбут сэрэбиэйэ хайдаҕый?

Кини “А” бөлөххө киирбит. Манна – ахсыалар. Охлопков маҥнай словак Иван Молнары кытта тустар. Манна кыайбыт бөҕөс Петро Билейчук (Украина) – Салим Наим (Болгария) пааратын кыайыылааҕар тахсар. Бу бөлөххө өссө сайын Одинцоваҕа Россия улахан дьоҥҥо чемпиона буолбут Магомедрасул Идрисов баар. Кини бастакы эргииргэ монгол Цэрмааны кытта көрсөр. Ити курдук, төрдүс паараҕа Азия чемпионатын призера Улугбек Жолдошбеков (Кыргызстан) – Леонид Колесник (Молдова) тустуохтара.

Оттон “Б” бөлөххө 13-лэр. Манна квалификацияҕа Р.Гасымов (Азербаджан) – Ф.Ярашев (Узбекистан), Б.Торебек (Казахстан) – И.Садеки (Иран), Е.Кахвечи (Турция) – Ю.Фуджита (Япония), А.Арун (Индия) – В.Жмулай (Польша), А.Вахтангишвили (Грузия) – Г.Пилидис (Греция) киирсиэхтэрэ. Өссө бу бөлөххө китаец Лиу, канадец Боднарчук уонна американец Фаус бааллар.

Сэрэбиэйи көрөөт туох диэххэ сөбүй? Тустууну таптааччылар үксүн, “итинник сэрэбиэй үчүгэй дуу, куһаҕан дуу?” диэн ыйытааччылар. Охлопков таһымнаах тустуук. Маннык сэрэбиэйгэ талымастыырбыт суох. Словагы ааһыахтаах диэн бүк эрэниэххэ сөп. Оттон иккис эргииргэ, сэрэйдэххэ украинецтыын тустара буолуо. Бу сэрэхтээх киһи, 2015 сыллаахха Европа чемпионатыгар Ньургун Скрябиммытын кыайан турар. Ол эрээри, Николай Охлопков Петр Билейчуктуун былырыын Румынияҕа ыытыллыбыт норуоттар икки ардыларынааҕы турнирга тустан турар. Икки киилэ ордуктаах күрэхтэһиигэ 57 кг. Онно финал чиэппэригэр 12:2 ахсаанынан биһиги бөҕөспүт эрэллээхтик кыайбыта. Онон эрэл баар курдук.

Сэрэбиэйи көрөн баран, Н.Охлопков сүрүн тустуута финал аҥаарыгар Россия чемпиона М.Идрисовтыын буолуоҕа диэн сылыктыыбын. Сэрэйдэххэ, бу паара кыттыылаахтара чемпионат бастакы, эбэтэр үһүс миэстэтин ылыахтарын сөп.

Оттон иккис бөлөххө Гасымов, Садеки финалга тиийиэхтэрин сөп.

Чэ, биһиги билгэлиибит, оттон көбүөр таҥарата бэйэтэ күүстээхтэри ким төһө үчүгэйдик, суобастаахтык бэлэмнэммитинэн, кыайыыга дьулуурдарынан көрөн орун оннуларын булларыа.

Петр ПАВЛОВ.

 

Добавить комментарий

Ваш адрес email не будет опубликован.