Николай Охлопков – Европа чемпионатын боруонса призера

Рим. Көҥүл тустууга Европа чемпионатын бүтэһик күнүгэр хаалбыт биэс ыйааһыҥҥа быһаарыылаах хапсыыһылар буоллулар. Үөрүүлээҕэ диэн, бу күн Румыния хамаандатын аатыттан кыттар биһиги биир дойдулаахпыт Николай Охлопков 61 киилэҕэ үһүс бириистээх миэстэни ылан, тустууну таптааччылары үөртэ.

Санатан эттэххэ, кини бастакы күн аан дойду чемпиона грузин Бека Ломтадзеҕа хотторон кэбиспитэ. Салгыы күрэхтэһиигэ грузин ситиһиилээхтик тустан финалга тахсыбыта. Ол аата, биһиги бөҕөспүтүгэр, күрэхтэһии балаһыанньатын быһыытынан, суола аһыллан биэрбитэ. Ол курдук, кини маҥнай “уоскутар” бөлөххө киирэн молдован Л.Колеснигы 6:2 ахсаанынан эрэллээхтик кыайан, чемпионат боруонса мэтээлин иһин тустар кыахтаммыта. Онно кинини азербайджанец Интигам Вализаде кэтэһэн олорбута.

Кинилэр тустуулара бастаан утаа наһаа кэтэһиилээхтик, туох да сытыырхатыыта суох саҕаламмыта. Бөҕөстөр иккиэн көҕө суохтук тусталларын иһин биирдии сэрэтиилээх этилэр, ол аата, ахсаан 1:1. Маннык түгэн Вализадены астыннарар этэ. Тоҕо диэтэххэ, кини баалы бүтэһигинэн ылбыта. Ол эрээри, хапсыһыы бүтэрэ аҕыйах сөкүүндэ хаалбытын кэннэ, кини Коляны үөһээттэн кууһан ылан кэдэрийэн быраҕаары бэйэтэ тиэрэ баран түспүтүн, биһиги бөҕөспүт бырастыы гыммата, хам баттаан кэбистэ. Онон, Н.Охлопков былырыын Бухарестка бэһис миэстэлэммит эбит буоллаҕына, быйыл пьедестал үһүс үктэлигэр тахсар кыахтанна.

Николай бу мэтээлэ – саха тустууктарын Европа чемпионатыгар сүүрбэһис мэтээллэрэ буолла. Түгэнинэн туһанан, Николай Охлопковы уонна тус тренерэ Владимир Кириллины, бу ситиһиилэринэн эҕэрдэлиэҕиҥ! Итиэннэ ситиһииттэн уоскуйан хаалбакка, туруоруммут соруктарын ситиһэллэригэр баҕарыахха.

Бу ыйааһыҥҥа чемпион аатын россиянин Александр Богомоев ылла. Аан дойду чемпиона Бека Ломтадзе (Грузия) иккис миэстэнэн дуоһуйда. Оттон Европа былырыыҥҥы чемпиона Арсен Арутюнян (Армения) бу сырыыга биһиги Николай Охлопковпытын кытта боруонса мэтээлинэн наҕараадаланна.

Онон Европа быйылгы чемпионата саха тустууга кыһатын иитиллээччилэригэр ситиһиилээхтик түмүктэннэ диир кыахтаахпыт. Ньургун Скрябин үрүҥ көмүс, Николай Охлопков боруонса мэтээллэннилэр.

Петр ПАВЛОВ.  

Добавить комментарий

Ваш адрес email не будет опубликован. Обязательные поля помечены *