Николай Охлопковка 150 тыһыынчалаах сертификат!

Бүгүн, сэтинньи 21 күнүгэр 23-гэр диэри саастаах тустууктарга аан дойду чемпионатыгар боруонса призер Николай Охлопков Дьокуускай куоракка көтөн кэлээтин кытта тута “Триумф” Спорка бэлэмнэнии киинигэр пресс-конференция тэрилиннэ.

Пресс-конференцияны СР Спорка миниистирин бастакы солбуйааччы Семен Чердонов иилээн-саҕалаан ыытта. Кини кылгастык, Румыния киин куоратыгар сэтинньи 16-18 күннэригэр буолан ааспыт көҥүл тустууга эдэрдэргэ аан дойду чемпионатыгар сахалар кыттыыларын туһунан билиһиннэрдэ уонна бастакынан тылы Николай Охлопков тус тренерэ – СР көҥүл тустууга сүүмэрдэммит хамаандатын сүрүн тренерэ Владимир Кириллиҥҥэ биэрдэ.

— Бу ситиһии, боруонса мэтээл Саха сирин тустууга историятыгар маннык күрэхтэһииттэн бастакы улахан наҕараада, — диир Владимир Николаевич. — Кыахпытынан кытынныбыт. Румыния хамаандатын салалата, тустууга федерацията Николай Охлопков ситиһиититтэн астынарын биллэрдэ. Аны биһиги иннибитигэр – Европа чемпионатыгар ситиһиилээхтик кыттар сыал-сорук турар, — диэн туран, СР көҥүл тустууга федерациятын президенэ Семен Березиҥҥэ, Сунтаар улууһун баһылыга Анатолий Григорьевка, Үрдүкү спортивнай маастарыстыба оскуолатын дириэктэрэ Александр Игнатьевка өйөбүллэрин уонна улахан көмөлөрүн иһин махталын биллэрдэ.

Олимпийскай чемпион, Ил Түмэн депутата, СР көҥүл тустууга федерациятын бастакы вице-президенэ Павел Пинигин улахан таһымнаах күрэхтэһии кэнниттэн маннык үөрүүлээх түгэн ыытыллара үтүө үгэскэ кубулуйбутун эттэ.

— Уолбут Россия бөҕөһүгэр эрэ хоттордо, ол бастакы сырыыга сөп даҕаны. Олимпиадаҕа тиийэн ким күүстээҕин көрүллүө. Николай тустуук быһыытынан күннэтэ сайдан, тупсан иһэр. Улахан кыайыылары ситиһэргэ бэлэм. Мин киниэхэ эрэнэбин. Бу маннык түгэҥҥэ спортсмены кыратык хайгыахха наада. Тоҕо диэтэргит, кини ситиһиитэ сиэрдээхтик сыаналаныахтаах. Аан дойду чемпионата диэн улахан таһымнаах күрэхтэһии. Николай эдэр, барыта иннигэр. Өссө дьаныһан туран дьарыктаныан наада. Этэргэ дылы, эрчиллэр саалаҕа бастакынан кэлэн, бүтэһигинэн баран. Мин бэйэм оннук этим. Түбүктээх үлэ хаһан баҕарар түмүктээх буолар. Николайга, эһиил аан дойду чемпионатыгар ситиһиилээхтик кыттан, олимпийскай путевканы ыларыгар баҕарабын.

“Спорт Якутии” хаһыат кылаабынай редактора Александр Посельскай – тустууктан уонна кини тренериттэн инникитин ханнык ыйааһыҥҥа тусталларын, Румыния хамаандатыгар Европа чемпионатын призера Иван Гуйдя диэн, хамаанда кылаабынай тренерэ Анатолий Гуйдя бииргэ төрөөбүтүн быраата баарын, састаабы талыыга ол куоһур буолуо суоҕа дуо диэн оруннаах ыйытыыны биэрдэ. Онуоха Семен Чердонов, өссө 2011 сылтан Анатолий Гуйдя тустуук уонна тренер быһыытынан Саха сиригэр элбэхтэ кэлэ сылдьыбытын, Саха сирин кытта биир сибээстээхтик үлэлиирин билиһиннэрдэ. Кини бииргэ төрөөбүт быраатыгар наһаа ыалдьыа суоҕа, барытын көбүөр быһаарыа, онно этэргэ дылы, “убай-быраат диэн суох” диэн быһаарда.

Оттон Владимир Кириллин, бакаа Николай ханнык да ыйааһыҥҥа халбаҥнаабакка 61 киилэҕэ тустарын, итиннэ үчүгэй көрдөрүүнү ситиһиэхтээҕин ыйда. Финалга тахсар иһин киирсиигэ М.Идрисовтыын тустуутугар күрэхтэһиитэ суоҕа таайбытын эттэ. Ити барьеры ааһыахтаахпыт диэтэ. Ханныгын да иһин, Идрисов Россия чемпиона, эдэрдэргэ Европа күрэхтэһиитин кыайыылааҕа. Обьема Николайдааҕар быдан үрдүк, ону биһиги билиниэхпитин наада, инникитин ханнык күрэхтэһиигэ, ханна кыттарын туһунан Румыния тустууга федерациятын, хамаанда салайааччытын кытта сүбэлэһэн баран быһаарыахпыт диэтэ.

Пресс-конференция бүтүүтэ Семен Чердонов – Николай Охлопковка уонна Владимир Кириллиҥҥэ Саха Республикатын Спорка министиэристибэтин Махтал суруктарын туттарда. Оттон Павел Пинигин олохтоммут балаһыанньа быһыытынан, федерация аатыттан – аан дойду эдэрдэргэ күрэхтэһиитин боруонса призера Николай Охлопковка 150 000, оттон кини тренерэ Владимир Кириллиҥҥэ 37,500 солкуобайдаах сертификаттары туттарда.

Аҕыйах хонуктааҕыта этэ дии, утуйарбытын даҕаны умнан туран бөҕөстөрбүтүгэр ыалдьан, Бухарестан быһа биэриини түүннэри көтүппэккэ көрбүппүт. Ол ыра санаабыт туолан, уолбут Николай Охлопков үһүс бириистээх миэстэҕэ тахсан наҕараадаламмыт боруонса мэтээлин пресс-конференцияҕа кэлбиттэр бары илиибитинэн тутан-хабан көрдүбүт. Кырдьыга даҕаны, күүстээх үлэ түмүгэ буоларын итэҕэйдибит!

Дьэ, Николай Охлопков көбүөргэ хаһан тахсарын кэтэспиппит ыраатта. Кырдьык, гражданствотын ылара уһуннук оҥоһуллан, таһымнаах күрэхтэһиилэри элбэҕи көтүттэ. Ол да буоллар, бастакы улахан сүрэхтэниитэ ситиһиилээх буолла. Уопсайынан, спортсменнарбыт ханнык да сиртэн кытынныннар, кинилэр син биир биһиги биир дойдулаахтарбыт, бэйэбит дьоммут. Бэлиэ түгэҥҥэ сөп түбэһиннэрэн, Николай Охлопковы эрчийэ сылдьыбыт, киниэхэ тустууга тапталы иҥэрбит дьоҥҥо: Сунтаар хамаандатын сүрүн тренерэ Николай Романович Даниловка, Олимпийскай эрэл училищетын тренерэ Артур Константинович Константиновка эмиэ махталбытын тиэрдиэххэ!

Петр ПАВЛОВ.

Ааптар хаартыскаҕа түһэриилэрэ.

Добавить комментарий

Ваш адрес email не будет опубликован. Обязательные поля помечены *