Николай Гермогенов саҥа кирбиитэ

Саха дуобаччыттара, төһө да аан дойду бүттүүнүн үрдүнэн хара дьайдаах коронавирус хамсыга бүрүүкээн турбутун иһин, саҥаттан саҥа ситиһиилэринэн ыалдьааччыларын үөрдэллэр. Алтынньыга Турция Кушадасы куоратыгар нуучча дуобатыгар аан дойду чемпионата ааспытын, саха дуобаччыттара 6 мэтээли ылан, илии туттуурдаах, өттүк харалаах кэлбиттэрин спорт суруналыыстара П.Павлов, А.Посельскай, маастардар В.Куприянов, Г.Гурьев балачча сырдаппыттара.

Сэтинньигэ Турция, аны Анталья куоратыгар 100 харахтаах дуобат блиц уонна түргэн көрүҥнэригэр аан дойду чемпионата ыытылынна. Саха сириттэн эр дьоҥҥо СӨ үтүөлээх тренерэ Василий Кононов үөрэнээччитэ гроcсмейстер Николай Гермогенов соҕотоҕун кыттыбыт буоллаҕына, дьахталларга – уоппуттаах М.Ноговицына, Н.Шестакова, А.Чупрова, А.Колодезникова-Кычкина уонна хас да эдэр кыргыттар кытыннылар.

Дьахталларга блицкэ, тумус туттар дуобаччыппыт, гроссмейстер Матрена Ноговицына үрүҥ көмүс мэтээлгэ тигистэ. Кыһыл көмүс, боруонса мэтээллэри Башкортостан кэскиллээх кыргыттара Алия Аминова уонна Айгуль Идрисова ыллылар.

Түргэн дуобакка эмиэ башкиркалар күннээтилэр. Бу сырыыга А.Идрисова – бастаата, лидердэрэ, гроссмейстер Тамара Тансыккужина үрүҥ көмүс мэтээл хаһаайката буолла. Үһүс миэстэҕэ Россия кыыһа Кристина Осипова таҕыста. Биһиги кыргыттарбыт, оскуола үөрэнээччилэрэ Тунаара Федорова 4-с (коэффициенынан), Сандаара Апросимова 5-с миэстэлэргэ тигистилэр.

Аан дойдуга ордук билиниллэр дуобат бу көрүҥүгэр бүгүҥҥү күҥҥэ дьахталлырбыт балачча ситиһиилээх буоллахтарына, эр дьоҥҥо ситиһиибит сэмэй. Чулуу дуобаччыппыт, нуучча дуобатыгар аан дойду 12 (классикаҕа – 7, блицкэ – 5) төгүлээх чемпиона Гаврил Колесов 2011 сыл от ыйыгар аан дойду 100 харахтаах дуобакка блицкэ 6-с чемпионатыгар саха эр дьонуттан аан бастакынан Уфа куоракка аатырбыт гроссмейстердар Александр Шварцман уонна Александр Георгиев кэннилэриттэн үһүс миэстэҕэ тахсан, боруонса мэтээли ылбыта уонна саха дуобатын саҥа үрдүк кирбиигэ таһаарбыта.

Тоҕус сыл буолан баран, гроссмейстер Николай Гермогенов түргэн дуобакка үрүҥ көмүс мэтээли ылан, Гаврил ол рекордун куоһарда. Кыһыл көмүс мэтээлгэ Николайы коэффициена үрдүгүнэн эрэ баһыйан, Украина гроссмейстера Юрий Аникеев тигистэ. Боруонса мэтээли Россия гроссмейстера Сергей Белошеев ылла.

Өссө, Николай 2014 сыллаахха Ярославскай уобаласка ыытыллыбыт Россия эр дьоҥҥо чемпионатыгар гроссмейстердар: А.Шварцман, А.Калмаков, А.Гетманскай, М.Амриллаев, В.Мильшин, И.Трофимов, бэйэбит уолаттарбыт: Н.Гуляев, А.Федотов, Н.Никаноров, В.Варламов иннилэригэр түһэн, саха эр дьонуттан бастакынан, Россияҕа чемпионнаан ыалдьааччыларын үөрдүбүтэ.

Манна даҕатан эттэххэ, Коля кэнники 10 сылга республика икки дуобакка чемпионаттарыгар: нуучча дуобатыгар 2017, 2018, 2019 сс. – бастаабыта, 2011, 2012, 2015, 2020 сс. – иккистээбитэ; 100 харахтаах дуобакка 2014, 2016, 2018, 2019 сс. – бастаабыта, 2010 с. – иккистээбитэ, 2011 сылга – үһүстээбитэ. Аан дойду, Европа, Россия чулуу гроссмейстердарын кытта биир таһымҥа турар дуобаччыттардаах Саха сиригэр бу олус үрдүк көрдөрүү!

Онон, Николайтан уонна саҥа эдэр көлүөнэ дуобаччыттарыттан: Анатолий Протодьяконовтан, Алексей Большаковтан, Айсен Егоровтан уо.д.а., кэлэр чугастааҕы сылларга, Аан дойду, Европа чемпионаттарыгар, 100 харахтаах дуобакка классикаҕа бастааннар, саха дуобатын саҥа чаҕылхай кирбиигэ таһааралларын көһүтэбит.

Константин СТРУЧКОВ.

Дьокуускай

 

Добавить комментарий

Ваш адрес email не будет опубликован. Обязательные поля помечены *