Нефтеюганскай көбүөрүгэр

Алтынньы 12-14 күннэригэр Нефтеюганскайга Россия спортивнай тустууга федерациятын вице-президенэ, Ханты-Мансийскай автономнай уокурук депутата Владимир Семенов бирииһигэр көҥүл тустууга норуоттар икки ардыларынааҕы XV турнир ыытыллар. Турнирга Россия тустууга күүстээх регионнарын тэҥэ Азербайджан, Венгрия, Германия, Турция, Иран, Монголия, Казахстан хамаандалара кыттыахтара. Барыта отучча дойду бөҕөстөрө кэлэллэрин кэтэһэллэр.

Кыттааччылар испииһэктэригэр Европа быйылгы чемпиона Артур Найфонов, аан дойду кубогын призера Александр Зеленков, Европа чемпиона, аан дойду призера Сослан Кцоев, Европа чемпионатын призера Заур Макиев, аан дойду икки төгүллээх призера Алан Гогаев, Европа чемпионатын икки төгүллээх призера Исраил Касумов, Европа эдэрдэргэ күрэхтэһиитин кыайыылаахтара Чермен Валиев, Анзор Закуев, уо.д.а. бааллар.

Бу түһүлгэҕэ Саха сириттэн Арыйан Тютрин (57 кг), Федор Постников (57  кг), Егор Потапов (57 кг), Петр Павлов (61 кг), Дьулустан Булатов (65 кг), Виктор Рассадин (65 кг) кыттыахтара.

Былырыын биһиги бөҕөстөрбүтүттэн бу турнирга Ньургун Александров (57 кг) уонна Виктор Рассадин (65 кг) кыайыы көтөллөммүттэрэ. Арыйан Тютрин (57 кг) үһүс бириистээх миэстэни ылбыта. Оттон Георгий Кычкин (57 кг) уонна Егор Пономарев (61 кг) бэһис буолбуттара.

2017 сылтан бу турнир Тустуу аан дойдутааҕы түмсүүтүн (UWW) сыллааҕы календарыгар киллэриллэн ыытыллар. Онон таһыма үрдээбитин санатабын. Хапсыһыылар “Жемчужина Югры” спортивнай комплекска ыытыллыахтара.

Интернетинэн быһа биэриини wrestrus.ru cайтка көрүөххэ сөп.

Петр ПАВЛОВ.

Добавить комментарий

Ваш адрес email не будет опубликован.