Наро-Фоминскай: Биир мэтээлинэн дуоһуйдубут

Дьэ, биэс күн устата ыытыллан, 21-гэр диэри саастаахтарга Россия көҥүл тустууга биирдиилээн бастыыр иһин күрэхтэһиитэ түмүктэннэ. Саха сириттэн барыта 19 бөҕөс күүһүн холосто. Бу сырыыга биһиги хамаандабыт биир мэтээллэннэ. Дыгын оонньуутун сэттэ төгүллээх муҥутуур кыайыылааҕа Уйбаан Белолюбскай төрөппүт уола, Р.М. Дмитриев аатынан Олимпийскай эрэл училищетыгар үөрэнэр-эрчиллэр 20 cаастаах Айаал Белолюбскай (тренерэ П.М. Капитонов) 57 киилэҕэ боруонса мэтээли ылары ситистэ.

Атын уолаттарбытыттан Егор Вензель уонна Харысхал Григорьев (иккиэн 57 кг) пьедестал үһүс үктэлигэр тахсалларыгар биир үктэл тиийбэтэ, онон бэһис миэстэлэннилэр.

Айаал Белолюбскай бастаан бэйэтин киһитэ Валерий Андросовы ыраастык хотон баран, дагестанец Магомед Абдурахмановка 0:5 ахсаанынан сабырыйтаран кэбиспитэ. Салгыы күрэхтэһиигэ киһитэ финалга тахсыбытынан – “уоскутар” бөлөххө киирэн дагестанец Ахмедовы кэбэҕэстик хоппута (12:4), онтон Россия былырыын күһүҥҥү күрэхтэһиитин кыайыылааҕа хакас Роман Астанаевы кытта хардары-таары бырахсыылаах тыҥааһыннаах киирсиигэ 11:10 ахсаанынан кыл мүччү баһыйан, үһүс миэстэ иһин тустар быраабы ылбыта. Онно Егор Вензели 7:2 ахсаанынан хотон, Россия эдэрдэргэ күрэхтэһиитин боруонса мэтээлин кэтэр чиэскэ тигистэ.

Манна даҕатан эттэххэ, хас биирдии миэстэлэспит бөҕөскө, сүрүн мэтээли таһынан, наро-фоминскайдар бэйэлэрэ оҥорбут өйдөбүнньүк мэтээллэрэ туттарылыннылар. Онон Айаал Белолюбскай икки мэтээлинэн наҕараадаланна.

Р.М. Дмитриев аатынан Олимпийскай эрэл училищетын тренерэ, норуоттар икки ардыларынааҕы кылаастаах спорт маастара Павел Капитонов: “Айаал миэхэ кэлиэн иннинэ мин билэрбинэн, тренер Анатолий Олесовка уонна Дьокуускай куорат үс нүөмэрдээх спортивнай оскуолатыгар эрчиллибитэ. 2015 сыллаахх Пермь куоракка ыытыллыбыт уолаттарга Россия күрэхтэһиитигэр уонна 2017 сыллаахха Россия үөрэнээччилэргэ спартакиадатыгар үһүс миэстэлэрдээх. Наро-Фоминскайга үчүгэйдик туһунна дии саныыбын. Россия сүүмэрдэммит хамаандатын састаабыгар киирдэ. Айааллыын үлэбит өссө да элбэх. Тактика-техника өттүнэн маастарыстыбатын үрдэтиэхпит, сыыһалар өссө да элбэхтэр”, — диэн иитиллээччитин кыттыытын бэрт сэмэйдик сыаналаата.

Санатан эттэххэ, Айаал Белолюбскай — былырыын Петр Алексеев аатынан Саха сирин хапсаҕайга биирдиилээн уонна хамаанданан бастыыр иһин чемпионатын улахан дьоҥҥо бастакы ыйааһыҥҥа кыайыылааҕа. Ити кини тыыппалааҕын, дьулуурдааҕын, бэриниилээҕин көрдөрөр.

Күрэхтэһии түмүк көрдөрүүтэ:

57 кг: 1. Магомед Абдурахманов (Санкт-Петербург), 2. Начын Монгуш (Тыва), 3. Башир Магомедов (Дагестан), 3. Айаал Белолюбскай, 5. Харысхал Григорьев, 5. Егор Вензель (үһүөн – Саха сирэ).

61 кг: 1. Фёдор Балтуев (Иркутскай), 2. Александр Сабанов (РСО-Алания), 3. Мустафа Юлдошев, 3. Абдулмажид Кудиев (иккиэн – Дагестан).

65 кг: 1. Алик Хадарцев (РСО-Алания), 2. Юрий Аракелян (Краснодар), 3. Шамиль Мамедов, 3. Инар Кетия (иккиэн – Москва).

70 кг: 1. Алан Кудзоев (РСО-Алания), 2. Имам Ганишев (Дагестан), 3. Иман Шихшабеков (Ставрополь), 3. Мурат Джакупов (КЧР).

74 кг: 1. Умар Муталиев, 2. Магомед Абдулкадыров (иккиэн – Дагестан), 3. Абдар-Рахман Кумыков (КБР), 3. Адам Юсупов (Санкт-Петербург).

79 кг: 1. Магомед Магомаев, 2. Камил Далгатов (иккиэн – Дагестан), 3. Руслан Черткоев, 3. Давид Бетанов (иккиэн – РСО-Алания).

86 кг: 1. Асхаб Саадулаев (Дагестан), 2. Алик Шебзухов, 3. Магомед Гусбанов (иккиэн – Москва), 3. Загид Каримов (Дагестан).

92 кг: 1. Алан Багаев (ХМАО), 2. Рамазан Шабанов (Дагестан), 3. Константин Пшеничников (Кемеровскай уоб), 3. Георгий Мчедлишвили (Москва уоб).

97 кг: 1. Сергей Козырев (РСО-Алания), 2. Али Алиев, 3. Ахмедгаджи Магомедов (иккиэн – Дагестан), 3. Арсамаг Засеев (Москва).

125 кг: 1. Ален Хубулов, 2. Андрей Бестаев (иккиэн – Москва), 3. Артём Пуховскай (Москва уоб), 3. Ацамаз Теблоев (РСО-Алания).

Саамай элбэх мэтээли ханнык хамаанда ылла?

Көрөргүт курдук, Хотугу Осетия уонна Дагестан хамаандалара үстүү чемпионнаахтар. Итини тэҥэ Санкт-Петербург куораттан дагестанец Магомед Абдурахманов, Иркутскайтан бурят Федор Балтуев, Ханты-Мансийскайтан уонна Москваттан осетиннар Алан Багаев, Ален Хубулов кыайдылар.

Оттон саамай элбэх мэтээли ханнык хамаанда ылла диир буоллахха, Дагестан – 3 бастакы, 5 иккис, 5 үһүс (барыта 13 мэтээллээх), Хотугу Осетия – 3 бастакы, 1 иккис, 3 үһүс (барыта 7 мэтээллээх), Москва хамаандата – 1 бастакы, 2 иккис, 3 үһүс миэстэлээх (барыта 6 мэтээллээх).

Биһиги хамаандабыт былырыыҥҥы маннык күрэхтэһиигэ икки мэтээллээх (57 кг Петр Копылов иккис, Алексей Копылов үһүс) эбит буоллаҕына, быйыл биир мэтээллээхпит. Ыалларбыт буряттар мэтээлэ суох хааллылар, оттон тувинецтартан былырыыҥҥы кыайыылаах Начын Монгуш бу сырыыга иккис буолла.

Дьэ, итинник сыыппара-чахчы кэнниттэн тустууну таптааччылар бэйэҕит ырытан, сыаналаан, түмүктэ оҥостуҥ. Тустуу ханна, хайдах сайдан иһэрин, салгыы хайдах үлэлиэххэ сөбүн.

Бу кыайыылаахтар сүрүннээн аныгыскы Олимпиадаҕа суоттанар буолуохтаахтар. Оттон билигин, кинилэр – ахсынньыга Белградка (Сербия) буолуохтаах аан дойду эдэрдэргэ түһүлгэтигэр сүүмэрдэннилэр диэххэ сөп.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *