Наро-Фоминскай: Айаал Белолюбскай боруонса мэтээллэннэ!

 

Россия 21-гэр диэри саастаах ыччаттарга көҥүл тустууга биирдиилээн бастыыр иһин күрэхтэһиитин иккис күнүгэр, биһиги бириэмэбитинэн түүн үөһүгэр, 57 уонна 61 киилэлэргэ бастыҥнары быһаарар хапсыһыылар ыытылыннылар.

Ол иннинэ, “уоскутар” бөлөххө Александр Авелов – Битоковы (КБР) очукуонан ыраастык хотон баран, бэйэтин киһитэ Харысхал Григорьевка 0:5 ахсаанынан хотторон кэбистэ. Оттон Айаал Белолюбскай бастаан дагестанец Ахмедовы кэбэҕэстик кыайда (12:4), салгыы киирсиигэ Россия былырыын күһүҥҥү күрэхтэһиитин кыайыылааҕа хакас Роман Астанаевы кытта хардары-таары бырахсыылаах тыҥааһыннаах киирсиигэ 11:10 ахсаанынан кыл мүччү баһыйан, үһүс миэстэ иһин тустар быраабы ылла.

Онон 57 кг ыйааһыҥҥа боруонса мэтээл иһин бэйэбит уолаттарбыт Айаал Белолюбскай уонна Егор Вензель, Харысхал Григорьев уонна дагестанец Башир Магомедов туһуннулар. Онуоха Дыгын оонньуутун сэттэ төгүллээх муҥутуур кыайыылааҕа Уйбаан Белолюбскай төрөппүт уола, Дьокуускай куорат нүөмэрдээх спортивнай оскуолатын иитиллээччитэ, билигин Р.М. Дмитриев аатынан Олимпийскай эрэл училищетыгар үөрэнэр-эрчиллэр Айаал Белолюбскай (тренерэ П.М. Капитонов) биир дойдулааҕа Е.Вензели 7:2 ахсаанынан хотон, Россия эдэрдэргэ күрэхтэһиитин боруонса мэтээлин кэтэр чиэскэ тигистэ. Оттон Харысхал Григорьев Дагестан бөҕөһүгэр 0:2 ахсаанынан хотторон кэбиһэн, эмиэ Егор Вензель курдук бэһис миэстэлэннэ.

Онон бастакы финаллар түмүктэрэ маннык буолла:

57 кг: 1. Магомед Абдурахманов (Санкт-Петербург), 2. Начын Монгуш (Тыва), 3. Башир Магомедов (Дагестан), 3. Айаал Белолюбскай (Саха сирэ).

61 кг: 1. Федор Балтуев (Иркутскай-Бурятия), 2. Александр Сабанов (РСО-Алания), 3. Мустафа Юлдошев, 3. Абдулмажид Кудиев (иккиэн Дагестантан).

Ол оннугар 65 уонна 70 кг ыйааһыннарга кыттыбыт уолаттарбыт хомойуох иһин тулуспатылар. Петр Парников (65 кг) – Алик Хадарцевка (Хотугу Осетия) 0:10, Албан Аввакумов (70 кг) – Ананда Бадмаевка (Заб. кыраай) 8:12, Вальтер Владимиров (70 кг) – Алик Садояҥҥа (Калининград) 4:12 ахсаанынан хоттордулар. Станислав Свинобоев (70 кг) бастаан Альберт Макоевы (Москва) 9:4 кыайан баран, салгыы күрэхтэһиигэ Резуан Кажаровка (КБР) 1:9 ахсаанынан хотторон кэбистэ.

Бу түгэҥҥэ, Петр Парников финалист А.Хадарцевка хотторбутун быһыытынан, “уоскутар” бөлөххө тустар буолла.

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *