Нарофоминскай-2020: Россия чемпионатын иннинэ 57 киилэҕэ балаһыанньа хайдаҕый?

Москва уобалаһын Нарофоминскай куоратыгар кэлэр нэдиэлэҕэ ыытыллыахтаах көҥүл тустууга Россия чемпионатыгар ирдэбил быһыытынан кэккэ күрэхтэһиилэр түмүктэринэн бастыҥнар талыллан кыттыахтара. Балаһыанньаҕа олоҕуран ыйааһын ахсын 16-лыы бөҕөс буолуохтаах.

Ол курдук, Россия спортивнай тустууга федерациятын быһаарыытынан – былырыын Аан дойду Кубогар, Россия чемпионатыгар, “Аланнар” турнирга, быйыл “Иван Ярыгин” турнирга уонна Россия эдэрдэргэ күрэхтэһиитигэр мэтээллэргэ тиксибит эрэ бөҕөстөр кыттыахтаахтар.

Дьэ, оччотугар, ити ааттаммыт күрэхтэһиилэргэ 57 кг ыйааһыҥҥа кимнээх миэстэлэспиттэрин ырытан көрүөххэ.

Аан дойду Кубога-2019 (Дьокуускай)

1 миэстэ – Арыйаан Тютрин, Муслим Садулаев (Россия).

Россия чемпионата-2019 (Сочи)

1 – Рамиз Гамзатов (Дагестан), 2 – Муслим Садулаев (Чечня), 3 – Гасан-Гусейн Бадрутдинов (Дагестан), 3 – Михаил Иванов (Саха сирэ-Москва).

«Аланнар» норуоттар икки ардыларынааҕы турнир-2019 (Владикавказ)

1 – Ахмед Идрисов (Дагестан), 2 – Бехбайар (Монголия), 3 – Азамат Тускаев, Александр Сабанов (иккиэн – Хотугу Осетия).

«Иван Ярыгин» норуоттар икки ардыларынааҕы турнир-2020 (Красноярскай)

1 – Азамат Тускаев (Хотугу Осетия), 2 – Ахмед Идрисов, 3 – Рамиз Гамзатов (иккиэн – Дагестан), 3 – Арыйаан Тютрин (Саха сирэ).

Эдэрдэргэ Россия күрэхтэһиитэ (Нарофоминскай)

1 – Магомед Абдурахманов (С-Петербург), 2 – Начын Монгуш (Тыва), 3 – Айаал Белолюбскай (Саха сирэ), 3 – Башир Магомедов (Дагестан).

Федерация ирдэбилинэн Россия чемпионатыгар бу бөҕөстөр кыттыахтаахтар. Көрбүккүт курдук, Тускаев, Идрисов, Гамзатов, Тютрин, Садулаев – иккилиитэ ааттаннылар, уоннааҕылар – биирдиитэ. Онон 12 киһи буолла. Манна өссө аан дойду икки төгүллээх чемпиона дагестанец Завур Угуев киирэн биэрэрэ буолуо.

Ылан көрдөххө, улахан дьоҥҥо тустуу күрэхтэһиитэ буолбатаҕа ыраатта. Ким хайдах-ханнык таһымҥа сылдьара биллибэт. Сэрэйдэххэ, ким урукку форматыгар киирбэккэ, ким ыйааһына тахсан хаалан, ким эчэйэн, эбэтэр ыалдьан, ити ааттаммыт дьонтон Нарофоминскай көбүөрүгэр дьэ, төһөтө тахсар? Холобур, Александр Сабанов соторутааҕыта эдэрдэргэ Россия күрэхтэһиитигэр 61 киилэҕэ иккис миэстэни ылбыта. Кини Нарофоминскайга 57 киилэҕэ буолбакка, бука 61 кг ыйааһыҥҥа кыттара буолуо дии саныыбын.

Онон чопчу ким кыайарын, кимнээх миэстэлэһиэхтэрин сөбүн этэр күчүмэҕэй. Туох баҕарар буолуон сөп. Көбүөр көрдөрүө диирбитигэр тиийэбит.

Аахпыккыт уонна билэргит курдук, бастакы балаһыанньаҕа олоҕуран бу ыйааһыҥҥа биһигиттэн – Аан дойду Кубогын кыайыылааҕа Арыйаан Тютрин, Россия чемпионатын боруонса призера Михаил Иванов уонна эдэрдэргэ Россия күрэхтэһиитигэр үһүс миэстэлээх Айаал Белолюбскай кыттыахтаахтар.

Оттон биһиги спорка салалтабыт, чуолаан Саха Республикатын Спорка бэлэмнэнии киинэ – Россия спортивнай тустууга федерациятын кытта үлэлэһэн, кэпсэтэн, эбии Петр Константиновы, Петр, Алексей Копыловтары, Георгий Окороковы – чемпионакка кытыннарар кыаҕы ситистилэр. Онон 57 киилэҕэ сэттэ кыттааччылаахпыт.

Сэрэйдэххэ, атын да республикалар, хамаандалар ити курдук, кэпсэтии ыытан, бөҕөстөрүн эбии киллэттэрэр буолуохтаахтар. Ол эрээри, хас ыйааһын ахсын 16-лыы эрэ кыттааччы буолуохтаах…

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *