Найахыга тустуу туоната


Балаҕан ыйын 29 күнүгэр Уус Алдан Найахы нэһилиэгэр иккис төгүлүн Найахыттан аан маҥнайгы тустууга ССРС спордун маастара Иван Степанович Охлопков сырдык кэриэһигэр 2006-2007 сыллаах төрүөх уолаттарга аһаҕас турнир өрө көтөҕүллүүлээхтик буолан ааста. Турнирга Дьокуускай куораттан, Тулагыттан, Мэҥэ Хаҥалас улууһуттан, ыаллыы сытар Нам II Хомустааҕыттан уонна Уус Алдан 9 нэһилиэгиттэн барыта 95 эдэр бөҕөс кэлэн көбүөргэ күөн көрүстэ.

Күрэхтэһиини иккис төгүлүн Иван Охлопков дьиэ кэргэнин уонна аймахтарын көҕүлээһиннэринэн, үбүлээһиннэринэн, нэһилиэк дьаһалтата, оскуола коллектива өйөөн, тэрийэн ыыттылар. Бочуоттаах ыалдьыттарынан Иван Степанович Охлопковтыын биир кэмҥэ күрэхтэспит үс тустуу маастара, Саха АССР тустууга чемпиона, спорт бэтэрээнэ Алексей Андреевич Охлопков, Россия, Саха сирин үтүөлээх тренерэ Степан Петрович Сивцев, Иван Охлопков кэргэнэ Мотрена Семеновна Охлопкова, Уус Алдан улууһун оҕо-спортивнай оскуолатын дириэктэрэ Николай Николаевич Готовцев, 2018 с. аан дойду тустуутугар үһүс миэстэлээх, Дальний Восток, Россия чемпиона, Россия хамаандатын чилиэнэ Валера Андросов уонна 2017 с. Россия үһүс призера, Дальний Восток чемпиона, эмиэ Россия хамаандатын чилиэнэ Иван Степанов буоллулар.

Тустуу түһүлгэтин солбуллубат судьуйата, Дьокуускай куорат 3-с нүөмэрдээх оҕо-спортивнай оскуолатын тренерэ, найахылар күтүөттэрэ Станислав Егорович Афанасьев, күрэхтэһиини иккис төгүлүн иилээн-саҕалаан ыытааччы, комментатор Александр Семенович Ушницкай буоллулар.
Күрэхтэһии «Найахы нэһилиэгэ» муниципальнай тэриллии баһылыга Петр Степанович Сивцев эҕэрдэ, Мотрена Семеновна Охлопкова, Алексей Андреевич Охлопков эдэр спортсменнарга алгыс тылларыттан саҕаланна. Уолаттар 26, 29, 32, 35, 38, 41, 45, 50, 55 уонна 55 үөһээ ыйааһыннарга туһуннулар.

Тыҥааһыннаах киирсиилэр, долгутуулаах хапсыһыылар кэнниттэн бириистээх миэстэлэри ыллылар:

26 кг 1 миэстэ – Аммосов Айтал (Сыырдаах), 2 миэстэ – Аввакумов Эльдар (Мындааба), 3 миэстэ – Харитонов Денис (Найахы), 3 миэстэ – Алексеев Кирсан (Бороҕон).

29 кг 1 миэстэ – Сивцев Сеня (Мындааба), 2 миэстэ – Корякин Алеша (Мэҥэ Хаҥалас), 3 миэстэ – Пинигин Владик (Мэҥэ Хаҥалас), 3 миэстэ – Боронов Артем (Мэҥэ Хаҥалас).

32 кг 1 миэстэ – Винокуров Юра (Дьокуускай), 2 миэстэ – Князев Олег (Мындааба), 3 миэстэ – Григорьев Максим (Кэптэни), 3 миэстэ – Соловьев Айдар (Дьокуускай).

35 кг 1 миэстэ – Марков Айкар (Мэҥэ Хаҥалас), 2 миэстэ – Саввин Артем (Танда), 3 миэстэ – Захаров Сеня (Нам), 3 миэстэ – Явловскай Эдик (Мэҥэ Хаҥалас).

38 кг 1 миэстэ – Сивцев Арсен (Дьокуускай), 2 миэстэ – Руфов Давид (Мындааба), 3 миэстэ – Олесов Урсун (Найахы), 3 миэстэ – Ушницкай Витя (Мэҥэ Хаҥалас).

41 кг 1 миэстэ – Варламов Ганя (Дьокуускай), 2 миэстэ – Калачиков Никита (Мэҥэ Хаҥалас), 3 миэстэ – Васильев Сема (Бороҕон), 3 миэстэ – Капитонов Авсентий (Дьокуускай).

45 кг 1 миэстэ – Алексеев Павел (Мындааба), 2 миэстэ – Сивцев Костя (Найахы), 3 миэстэ – Готовцев Арсен (Танда), 3 миэстэ – Спиридонов Сандал (Дьокуускай).

50 кг 1 миэстэ – Васильев Айаан (Дьокуускай), 2 миэстэ – Степанов Федя (Дьокуускай), 3 миэстэ – Петухов Сережа (Кэптэни), 3 миэстэ – Варламов Ярик (Тулагы).

55 кг 1 миэстэ – Мкртчян Грачик (Дьокуускай), 2 миэстэ – Ильин Андрей (Мэҥэ Хаҥалас), 3 миэстэ – Ширяев Афоня (Мэҥэ Хаҥалас).

55 кг үөһээ 1 миэстэ – Черноградскай Ваня (Танда), 2 миэстэ – Сивцев Ярик (Кэптэни), 3 миэстэ – Герасимов Миша (Мындааба).

Бары миэстэлэспит эдэр тустууктар Иван Степанович дьиэ кэргэниттэн уонна аймахтарыттан харчынан бириэмийэлэннилэр, ону тэҥэ чорбойбут күрэхтэһээччилэргэ биирдиилээн анал ааттар уонна бириистэр туттарылыннылар. Ол курдук, анал ааттары ыллылар: «Бастыҥ тустуук» (Уус Алдан улууһун тустууга Федерацията) – Винокуров Юра (Дьокуускай). «Найахы оскуолатын эрэллээх тустууга» (Найахы оскуолата) – Сивцев Сандал. «Кыайыыга дьулуур» (Уус Алдан оҕо спортивнай оскуолата) – Князев Олег (Мындааба). «Көрөөччүлэр биһирэбиллэрэ» (Найахы оскуолата) – Марков Айкар (Мэҥэ-Хаҥалас). «Тыҥааһыннаах киирсии» (Бороҕоннооҕу анал олимпийскай эрэл оҕо-спортивнай оскуолата) – Варламов Ганя (Дьокуускай). «Тыҥааһыннаах киирсии» (Бороҕоннооҕу олимпийскай эрэл оҕо-спортивнай оскуолата) – Калачиков Никита (Мэҥэ Хаҥалас), «Удьуор утума» (И.С. Охлопков дьиэ кэргэнэ) – Олесов Урсун (Найахы).

Анал бириистэр хаһаайыннарынан буоллулар: Сивцев Костя (Найахы) – Иван Степанович Охлопков бииргэ үөрэммит оҕолоро, Дүпсүн оскуолатын 1965 с. оскуоланы бүтэрбиттэр планшет туттардылар. Черноградскай Ваня (Танда) – Иван Степанович Охлопков бииргэ тустубут үөлээннээҕэ Иван Егорович Соловьев дьиэ кэргэнин бирииһэ. Харитонов Денис (Найахы) – Антонина, Василий Гаврильевтар бириистэрэ. Варламов Ярик (Тулагы) – Наум Наумович Ермолаев бирииһэ. Васильев Сема (Бороҕон), Аммосов Айтал (Сыырдаах) – Алексей Андреевич Охлопков бириистэрин ыллылар.
Күрэхтэһиини көрөөччүлэр олус сэҥээрэн, долгуйан туран көрдүлэр, уолаттарга ыарыйдылар. Ол курдук, тустууну сөбүүлээн көрөөччү Егор Готовцев күрэхтэһии түмүктүүр чааһыгар уолаттарга эрэл-кынат буоллун диэн, бэйэтин анал бириистэрин үс эдэр тустуукка туттарда.

Күрэхтэһии күөн көрсүүнэн эрэ муҥурдаммакка, бары кэлбит кыттааччыларга Степан Петрович Сивцев иилээһининэн Россия хамаандатын чилиэннэрэ, эдэр тустууктар Валера Андросов уонна Ваня Степанов маастар-кылаас көрдөрдүлэр. Оҕолор олус интэриэһиргээн, уу-чумпутук олорон тустуу араас албастарын көрдүлэр, туһалаах сүбэлэри иһиттилэр. Күрэхтэһиигэ Иван Степанович сиэнэ, Дьокуускай куорат национальнай гимназиятын 8-с кылааһын үөрэнээчитэ, саахымакка оҕолорго Саха сирин чемпионката Настя Андреева кэлэн, оскуола оҕолоругар, ону тэҥэ улахан дьоҥҥо саахымакка биир кэлим сеанстары биэрэн барда. Оҕолорго үчүгэйдик оонньообут Найахы оскуолатын 5-с кылааһын үөрэнээччитигэр Дьячковскай Маратка Настя бэйэтин бирииһин туттарда.

Бу курдук Найахы сиригэр биир дойдулаахпыт, чаҕылхай спортсмен Иван Степанович Охлопков аатынан тустуу түһүлгэтэ бэрт сэргэхтик, өрө көтөҕүллүүлээхтик, долгутуулаахтык буолан ааста. Эдэр оҕолор, спортсменнар инникитин өссө да дьаныардаахтык дьарыктанан, утумнаахтык, тустууну ыһыктыбакка, үрдүккэ тута, дьарыктана сылдьыахтара диэн эрэнэн туран, ситиһиилэрэ элбии, кыайыылара ахсыы турдун диэн баҕара хааллыбыт.

Любовь СИВЦЕВА, Найахы оскуолатын иитэр үлэҕэ дириэктэри солбуйааччы.
Уус Алдан.

Ааптар уонна Эрэл ОХЛОПКОВ хаартыскаҕа түһэриилэрэ.

Добавить комментарий

Ваш адрес email не будет опубликован.