Мытищи көбүөрүттэн – үс мэтээл

Москва уобалаһын Мытищи спортивнай оскуолатын көҥүл тустууга уолаттарга уонна эдэрдэргэ аһаҕас күрэхтэһиитигэр саха тустууга кыһатын иитиллээччилэрэ эриэ-дэхси көрдөрүүлэннилэр. Ол курдук, Хаҥалас улууһун оҕо спортивнай оскуолатын тренерэ, ССРС спордун маастара Анатолий Петров иһитиннэрбитинэн, биһиги эдэр бөҕөстөрбүт үс мэтээли ылары ситистилэр.

2004-2006 сс. төрөөбүт уолаттарга 45 кг ыйааһыҥҥа Хаҥалас улууһуттан В.П. Керемясов аатынан Дьокуускай куорат үс нүөмэрдээх спортивнай оскуолатыгар эрчиллэр Дьулус Петров бастакы миэстэҕэ таҕыста.

Бу күрэхтэһиигэ Саха сириттэн, Өлөөнтөн төрүттээх, билигин Москваҕа олорор, дьарыктанар Коля Щеглов эмиэ ситиһиилээхтик кытынна, 48 кг бастаата.

Оттон 2001-2003 сс. төрөөбүттэргэ, билигин Р.М. Дмитриев аатынан Олимпийскай эрэл училищетыгар үөрэнэр ДЮСШ №3 иитиллээччитэ Михаил Сергеев 74 киилэҕэ иккис миэстэни ылла. Эмиэ Олимпийскай эрэл училищетыгар үөрэнэр Хаҥаластан төрүттээх Даниил Иванов 97 кг ыйааһыҥҥа тэҥнээҕин булбата.

Санатан эттэххэ, Даниил соторутааҕыта Пермь куоракка ыытыллыбыт Бүтүн Россиятааҕы турнирга эмиэ бастакы миэстэни ылбыта. Кини аны бүгүҥҥүттэн Смоленскайга саҕаланар Россия көҥүл тустууга эдэрдэргэ күрэхтэһиитигэр кыттыыны ылыаҕа. Талааннаах ыччаппытыгар ситиһиини баҕарыахха!

Петр ПАВЛОВ.

Добавить комментарий

Ваш адрес email не будет опубликован. Обязательные поля помечены *