Муҥутуур кыайыылаах 150 тыһ. солк. бириэмийэлэниэ

 

Бу өрөбүллэргэ, кулун тутар 5-6 күннэригэр – ССРС, РСФСР, Саха АССР спортарын маастара, СР үтүөлээх тренерэ Иннокентий Андреевич Халдеев төрөөбүтэ 80 сылыгар анаммыт хапсаҕайга республикатааҕы турнир ыытыллар.

Турнир генеральнай спонсора – «Интехстрой» тэрилтэ. Ыйааһыннарыгар бастаабыттарга – 15-тии, иккис миэстэлээхтэргэ – 10-нуу, үһүстээбиттэргэ – 5-тии тыһ. солк. харчынан бириистэр туттарыллыахтара. Оттон 75 киилэҕэ диэри муҥутуур кыайыылаахха И.А. Халдеев 80 сааһынан анаан, кини үөрэппит, эрчийбит уолаттара 80 тыһ. солк. харчынан бириис туруордулар. Ити курдук, 75-тэн үөһэ кг муҥутуур кыайыылаах 150 тыһ. солк. бирииһинэн бириэмийэлэниэ.

Санатан эттэххэ, Иннокентий Халдеев Москваҕа  физкультура уонна спорт Киин институтун бүтэрэн, көҥүл тустууга ССРС спордун маастара ааттаах эргиллибитэ, Уус Алдаҥҥа анал үөрэхтээх маҥнайгы тренер. Манчаары Баһылай Спартакиадатын хапсаҕайга 3 кыһыл көмүс, 1 үрүҥ көмүс мэтээллэрин ылаттаан, Саха АССР спордун маастара буолбута. Сибиир уонна Дальнай Восток норуоттарын спорт национальнай көрүҥнэрин Спартакиадаларыгар  буряттар барильдаан, тувалар хуреш тустууларыгар ситиһиилээхтик киирсэн, РСФСР спорт национальнай көрүҥнэригэр маастар нуорматын ылбыта.

И.А. Халдеев элбэх биллиилээх бөҕөһү иитэн, киниэхэ Саха АССР үтүөлээх тренерин үрдүк аата иҥэриллибитэ. Иннокентий Андреевич – Уус Алдан улууһун, Бороҕон нэһилиэгин Бочуоттаах гражданина.

1999 сылтан Иннокентий Халдеев аатынан Саха Республикатын спордун маастара нуормалаах хапсаҕайга турнир ыытыллар.

«Дьулурҕан».

Хаартыскаҕа: Манчаары бастакы спартакиадатын хапсаҕайга чемпионнара. Уҥаттан үһүс – Иннокентий Халдеев. 1968 c.

Добавить комментарий

Ваш адрес email не будет опубликован. Обязательные поля помечены *