Муҥутуур кыайыылаах – Эрчим Баппаҕай!


Өрөспүүбүлүкэ үрдүнэн улуустарга араас күрэхтэһиилэр буола тураллар. Олортон биирдэстэрэ спорду өрө туппут, элбэх биллиилээх спортсменнардаах Үөһээ Бүлүүгэ бэҕэһээҥҥиттэн Саха Өрөспүүбүлүкэтин норуоттарын lll спортивнай оонньууларын муҥутуур кыайыылааҕа Александр Кузнецов сырдык кэриэһигэр мас тардыһыыга өрөспүүбүлүкэтээҕи күрэхтэһии ыытыллан, кимнээх кыайбыттара билиннэ.

Санатар буоллахха, бу күрэхтэһии 2009 сылтан саҕаланан быйыл алтыс төгүлүн ыытылынна. Күрэхтэһиини түмүктүүр тэрээһин иннинэ аҕай 75 киилэҕэ диэри уонна 75 киилэттэн үөһээ ыйааһыннаахтарга муҥутуур кыайыылааҕы быһаарар киирсиигэ мадьыньылар ханнык уочаратынан киирэр сэрэбиэйинэн быһаарыы буолла. 75 киилэҕэ диэри ыйааһыҥҥа – аҕыс, онтон 75 киилэттэн үөһэҕэ – 5 мадьыны киирсэр буолла.

Күрэхтэһии түмүгүн таһаарыы

Күрэхтэһиини түмүктүүр тэрээһиҥҥэ сэттэ ыйааһыҥҥа кыайбыттары (эр дьоҥҥо уонна дьахталларга) чиэстээһин үрдүк таһымнаахтык ыытылынна, кыайбыттар бары наҕаарадаланнылар, кыайыы үрдүк чыпчаалын билэн сүргэлэрэ көтөҕүлүннэ. Күрэхтэһии кыттааччыларын Үөһээ Бүлүү олохтоохторун ааттарыттан улуус баһылыгын 1-кы солбуйааччы Семен Михалев эҕэрдэлээтэ.
Наҕараадалааһын кэнниттэн бары ыйааһыннарга бастаабыт мадьынылар кэрэ кыргыттар подноска тутан турар маҥан коруобкаларын сэрэбиэй быһыытынан тахсан ыллылар. Диктор: «Биир! Икки! Үс!» диэтин кытта арыйдылар уонна төгүрүтүллүбүт кумааҕы ыллылар. «Супер бириис» суруктаах кумааҕы Уус Алдан мадьыныта, бэтэрээннэргэ 80 киилэҕэ диэри ыйааһыннаахтарга бастаабыт Егор Слепцовка түбэһэн, үөрүүтэ үс бүк үрдээтэ. Александр Кузнецов аймахтара биэрбит 80 тыһ. солк уу харчыны үөрүүлээх быһыыга-майгыга туттардылар. Дьэ, бу буолар түөрэх түһүүтэ, баат сатаныыта.

Муҥутуур күүстээхтэри быһаарыы

Салгыы күрэхтэһии муҥутуур кыайыылаахтарын быһаарар түмүк киирсии буолла. Бэрт тыҥааһыннаах киирсии кэнниттэн 75 киилэҕэ диэри ыйааһыннаахтарга муҥутуур кыайыылаах Уус Алдан мадьыныта Айсен Атастыров буолан, 43 тыһ. солк наҕараадаланна. Онтон 75 киилэттэн үөһэ ыйааһыҥҥа муҥутуур күүстээх аатын Үөһээ Бүлүү мадьыныта Эрчим Баппаҕай ылан, Ороһу нэһилиэгин дьаһалтата туруорбут убаһатын ылла. Утарсааччыларын адьас тулуппата.
Күрэхтэһиигэ 12 улуустан (Мииринэй, Сунтаар, Ньурба, Үөһээ Бүлүү, Бүлүү, Горнай, Дьокуускай, Нам, Амма, Уус Алдан, Хаҥалас, Мэҥэ Хаҥалас, Чурапчы уонна ХИФУ) 70-тан тахса мадьыны, ол иһигэр 12 спорт маастар кытыннылар.

Күрэхтэһээччилэр, ыалдьыттар санаалара:

Эрчим Баппаҕай, Европа күрэхтэһиитин чөмпүйүөнэ, 2017 сыллааҕы Манчаары оонньуутугар мас тардыһыытын муҥутуур кыайыылааҕа:

— Күрэхтэһии үрдүк таһымнаахтык ааста. Миигин анаан-минээн чиэстээбит улууһум дьонугар-сэргэтигэр ис сүрэхтэн махталбын тиэрдэбин. Барыгытыгар тус олоххутугар дьолу-соргуну, кэрэни-үтүөнү баҕарабын.

Николай Дьяконов, күрэхтэһии кылаабынай судьуйата, Дыгын оонньууларын хас да төгүллээх чөмпүйүөнэ:

— Күрэхтэһии үрдүк таһымнаахтык ааста. Ол курдук, өрөспүүбүлүкэҕэ биллэр-көстөр мадьынылар кыттыылара тэрээһин таһымын үрдэттэ. Александр Кузнецов кэриэһигэр аналлаах күрэхтэһии инники да өттүгэр тохтоон хаалбакка, күүскэ ыытыллыаҕа диэн эрэнэбин.

Николай Константинов, Дьокуускай куорат, 70 киилэҕэ бэтэрээннэргэ бастакы миэстэлээх:

— Күрэхтэһии этэҥҥэ, үчүгэйдик ааста. Үөһээ Бүлүү улууһа ханнык баҕарар күрэхтэһиини кыайа тутан, үрдүк таһымнаахтык ыытар уратылаах. Эҕэрдэбин тиэрдэбин. Судьуйалар эппиэтинэстээхтик, хаачыстыбалаахтык үлэлээбиттэрин бэлиэтиибин.

«Үөһээ Бүлүү» хаһыат.

Добавить комментарий

Ваш адрес email не будет опубликован. Обязательные поля помечены *